వైట్ అండ్ వైట్కు గుడ్ బై.. ట్రెండీ లుక్లో సీఎం విజయ్..ఈ డ్రెస్కొడ్ వెనుక అసలు రహస్యం?
తెల్ల చొక్కా, అంచున్న తెల్ల పంచె.. ఇదే తమిళ రాజకీయాల్లో ముఖ్యమంత్రులు దశాబ్ధాలుకు ధరిస్తున్న డ్రెస్ కోడ్.. కానీ ఇప్పుడక్కడ సీన్ మారింది. తమిళ రాజకీయాల్లో సంచలన సృష్టించిన సినీ హీరో, టీవీకే చీఫ్ విజయ్ ఈ పంచె కట్టు సాంప్రదాయాన్ని పక్కన పెట్టి.. సూటుబూటుతో ట్రెండి లుక్లో కనిపించి అందనిరి ఆశ్చర్యానికి గురి చేశాడు. పాత తరం నేతలకు ఇది ఆశ్చర్యమైతే.. యువతకు మాత్రం ఇదో కొత్త కిక్ ఇస్తోంది.
Updated on: May 13, 2026 | 8:19 AM
తమిళనాట నాయకుల నుంచి సామాన్యుల వరకు డ్రెస్ కోడ్ ప్రత్యేకంగా ఉంటుంది. తెల్ల చొక్కా, తెల్ల పంచె.. వైట్ అండ్ వైట్ డ్రెస్ కోడ్ అనేది తమిళనాడులో సర్వసాధారణం. రాజకీయ నాయకుల్లో అయితే ప్రత్యేకించి చెప్పక్కర్లేదు. ముఖ్యమంత్రులుగా పనిచేసిన నాయకులు వైట్ అండ్ వైట్ లో ఉండటమనేది ఒక ఆనవాయితీగా ఉండేది. కామరాజర్తో మొదలై అన్నాదురై నుంచి పళనిస్వామి, మాజీ సీఎం స్టాలిన్ వరకు అదే తెల్ల చొక్కా, అదే తెల్ల పంచె డ్రెస్కోడ్ను కొనసాగించారు. దేశంలో ఇలాంటి డ్రెస్ కోడ్ కేవలం తమిళనాడులో మాత్రమే కనిపిస్తుంది. కేరళలో మాత్రం పంచె కట్టు కామన్గా ఉన్నా, చొక్కా రంగులు మాత్రం మారుతుంటాయి.
తమిళనాడులో అయితే తెల్ల పంచెకు ఆయా పార్టీల జెండాలోని రంగుల బోర్డర్ లైన్స్తో పంచెలు దుకాణాల్లో అందుబాటులో ఉంటాయి. డీఎంకే పార్టీకి సంబంధించిన నేతలు ఎరుపు, నలుపు బోర్డర్ కలిగిన పంచెలను ధరిస్తే. అన్నా డీఎంకే నేతలు ఎరుపు, మధ్యలో తెలుపు, తర్వాత నలుపు బోర్డర్ కలిగిన పంచెలను ధరిస్తుంటారు. ప్రతి పార్టీ గుర్తులను బట్టి ఆయా రంగులతో పంచెలు మార్కెట్లో లభిస్తుంటాయి.
విజయ్ మార్క్
కానీ తాజాగా 2026లో జరిగిన ఎన్నికల్లో ప్రభంజనం సృష్టించి కొత్తగా ముఖ్యమంత్రిగా బాధ్యతలు చేపట్టిన టీవీకే చీఫ్ విజయ్ ఈ సాంప్రదాయ దుస్తులకు చెక్ పెడుతూ కొత్త డ్రెస్ కోడ్తో ట్రెండింగ్లోకి వచ్చారు. ఎన్నికల ప్రచారంలో లైట్ బ్రౌన్ కలర్ ప్యాంట్, తెల్ల చొక్కా ధరించి వెరైటీగా కనిపించారు. అప్పట్లో విజయ్ డ్రెస్ కోడ్ను ఏపీ మాజీ ముఖ్యమంత్రి, వైసీపీ అధినేత జగన్ డ్రెస్ కోడ్తో పోల్చారు. ఇక సీఎం విజయ్ మరో అడుగు ముందుకు వేసి ప్యాంటు, షర్టు పైన నల్ల కోటు ధరించి కొత్త లుక్లో కనిపించారు.
అభిమానుల ఆనందం
ప్రమాణ స్వీకారం సందర్భంగా ఈ కొత్త డ్రెస్ కోడ్లో విజయ్ను చూసిన అభిమానులు ఆనందంతో కేకలు వేశారు. ఇప్పటిదాకా తమిళనాడులో ఏ ముఖ్యమంత్రి కూడా ఇలాంటి డ్రెస్ కోడ్లో కనిపించలేదు. అందరూ పంచె కట్టు, తెల్ల చొక్కా ధరించి ఒకే మూసలో ఉండగా.. విజయ్ లుక్ యువతకు, ప్రజలకు కొత్తగా అనిపించింది. దీనిపై సోషల్ మీడియాలో కూడా ప్రశంసలు వెల్లువెత్తుతున్నాయి. విజయ్ నటించిన సర్కార్ సినిమాలో కూడా ప్రస్తుతం సీఎం హోదాలో ఉన్న డ్రెస్ కోడ్లోనే కనిపించిన విషయాన్ని అభిమానులు సోషల్ మీడియాలో షేర్ చేస్తున్నారు.
మరిన్ని జాతీయ వార్తల కోసం ఇక్కడ క్లిక్ చేయండి.
