PM Modi: పెరుగుతోన్న కరోనా కేసులు.. నేడు ముఖ్యమంత్రులతో పీఎం మోదీ కీలక సమావేశం..

COVID Review Meeting: భారత్‌లో మరోసారి కరోనా వైరస్ కేసులు వేగంగా పెరుగుతున్నాయి. పెరుగుతున్న కరోనా కేసుల మధ్య ప్రధానమంత్రి నరేంద్ర మోడీ బుధవారం రాష్ట్రాల ముఖ్యమంత్రుల సమావేశానికి పిలుపునిచ్చారు. ఈ సమావేశంలో ప్రధాని మోదీ దేశవ్యాప్తంగా కరోనా పరిస్థితిని సమీక్షించనున్నారు. దేశంలో వరుసగా 7వ రోజు 2 వేలకు పైగా కొత్త కరోనా(Corona) కేసులు నమోదయ్యాయి. గత 24 గంటల్లో 2,483 కొత్త కేసులు నమోదయ్యాయి. అదే సమయంలో రాజధాని ఢిల్లీ(Delhi)లో కూడా కరోనా కేసులు తగ్గడం లేదు. ఢిల్లీలో గత 24 గంటల్లో 1204 కొత్త కరోనా కేసులు నమోదయ్యాయి. సోమవారం ఇక్కడ 1011 కేసులు నమోదయ్యాయి. రోజురోజుకూ పెరుగుతున్న కేసులపై ప్రధాని నరేంద్ర మోదీ(PM Narendra Modi) అన్ని రాష్ట్రాల ముఖ్యమంత్రులతో సమావేశం కానున్నారు. బుధవారం జరిగే ఈ సమావేశానికి ప్రధాని మోదీతో పాటు ప్రధానమంత్రి కార్యాలయ ఉన్నతాధికారులు కూడా హాజరుకానున్నారు. ఈ సమావేశానికి కేంద్ర హోం మంత్రి అమిత్ షా, కేంద్ర ఆరోగ్య శాఖ మంత్రి మన్సుఖ్ మాండవ్య, ఆయన మంత్రిత్వ శాఖకు సంబంధించిన అధికారులు కూడా హాజరయ్యే అవకాశం ఉంది. ఈ సమావేశంలో కరోనా బూస్టర్ డోస్ ఉచితంగా ఇవ్వాలనే ప్రతిపాదనను దేశవ్యాప్తంగా కూడా జారీ చేయవచ్చని భావిస్తున్నారు.

కోవిడ్ ఇన్‌ఫెక్షన్ కేసుల దృష్ట్యా మాస్క్‌లు ధరించడం, సరైన దూరాన్ని అనుసరించడం, తరచుగా చేతులు కడుక్కోవడం వంటి అన్ని నివారణ చర్యలను అనుసరించాలని, అప్రమత్తంగా ఉండాలని ఆదివారం ప్రధాని మోదీ దేశ ప్రజలను కోరారు. అదే సమయంలో, జూన్‌లో కరోనా నాల్గవ వేవ్ గరిష్ట స్థాయికి చేరుకుంటుందని కర్ణాటక ఆరోగ్య మంత్రి ఒక పరిశోధన ఆధారంగా పేర్కొన్న సంగతి తెలిసిందే.

మధ్యాహ్నం 12 గంటలకు సమావేశం..

దేశంలో పెరుగుతున్న కరోనా కేసులపై బుధవారం మధ్యాహ్నం 12 గంటలకు ముఖ్యమంత్రులందరితో ప్రధాని నరేంద్ర మోదీ వీడియో కాన్ఫరెన్స్ నిర్వహించనున్నారు. గత వారం రోజులుగా దేశంలో రెండు వేల మందికి పైగా కొత్త నమోదవుతున్న సంగతి తెలిసిందే. రోజుకు 1 వేయికి పైగా కేసులు వస్తున్న రాజధాని ఢిల్లీ గురించి అతిపెద్ద ఆందోళన నెలకొంది. నాల్గవ వేవ్ ప్రభావం అక్టోబర్ వరకు ఉంటుందని, అదే సమయంలో కర్ణాటక ఆరోగ్య మంత్రి కె సుధాకర్ మాట్లాడుతూ, జూన్ చివరి నాటికి, నాల్గవ వేవ్ కరోనా దాని గరిష్ట స్థాయికి చేరుకోవచ్చని అన్నారు. ఐఐటీ కాన్పూర్ అధ్యయనాన్ని ప్రస్తావిస్తూ, దీని ప్రభావం అక్టోబర్ వరకు ఉంటుందని తెలిపారు. దీన్ని దృష్టిలో ఉంచుకుని, కర్ణాటక ప్రభుత్వం రాష్ట్రంలో ఫేస్ మాస్క్‌లు ధరించడం, సామాజిక దూరాన్ని తప్పనిసరి చేసింది.

దేశంలో రికవరీ కేసుల సంఖ్య 1,970..

యాక్టివ్‌గా ఉన్న కరోనా కేసుల సంఖ్య 15,636కి చేరుకోగా, పాజిటివిటీ రేటు 0.55 శాతానికి తగ్గింది. మరోవైపు, ఐఐటీ మద్రాస్‌లో 32 కొత్త కరోనా కేసులు వెలుగుచూడడంతో, మొత్తం సంఖ్య 111 కి చేరుకుంది. గత 24 గంటల్లో రికవరీ కేసుల సంఖ్య 1,970కి చేరింది. అలాగే దేశంలో కరోనా నుంచి కోలుకుంటున్న వారి సంఖ్య 4,25,23,311‌కు పెరిగింది. అదే సమయంలో, రికవరీ రేటు 98.75%గా నమోదైంది. ICMR ప్రకారం, నిన్న భారతదేశంలో కరోనా కోసం 4,49,197 నమూనా పరీక్షలు జరిగాయి. దేశంలో ఇప్పటివరకు మొత్తం 83,54,69,014 నమూనా పరీక్షలు జరిగాయని తెలిపింది.

ఓమిక్రాన్ వేరియంట్‌లపై కోవిషీల్డ్ ప్రభావం చాలా తక్కువ..

అధ్యయనాలు కోవిషీల్డ్ వ్యాక్సిన్ కరోనా ఒమిక్రాన్ వేరియంట్‌కు వ్యతిరేకంగా బలహీనంగా ఉందని కనుగొన్నాయి. ఓమిక్రాన్ BA.1 వేరియంట్‌పై కోవిషీల్డ్ వ్యాక్సిన్ ప్రభావం తక్కువగా ఉందని అధ్యయనంలో తేలింది. ఈ అధ్యయనంలో కరోనా కోవిడ్‌షీల్డ్ వ్యాక్సిన్ రెండు మోతాదులను తీసుకున్న రోగులు ఉన్నట్లు తెలిపింది. ఒమిక్రాన్ వేరియంట్‌లకు వ్యతిరేకంగా కోవాక్సిన్ కూడా చాలా ప్రభావవంతంగా లేదని గతంలో ఒక నివేదికలో తేలింది. Covishield లేదా Covaccine రెండు మోతాదులను తీసుకున్న తర్వాత కూడా Omicron, దాని వేరియంట్‌లు అనారోగ్యానికి గురిచేస్తాయని నిపుణులు అంటున్నారు. వాటిని నివారించడానికి, బూస్టర్ మోతాదు సూచించిన సంగతి తెలిసిందే.

మరిన్ని జాతీయ వార్తల కోసం ఇక్కడ క్లిక్ చేయండి..

Also Read: Ola Electric Scooter: లక్షలు పోసి కొన్న స్కూటర్ ను తగలబెట్టిన ఓనర్.. అలా ఎందుకు చేశాడంటే..

CBSE Syllabus 2022: రాజకీయ శక్తులకు కొమ్ముకాస్తున్న సీబీఎస్సీ బోర్డు! ఆరోపణల్లో నిజమెంత..?