పాల్ఘర్ సామూహిక దాడి కేసులో ముగ్గురు పోలీసుల డిస్మిస్

మహారాష్ట్రలోని గచించాలె  గ్రామంలో గత ఏప్రిల్ 16 న ఇద్దరు సాధువులను, కారు డ్రైవర్ ను స్థానికులు సామూహికంగా కొట్టి చంపిన కేసులో  ముగ్గురు పోలీసులను ప్రభుత్వం డిస్మిస్ చేసింది. వీరిలో ఇద్దరు సబ్ ఇన్స్పెక్టర్లు, ఓ హెడ్ కానిస్టేబుల్ ఉన్నారు. ఈ కేసులో మొత్తం 150 మందిని పోలీసులు అరెస్ట్ చేశారు. ఈ సాధువులు కారులో ముంబై నుంచి సూరత్ వెళ్తుండగా వారి కారును అడ్డగించిన గుంపు కర్రలు, రాళ్లతో కొట్టి తీవ్రంగా గాయపరిచారు. ఆ దాడిలో కారు డ్రైవర్ సహా ఇద్దరు సాధువులు కూడా ఆ తరువాత మరణించారు. వీరిని పిల్లలను ఎత్తుకుపోయే ముఠాగా అనుమానించిన స్థానికులు నిర్దాక్షిణ్యంగా ఈ ఎటాక్ కి పాల్పడ్డారు. కనీసం వారు చెబుతున్నది కూడా వినిపించుకోలేదని తెలిసింది.

ఈ కేసు విచారణ కోర్టులో  సుదీర్ఘకాలం సాగింది. సీఐడీ అధికారులు రెండు చార్జిషీట్లు దాఖలు చేశారు.  మొదట ఈ కేసులో నిర్లక్ష్యంగా వ్యవహరించారన్న ఆరోపణపై ముగ్గురు పోలీసులను ప్రభుత్వం సస్పెండ్ చేసింది. వారిని ఇప్పుడు విధుల నుంచి తొలగించింది.