రెండు ట్రక్కుల్లో 300 మంది వర్కర్లు.. షాక్ తిన్న మహారాష్ట్ర పోలీసులు

రెండు కంటెయినర్ ట్రక్కుల్లో 300 మంది వర్కర్లను చూసిన మహారాష్ట్ర పోలీసులు షాక్ తిన్నారు. వీరంతా తెలంగాణ నుంచి రాజస్తాన్ కు నిత్యావసర సరకులను తీసుకువెళ్తున్నట్టు తెలుస్తోంది. ఆ రాష్ట్రానికి చెందిన వీరు తమ సొంత ప్రదేశాలకు వెళ్లేందుకు ప్రమాదకరమైన ఇలాంటి పధ్దతిని ఎంచుకోవడం ఖాకీలను విస్మయానికి గురి చేసింది. కరోనా లాక్ డౌన్ నేపథ్యంలో అనేకమంది దినసరి కూలీలు, కార్మికులు ఈ విధంగా అడ్డదారులు వెతుక్కుంటున్నట్టు కనిపిస్తోందని అధికారులు అంటున్నారు. తెలంగాణ నుంచి ఈ రెండు ట్రక్కులు యావత్ మల్ జిల్లాకు చేరుకోగా.. తనిఖీ కోసం పోలీసులు, రెవెన్యూ సిబ్బంది ఈ వాహనాలను ఆపివేసినప్పుడు వీటిలో కుక్కివేసినట్టున్న ఈ కార్మికులు కనబడ్డారు. రాజస్తాన్ పంధార్ కావడ వద్ద టోల్ గేట్ బూత్ సిబ్బంది.. ఈ ట్రక్కులను చూసి.. ఎక్కడ నుంచి ఎక్కడికి వెళ్తున్నారని ఈ వాహనాల డ్రైవర్లను ప్రశ్నించగా.. వారు సరైన సమాధానాలు ఇవ్వలేక తడబడ్డారట. దీంతో అనుమానం వఛ్చిన వారు పోలీసులకు సమాచారం అందించారు. ట్రక్కు డ్రైవర్లపై ఖాకీలు చర్యలకు ఉపక్రమించారు. అయితే దిక్కుతోచని స్థితిలో ఉన్న ఈ 300 మంది వర్కర్ల విషయంలో ఎలాంటి నిర్ణయం తీసుకోవాలో తెలియక  అధికారులు అయోమయంలో ఉన్నారు.