మహారాష్ట్రలో ఘోర రోడ్డు ప్రమాదం.. 15మంది మృతి.. 6గురికి గాయాలు.. తీవ్ర సంతాపం వ్యక్తం చేసిన ప్రధాని మోదీ

Maharashtra Road Accident : మహారాష్ట్రలో ఘోర రోడ్డు ప్రమాదం సంభవించింది. ఈ ఘటనలో 15 మంది కూలీలు దుర్మరణం పాలయ్యారు. ఈ ఘటన జలగావ్ జిల్లా కింగావ్ గ్రామం జరిగింది. కూలీలతో వెళ్తున్న ట్రక్కు బోల్తాపడి అందులో ప్రయాణిస్తున్న 15 మంది కూలీలు మృత్యువాతపడ్డారు. ఆదివారం రాత్రి ఈ ప్రమాదం జరిగినట్టు పోలీసులు తెలిపారు. ఏడుగురు మగవాళ్లు, ఆరుగురు మహిళలు, ఇద్దరు పిల్లలు ఈ ప్రమాదంలో చనిపోయారని పోలీసులు తెలిపారు. ఈ ఘటనకు ట్రక్కు డ్రైవర్‌ నిర్లక్ష్యమే కారణమని ప్రాథమికంగా భావించిన పోలీసులు అతన్ని అరెస్టు చేశారని ఉన్నతాధికారులు తెలిపారు. మృతులంతా అభోడా, కెర్హలా, రవెర్ ప్రాంతాలకు చెందిన కూలీలుగా గుర్తించారు. గాయపడిన ఐదుగురు కూలీలను సమీప ఆసుపత్రికి తరలించి చికిత్స అందిస్తున్నారు.

ఈ ఘటనపై భారత ప్రధాని నరేంద్రమోదీ స్పందించారు. జలగావ్‌లో జరిగిన రోడ్డు ప్రమాదం తన మనసును కలిచివేసిందని ప్రధాని నరేంద్ర మోదీ ఒక ట్వీట్‌లో ఆవేదన వ్యక్తం చేశారు. మృతుల కుటుంబాలకు సంతాపం తెలిపారు. గాయపడిన వారు త్వరగా కోలుకోవాలని ఆశిస్తున్నట్టు తెలిపారు.