సంతోషంగా పెళ్లికి బయలుదేరారు.. ఒక్కసారిగా దూసుకొచ్చిన మృత్యువు.. 11 మంది దుర్మరణం..

Road Accident

బంధువుల ఇంట్లో వివాహ వేడుక మొదలైంది.. వారంతా నూతన వధూవరులను ఆశీర్వదించాలని సంతోషంతో కారులో బయలుదేరారు.. అంతా నవ్వుకుంటూ సరదాగా మాట్లాడుకుంటున్నారు.. ఈ తరుణంలో మృత్యువు వారందరినీ కబళించింది. రెప్పపాటులో జరిగిన ఘోర రోడ్డు ప్రమాదం.. 11 మంది ప్రాణాలను బలితీసుకుంది. ఈ ఘోర రోడ్డు ప్రమాదం.. ఛత్తీస్‌గఢ్‌లోని బలోద్ జిల్లాలో చోటుచేసుకుంది. ఎస్‌యూవీ వాహనం ట్రక్కును ఢీకొనడంతో ఐదుగురు మహిళలు, ఇద్దరు చిన్నారులు సహా 11 మంది మృతి చెందినట్లు బలోద్ పోలీసులు తెలిపారు. బాధితులు, ధామ్‌తరి జిల్లాలోని సోరం-భట్‌గావ్ గ్రామానికి చెందిన వారని తెలిపారు. వీరంతా వివాహానికి వెళుతుండగా జాతీయ రహదారి-30పై పురూర్ పోలీస్ స్టేషన్ పరిధిలోని జగ్తారా గ్రామ సమీపంలో బుధవారం రాత్రి ఈ ఘటన జరిగిందని పోలీసులు వివరించారు.

బాధితులు కాంకేర్ జిల్లా మర్కటోలా గ్రామంలో జరిగే వివాహ వేడుకకు హాజరయ్యేందుకు వెళుతుండగా వారి వాహనం ట్రక్కును ఢీకొట్టిందని పురూర్ పోలీస్ స్టేషన్ స్టేషన్ హౌస్ ఆఫీసర్ అరుణ్ కుమార్ సాహు తెలిపారు.

ఎస్‌యూవీలో ఉన్న వారిలో పది మంది అక్కడికక్కడే మృతి చెందగా, ఒక చిన్నారి గాయాలతో ఆసుపత్రికి తరలిస్తుండగా మృతి చెందిందని అరుణ్ కుమార్ సాహు తెలిపారు.

కాగా.. ఈ ఘటనపై ఛత్తీస్‌ఘడ్ సీఎం భూపేష్ బఘేల్ దిగ్భ్రాంతి వ్యక్తంచేశారు. మృతుల కుటుంబాలకు సంతాపం తెలిపారు.

మరిన్ని జాతీయ వార్తల కోసం..