Ceiling Fans Dust: ఫ్యాన్ తిరిగేటప్పుడు దానిపై ఉండే దుమ్ము ఎందుకు కింద పడదు? ఈ డౌట్ మీకూ వచ్చిందా
వేసవిలో ప్రతి ఇంట్లో ఫ్యాన్లు పగలు రాత్రి నిరంతరం తిరుగుతూ ఉంటాయి. అవి నిరంతరం గాలిని కదిలిస్తున్నప్పటికీ కొన్ని రోజుల్లోనే వాటి రెక్కల అంచులపై నల్లటి దుమ్ము మందపాటి పొరలా పేరుకుపోతుంది. కానీ అంత వేగంగా తిరిగే ఫ్యాన్ రెక్కలపై అసలు ఈ దుమ్ము ఎక్కడి నుండి వస్తుంది? ఫ్యాన్ తిరిగేటప్పుడు ఫ్యాన్ రెక్కలపై ఉండే దుమ్ము ఎందుకని కింద పడదు?
ఫ్యాన్ గాలిలో తిరుగుతున్నప్పుడు దాని రెక్కలు గాలికి రాపిడికి గురవుతాయి. దీనివల్ల రెక్కలపై ఒక రకమైన విద్యుత్ ప్రవాహం (స్థిర విద్యుత్ ఆవేశం) ఏర్పడుతుంది. ఈ ఆవేశం కారణంగా గాలిలో కదులుతున్న దుమ్ము రెక్కల వైపు ఆకర్షించబడుతుంది. అది అయస్కాంతంలా రెక్కల అంచులకు అంటుకుంటుంది.
ఫ్యాన్ దగ్గర గాలి ఎక్కువగా ఉంటుందని చాలా మంది అనుకుంటూ ఉంటారు. కానీ సైన్స్ ప్రకారం రెక్కలకు సరిగ్గా పక్కన ఉండే గాలి పొర చాలా నెమ్మదిగా ఉంటుంది. ఈ పొరలో గాలి ఎక్కువగా కదలదు. కాబట్టి సన్నని ధూళి కణాలు అక్కడ సులభంగా పేరుకుపోతాయి. అందువల్ల ఫ్యాన్ ఎంత వేగంగా తిరిగినా ఈ పొరలోని ధూళి బయటకు ఎగిరిపోదు.
గాలిలో తేమ చాలా ఎక్కువగా ఉంటుంది. ఈ తేమ వల్ల దుమ్ము కొంచెం జిగటగా మారుతుంది. ఈ జిగట దుమ్ము ఒకసారి రెక్కలపై పడితే, ఫ్యాన్ వేగంగా తిరిగినా కూడా అది తొలగిపోదు. బదులుగా వాటిపై మరింత దుమ్ము పొరలు పేరుకుపోతాయి.
బ్లేడ్లపై దుమ్ము పేరుకుపోయినప్పుడు ఫ్యాన్ బరువుగా మారి, గాలి శక్తి తగ్గిపోతుంది. ఫలితంగా ఫ్యాన్ పూర్తి వేగంతో తిరుగుతున్నప్పటికీ, మనకు కావలసినంత గాలి రాదు. అందువల్ల ఫ్యాన్ను అప్పుడప్పుడు తుడవడం మంచిది.
కాబట్టి ఈ వేసవిలో ఫ్యాన్ వేగంపైనే కాకుండా దాని శుభ్రతపై కూడా శ్రద్ధ పెట్టండి. అప్పుడే మీకు స్వచ్ఛమైన, పుష్కలంగా చల్లని గాలి లభిస్తుంది.