ఎమోషనల్‌గా బ్లాక్‌మెయిల్ చేస్తున్నారా? ఇష్టం లేకపోయినా అవును అనిపిస్తుంటే లైట్ తీసుకోవద్దు

గిల్ట్ ట్రిప్పింగ్ అనేది ఒక వ్యక్తి యొక్క ప్రవర్తనను లేదా ఆలోచనలను ప్రభావితం చేయడానికి అపరాధ భావాన్ని ఒక ఆయుధంలా వాడుకోవడం. నేరుగా మన అవసరాన్ని చెప్పడానికి బదులుగా నిందలు వేయడం లేదా నిరాశను వ్యక్తపరచడం వంటి పద్ధతుల ద్వారా ఈ ఒత్తిడిని కలిగిస్తారు. చాలామంది తమకు తెలియకుండానే ఈ పని చేస్తుంటారు. ముఖ్యంగా భావోద్వేగాలు ఎక్కువగా ఉండే సన్నిహిత సంబంధాలలో ఇది ఎక్కువగా కనిపిస్తుంది. గిల్ట్ ట్రిప్పింగ్ వల్ల ఎదుటి వ్యక్తి తాను చేయని తప్పుకు కూడా బాధ్యత వహించాల్సి వస్తుంది. ఆరోగ్యకరమైన అపరాధ భావం మనలో సానుభూతిని పెంచితే ఈ పద్ధతి మాత్రం మనల్ని ఒక బానిసలా మారుస్తుంది. అది ప్రేమ నుండి పుట్టే బాధ్యత కాదు కేవలం భయం నుండి పుట్టే బలవంతపు చర్య మాత్రమే.

గిల్ట్​ ట్రిప్పింగ్​ అంటే..

ఈ గిల్ట్ ట్రిప్పింగ్ అనేది ఎప్పుడూ నేరుగా కనిపించదు. ఇది మాట తీరులో లేదా చేసే చిన్న చిన్న పనుల్లో దాగి ఉంటుంది. మనం ఏదైనా కొత్తగా చేయాలని చూస్తున్నప్పుడు పాత తప్పులను గుర్తు చేయడం లేదా తాము మన కోసం చేసిన ఉపకారాలను పదే పదే చెప్పడం ద్వారా మనం వారికి రుణపడి ఉన్నామనే భావన కలిగిస్తారు. ఒక్కోసారి మౌనం ద్వారా కూడా ఈ ఒత్తిడిని ప్రదర్శిస్తారు.

నేను బాగున్నాను అని చెప్తూనే వారి ప్రవర్తనలో అయిష్టతను చూపిస్తారు. నిట్టూర్పులు విడవడం ఇంకా వెటకారపు మాటల ద్వారా మనం ఏదో తప్పు చేస్తున్నామనే సంకేతాలు పంపుతుంటారు. కాలక్రమేణా ఈ అలవాట్లు మన ప్రవర్తనను మార్చేస్తాయి. మనం ప్రేమతో కాకుండా కేవలం తప్పించుకోవడానికి మాత్రమే వారితో మెలుగుతుంటాం.

బలవంతంగా ఒక పనిని చేయించుకోవడం వల్ల తాత్కాలికంగా ఫలితం ఉండవచ్చు కానీ అది బంధంలో ఉండే నమ్మకాన్ని బలహీనపరుస్తుంది. నిజాయితీగా మాట్లాడుకోవడానికి బదులు ఎమోషనల్ ప్రెజర్ ఉండటం వల్ల ఇద్దరి మధ్య దూరం పెరుగుతుంది. ఎదుటివారు నిజంగా బాధపడుతున్నారా లేక మనల్ని నియంత్రించడానికి ఇలా చేస్తున్నారా అనే అనుమానం మొదలవుతుంది.

దీనివల్ల మానసిక సాన్నిహిత్యం తగ్గిపోయి బంధం ఒక భారంగా మారుతుంది. ఏ వ్యక్తి అయినా తనను నియంత్రించాలని చూస్తే సహజంగానే దూరం జరుగుతాడు. ఫలితంగా ఏ బంధాన్ని అయితే నిలబెట్టుకోవాలని గిల్ట్ ట్రిప్పింగ్ చేస్తారో ఆ బంధమే ముక్కలయ్యే ప్రమాదం ఉంది. ఇది ఒక విషవలయం లాంటిది.

ఎలా ఎదుర్కోవాలి?

గిల్ట్ ట్రిప్పింగ్‌ను ఎదుర్కోవడానికి ముందుగా దానిని గుర్తించడం నేర్చుకోవాలి. సానుభూతిని బాధ్యతను వేరు చేసి చూడాలి. ఎదుటివారు బాధపడుతున్నారని అర్థం చేసుకోవడం వేరు ఆ బాధకు మనమే కారణమని నిందించుకోవడం వేరు. నాకు అపరాధ భావం కలిగించే ప్రయత్నం చేయవద్దు అని స్పష్టంగా చెప్పగలగాలి. మన పరిమితులను ముందే వివరించడం వల్ల ఇటువంటి పరిస్థితులు రాకుండా చూసుకోవచ్చు. ఆరోగ్యకరమైన బంధం ఎప్పుడూ స్వేచ్ఛను ఇస్తుంది కానీ నియంత్రించదు. కేవలం భయం లేదా అపరాధ భావం మీద ఆధారపడి నడిచే బంధం ఎప్పటికీ సుఖాన్ని ఇవ్వదు. మనకు మనం గౌరవం ఇచ్చుకుంటూనే ఇతరులతో నిజాయితీగా మెలగడం వల్ల మానసిక ప్రశాంతతను పొందవచ్చు.