Kitchen Hacks: మిరపకాయలు పాడైపోతున్నాయా?.. ఈ ఒక్క చిన్న చిట్కాతో ఇంట్లోనే బ్రాండెడ్ కారం పొడి రెడీ
భారతీయ సంప్రదాయ వంటకాలలో రకరకాల మసాలా దినుసులు కీలకం. మసాలాల ఘాటైన రుచి లేకపోతే మనం తినే భోజనం అసంపూర్ణంగా అనిపిస్తుంది. అందుకే చాలా మంది వంటల రుచిని, సువాసనను ఘాటును మరింతగా పెంచడానికి రకరకాల దేశీయ మసాలాలను ఉపయోగిస్తుంటారు. ముఖ్యంగా కారాన్ని ప్రతి ఒక్కరి వంటగదిలోనూ నిత్యం వాడుతుంటారు. కారం పొడి, పచ్చి మిరపకాయలు లేదా ఎండు మిరపకాయలు ఏ రూపంలో ఉన్నా ఆహార రుచిని అద్భుతంగా మార్చడంలో కీలకం.
సాధారణంగా మార్కెట్లో మనకు అనేక రకాల ఎండు మిరపకాయలు, సిద్ధంగా ఉన్న కారం పొడులు సులభంగానే లభిస్తాయి. కానీ ప్రస్తుత రోజుల్లో మార్కెట్ ఉత్పత్తులలో రంగులు, రసాయనాలు వంటి కల్తీలు జరిగే అవకాశం చాలా ఎక్కువగా ఉంది. మీరు మీ ఇంట్లోనే ఎలాంటి కల్తీ లేని, అత్యంత స్వచ్ఛమైన ఘాటైన ఎర్ర కారం పొడిని ఉపయోగించాలనుకుంటే, వంటగదిలో మిగిలిపోయిన లేదా ఎండిపోతున్న పచ్చి మిరపకాయలను ఉపయోగించి వాటిని సులభంగా తయారు చేసుకోవచ్చు. ఈ పద్ధతి ఎంతో సులభమైనది ఇంటి బడ్జెట్కు పొదుపైనది కూడా.
మిరపకాయల ఎంపిక
ఇంట్లో స్వచ్ఛమైన కారం పొడిని తయారు చేయడానికి ముందుగా మంచి నాణ్యత గల పచ్చిమిరపకాయలను ఎంచుకోవాలి. వంటగదిలో కాస్త రంగు మారుతున్న లేదా ఎండిపోతున్న మిరపకాయలను కూడా దీనికోసం వాడుకోవచ్చు. వాటిపై ఉన్న దుమ్ము, కెమికల్స్ మట్టిని పూర్తిగా తొలగించడానికి శుభ్రమైన నీటితో బాగా కడగాలి. ఆ తర్వాత, ఈ మిరపకాయలను సుమారు 30 నిమిషాల పాటు చల్లటి నీటిలో అలాగే నాననివ్వాలి.
తేమను తొలగించడం
ఆ తరువాత మిరపకాయలను నీటి నుండి వేరు చేసి ఒక శుభ్రమైన పొడి గుడ్డతో క్షుణ్ణంగా తుడవాలి. ఈ సమయంలో అన్ని మిరపకాయలను జాగ్రత్తగా పరిశీలించడం చాలా ముఖ్యం. ఏవైనా మిరపకాయలు పాడైనట్లుగా, కుళ్ళిపోయినట్లుగా లేదా మెత్తగా ఉన్నట్లు అనిపిస్తే, వాటిని వెంటనే ఏరి పారవేయాలి. లేదంటే అవి మిగిలిన మంచి మిరపకాయలను కూడా పాడు చేస్తాయి. ఇప్పుడు, శుభ్రం చేసిన మిరపకాయలలోని అదనపు తేమను పూర్తిగా తొలగించడానికి వాటిని ఒక టవల్ లేదా పొడి కాటన్ గుడ్డపై ఉంచాలి.
ఎండబెట్టే పద్ధతి జాగ్రత్తలు
మిరపకాయలలో తడి అస్సలు లేకుండా చూసుకున్న తర్వాత, వాటిని ఒక శుభ్రమైన వెడల్పాటి ట్రే లేదా ప్లేటులో ఒకదానికొకటి తగలకుండా వెడల్పుగా పరచాలి. ఆ తర్వాత, ఈ ట్రేని మంచి ప్రకాశవంతమైన సూర్యరశ్మి తగిలేలా ఉంచాలి. మిరపకాయలు లోపలి వరకు పూర్తిగా ఎండడానికి కొన్ని రోజుల సమయం పడుతుంది. కాబట్టి, అవి అన్ని వైపులా సమానంగా త్వరగా ఆరేలా చూసుకోవడానికి, వాటిని ప్రతిరోజూ ఎండలో ఉంచుతూ, మధ్యమధ్యలో చేతులతో అటుఇటు తిప్పుతూ ఉండాలి. మిరపకాయలు పూర్తిగా ఎండిపోయి, చేత్తో పట్టుకుంటే విరిగిపోయేలా గట్టిపడిన తర్వాత, వాటిని తదుపరి ప్రక్రియ కోసం సిద్ధం చేసుకోవాలి. ఒకవేళ వెంటనే పొడి చేసుకోకపోతే, వాటిని గాలి చొరబడని ఒక పొడి డబ్బాలో భద్రపరుచుకోవాలి.
మిక్సీలో పొడి చేయడం..
మిరపకాయలు పర్ఫెక్ట్గా ఎండిన తర్వాత దానిని కారం పొడిగా మార్చే సమయం వస్తుంది. దీని కోసం వంటగదిలోని మిక్సీ గ్రైండర్ను ఉపయోగించవచ్చు. మొదటగా ఎండిన మిరపకాయల కాడలను (తొడిమలు) జాగ్రత్తగా వేరు చేయాలి. ఆ తర్వాత మిరపకాయలను మిక్సీ జార్లో వేసి, మెత్తగా అయ్యేంత వరకు బాగా రుబ్బుకోవాలి. గ్రైండ్ చేసిన తర్వాత వచ్చే స్వచ్ఛమైన ఎర్ర కారం పొడిని కాసేపు చల్లారనిచ్చి, ఆపై గాలి చొరబడని గాజు సీసా లేదా ప్లాస్టిక్ డబ్బాలో భద్రపరుచుకోవాలి.
ఈ విధంగా ఇంట్లోనే పచ్చిమిరపకాయల నుండి కారం పొడిని తయారు చేసుకోవడం వల్ల ఎలాంటి రసాయన రంగులు లేని ఆరోగ్యకరమైన కారం లభిస్తుంది. అంతేకాకుండా, ఇళ్లలో పచ్చిమిరపకాయలు ఎక్కువగా ఉండి ఎండిపోతున్నప్పుడు వాటిని పారవేయకుండా వృధాను అరికట్టవచ్చు.