నెవ్వర్ బిఫోర్ ఎవ్వర్ ఆఫ్టర్.. 10 నిమిషాల్లోనే మామిడికాయ రోటి పచ్చడి.. ఇలా ట్రై చేయండి..

మామిడికాయ సీజన్ రాగానే చాలా మందికి నోరూరించే పచ్చడి మామిడికాయ రోటి పచ్చడి. ఈ పచ్చడి వేడి వేడి అన్నంలో నెయ్యితో కలుపుకుని తింటే దాని రుచి అద్భుతం.. అయితే.. ఈ పచ్చడిని ఎలా తయారు చేయాలో చాలా మందికి తెలియదు.. కానీ.. మామిడికాయ రోటి పచ్చడి జస్ట్ 10 నిమిషాల్లోనే పూర్తవుతుంది.. దీనికోసం పెద్దగా కష్టపడాల్సిన అవసరం లేదు.. ఈ సంప్రదాయ పచ్చడిని సులభమైన పద్ధతిలో ఎలా తయారు చేయాలో ఈ కథనంలో తెలుసుకుందాం.. ఇది కేవలం రెసిపీ మాత్రమే కాదు, ఇది ఒక ఎమోషన్ అని చెప్పొచ్చు.. ఎందుకంటే చాలామందికి మామిడికాయ పచ్చడి ఎన్నో తీపి జ్ఞాపకాలను గుర్తు చేస్తుంది.

మామిడికాయ రోటి పచ్చడి తయారీకి కావాల్సిన పదార్థాలు:

మామిడికాయలు: 2 (పచ్చివి)

స్పూన్ చొప్పున మెంతులు, జీలకర్ర, ఆవాలు, రుచికి సరిపడా కల్లుప్పు లేదా సాధారణ ఉప్పు, వెల్లుల్లి రెబ్బలు, ఇంగువ, పసుపు, కారం సరిపడా, నూనె, ఎండుమిరపకాయలు.. తాలింపు గింజలు కరివేపాకు ఇవి ఉంటే సరిపోతుంది.. దాదాపు అన్ని అందిరి వంటిళ్లలోనూ ఉంటాయి..

తయారీ విధానం:

మొదటగా, రెండు పచ్చి మామిడికాయలను కడిగి తొక్క తీయకుండానే ముక్కలుగా కట్ చేసుకోవాలి. వద్దనుకుంటే.. తొక్క తీసి కూడా వాడుకోవచ్చు.. ఇవి రఫ్‌గా కట్ చేసినా సరిపోతుంది ఎందుకంటే వాటిని దంచాల్సి ఉంటుంది. ఒక కడాయిని స్టవ్ మీద పెట్టి, పావు టీస్పూన్ మెంతులు వేసి దోరగా వేయించాలి. అవి రంగు మారగానే, అర టీస్పూన్ జీలకర్ర, ఒక టీస్పూన్ ఆవాలు చేర్చి నెమ్మదైన మంటపై వేయించి, ఒక గిన్నెలోకి తీసుకోవాలి.

ఇప్పుడు, రోలు (లేదా మిక్సీ జార్) తీసుకొని, వేయించిన మెంతులు, జీలకర్ర, ఆవాలు, రుచికి తగినంత కల్లుప్పు వేసి మెత్తని పొడిలా దంచుకోవాలి. ఈ పొడిని ఒక గిన్నెలోకి తీసి పక్కన పెట్టుకోవాలి. తరువాత, రోట్లో నాలుగు వెల్లుల్లి రెబ్బలు, కట్ చేసుకున్న మామిడికాయ ముక్కలను కొద్దికొద్దిగా వేసుకుంటూ దంచాలి. మామిడికాయ ముక్కలు కొంచెం నలిగిన తరువాత, రెండు టేబుల్ స్పూన్ల కారం, పావు టీస్పూన్ పసుపు చేర్చి, మిగిలిన మామిడికాయ ముక్కలను కూడా వేసుకుంటూ, అక్కడక్కడ చిన్న చిన్న పలుకులు కనబడేలా దంచుకోవాలి.

చివరిగా, పచ్చడికి పోపు సిద్ధం చేయాలి. ఒక కడాయిలో మూడు లేదా నాలుగు టేబుల్ స్పూన్ల నూనె వేసి వేడి చేయాలి. నూనె వేడయ్యాక, అర టీస్పూన్ పచ్చి శనగపప్పు, అర టీస్పూన్ మినపప్పు, అర టీస్పూన్ జీలకర్ర, అర టీస్పూన్ ఆవాలు వేసి వేయించాలి. అవి కాస్త వేగిన తరువాత, నాలుగైదు దంచిన వెల్లుల్లి రెబ్బలు వేసి వేయించాలి. ఆ తరువాత, పావు టీస్పూన్ ఇంగువ, నాలుగు ఎండుమిరపకాయ ముక్కలు, కొద్దిగా కరివేపాకు వేసి పోపును బాగా వేయించాలి.

ఈ వేయించిన పోపును దంచుకున్న మామిడికాయ పచ్చడి ముద్దలో వేసి బాగా కలపాలి. ముందుగా తయారుచేసుకున్న ఆవాలు, జీలకర్ర, మెంతుల పొడిని కూడా చేర్చి, అంతా కలిసేలా మరొకసారి కలుపుకోవాలి. రుచి చూసి ఉప్పు సరిపోకపోతే, మరికొంత చేర్చి బాగా కలపాలి. ఇలా తయారుచేసిన మామిడికాయ రోటి పచ్చడి బయట నాలుగైదు రోజుల వరకు, ఫ్రిజ్‌లో వారం పది రోజుల వరకు నిల్వ ఉంటుంది. ఆ రోజే తినేట్లయితే, ఉల్లిపాయ ముక్కలు దంచి కలుపుకోవచ్చు. ఈ పచ్చడి అన్నంతో పాటు చపాతీ, అల్పాహారంలో కూడా రుచిగా ఉంటుంది.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..