చియా సీడ్స్ Vs సబ్జా సీడ్స్.. వీటిని ఇలా తిన్నారో ప్రాణాలకే రిస్క్.. ముందు ఈ విషయాలు తెలుసుకోండి..

ఎండలు మండిపోతున్నాయి. ఇలాంటి సమయంలో శరీరాన్ని లోపలి నుండి చల్లబరుచుకోవడం చాలా ముఖ్యం. ప్రకృతి మనకు ప్రసాదించిన అద్భుతమైన గింజలు చియా, సబ్జా. చూడటానికి ఒకేలా ఉన్నా, వీటి పోషకాలు, ఉపయోగించే విధానంలో కొన్ని కీలక మార్పులు ఉన్నాయి. హెల్త్‌లైన్ నివేదికల ప్రకారం.. ఈ గింజల వల్ల కలిగే ప్రయోజనాలు, వీటిని తినేటప్పుడు మనం చేసే పొరపాట్ల గురించి ఇప్పుడు తెలుసుకుందాం.

పోషకాల గని: చియా – సబ్జా

ఈ రెండు గింజలు పరిమాణంలో చిన్నవైనా, ఆరోగ్యానికి చేసే మేలు మాత్రం చాలా పెద్దది. వీటిలో ప్రొటీన్, ఫైబర్, కాల్షియం, ఐరన్, మెగ్నీషియం, ఫాస్ఫరస్, జింక్ పుష్కలంగా ఉంటాయి. ఇవి గుండె ఆరోగ్యానికి, జీర్ణక్రియకు ఎంతో మేలు చేస్తాయి. సబ్జా గింజల్లో ఫైబర్, ఒమేగా-3 ఫ్యాటీ యాసిడ్లు సమృద్ధిగా ఉంటాయి. ఇవి శరీర ఉష్ణోగ్రతను తగ్గించడంలో అద్భుతంగా పనిచేస్తాయి.

తినే సరైన విధానం ఏంటి?

ఈ గింజలను ఎలా పడితే అలా కాకుండా, శాస్త్రీయంగా తీసుకుంటేనే పూర్తి ఫలితం ఉంటుంది..

నానబెట్టడం తప్పనిసరి: చియా, సబ్జా గింజలను రాత్రంతా నీటిలో నానబెట్టడం ఉత్తమం. నానిన తర్వాత ఇవి జెల్ లాగా మారుతాయి.

డిటాక్స్ డ్రింక్: ఉదయాన్నే ఒక గ్లాసు నీటిలో నానబెట్టిన గింజలు, కొద్దిగా నిమ్మరసం కలుపుకుని తాగితే శరీరం నుండి విష పదార్థాలు బయటకు పోతాయి.

ఇతర మార్గాలు: వీటిని పెరుగు, స్మూతీలు, పుడ్డింగ్‌లు లేదా కొబ్బరి నీటిలో కలుపుకుని కూడా తీసుకోవచ్చు.

ఈ పొరపాట్లు అస్సలు చేయకండి

చాలా మంది ఈ గింజలను తీసుకునేటప్పుడు చేసే చిన్న చిన్న పొరపాట్లు ఆరోగ్య సమస్యలకు దారితీయవచ్చు.

నేరుగా తినకూడదు: ఎండు గింజలను ఎప్పుడూ నేరుగా మింగకూడదు. ఇవి గొంతులో అడ్డుపడే ప్రమాదం ఉంది.

అతిగా వద్దు: రోజుకు 2 టీస్పూన్ల కంటే ఎక్కువ నానబెట్టిన గింజలను తీసుకోకపోవడమే మంచిది. అతిగా తింటే జీర్ణ సమస్యలు రావచ్చు.

నీరు తక్కువగా తాగడం: ఈ గింజలలో ఫైబర్ ఎక్కువ కాబట్టి, వీటిని తిన్నప్పుడు రోజంతా తగినంత నీరు తాగుతూ ఉండాలి.

వీరు జాగ్రత్తగా ఉండాలి

కిడ్నీ సమస్యలు ఉన్నవారు: స్టేజ్ 3 కిడ్నీ ఫెయిల్యూర్ బాధితులు చియా గింజలను తినకూడదని నిపుణులు హెచ్చరిస్తున్నారు. ఎందుకంటే ఈ పరిస్థితిలో ఎలక్ట్రోలైట్లను చాలా పరిమితంగా తీసుకోవాలి.

అలెర్జీ బాధితులు: మీకు నువ్వులు లేదా వేరుశెనగలతో అలెర్జీ ఉంటే, చియా గింజల పట్ల కూడా జాగ్రత్తగా ఉండాలి. వీటిలోని ప్రొటీన్ వల్ల కొంతమందికి అలెర్జీ వచ్చే అవకాశం ఉంది.

మందులు వాడుతున్న వారు: ఏదైనా దీర్ఘకాలిక ఆరోగ్య సమస్యలకు మందులు వాడుతున్నట్లయితే, వైద్యుడిని సంప్రదించిన తర్వాతే వీటిని డైట్‌లో చేర్చుకోవాలి.

చియా – సబ్జా గింజలు వేసవిలో మన ఆరోగ్యానికి రక్షణ కవచాలు. సరైన పద్ధతిలో, సరైన మోతాదులో తీసుకుంటే ఇవి మీ జీర్ణక్రియను మెరుగుపరచడమే కాకుండా, మిమ్మల్ని రోజంతా ఉల్లాసంగా ఉంచుతాయి.