Tiredness: ఏ పని చేయకపోయినా రోజంతా అలసిపోయినట్లు నీరసంగా అనిపిస్తుందా?
ఏ పని చేయకపోయినా ఒక్కోసారి శరీరం బరువుగా అనిపించడం, ఏ పని చేయాలనిపించకపోవడం, చిన్న చిన్న పనులు కూడా కష్టంగా తోచడం జరుగుతుంది. ఇలాంటి లక్షణాలు ఉన్నవారు సాధారణంగా థైరాయిడ్ పరీక్షలు, షుగర్ పరీక్షలు, బి12, విటమిన్ డి వంటి రక్త పరీక్షలు చేయించుకుంటూ ఉంటారు. కానీ రిపోర్టులు సాధారణంగానే..
కొంత మందికి రోజంతా ఏ పని చేయకపోయినా అలసటగా అనిపిస్తుంది. శరీరం బరువుగా అనిపించడం, ఏ పని చేయాలనిపించకపోవడం, చిన్న చిన్న పనులు కూడా కష్టంగా తోచడం జరుగుతుంది. ఇలాంటి లక్షణాలు ఉన్నవారు సాధారణంగా థైరాయిడ్ పరీక్షలు, షుగర్ పరీక్షలు, బి12, విటమిన్ డి వంటి రక్త పరీక్షలు చేయించుకుంటూ ఉంటారు. కానీ రిపోర్టులు సాధారణంగానే వస్తాయి. అయినప్పటికీ అలసట తగ్గదు. నిజానికి ఇది ఆందోళన కలిగించే విషయం. ఇలా తరచూ వేదించే నీరసాన్ని చాలా మంది పెద్దగా పట్టించుకోరు. బలహీనతగా భావించి కొట్టిపారేస్తుంటారు. కానీ దీని వెనుక కొన్ని ఆరోగ్య సమస్యలు దాగి ఉండవచ్చు. ఈ సమస్యలు క్రమంగా శరీర శక్తిని, మానసిక స్థితిని ప్రభావితం చేస్తాయి. సకాలంలో శ్రద్ధ పెట్టకపోతే ఇవి దీర్ఘకాలిక సమస్యలకు కారణం అవుతాయి. అందువల్ల ఈ లక్షణాలను సకాలంలో అర్థం చేసుకోవడం, దాని వెనుక ఉన్న ఖచ్చితమైన కారణాన్ని కనుగొనడం చాలా ముఖ్యం.
స్లీప్ అప్నియా
చాలా కాలంగా అలసటగా ఉంటే ఎంత విశ్రాంతి తీసుకున్న తర్వాత కూడా మెరుగుపడదు. బలహీనత, నిద్ర తర్వాత కూడా పునరుత్తేజం లేకపోవడం, ఏకాగ్రత లోపం వంటి లక్షణాలు కూడా కనిపిస్తాయి. ఈ లక్షణాలు స్లీప్ అప్నియాకు కారణం కావచ్చు. నిద్రలో శ్వాస పదేపదే ఆగిపోతుంది. దీనివల్ల నిద్ర పూర్తిగా పట్టదు. దీని వలన రాత్రంతా బాగా నిద్రపోయిన తర్వాత కూడా పగటిపూట నిద్రమత్తు వదలదు. తలనొప్పులు, అలసట వంటి సమస్యలు తలెత్తుతాయి.
థైరాయిడ్
థైరాయిడ్ లేదా ఇతర హార్మోన్ల రుగ్మతల వంటి శరీరంలోని హార్మోన్ల అసమతుల్యతలు శరీర శక్తిని ప్రభావితం చేస్తాయి. ఇది అలసట, మానసిక స్థితిలో మార్పులు, బరువులో మార్పుల వంటి సమస్యలకు దారితీయవచ్చు.
డిప్రెషన్
డిప్రెషన్, ఆందోళన వంటి మానసిక సమస్యలు కూడా శరీరాన్ని అలసిపోయేలా చేస్తాయి. ఇలాంటి పరిస్థితిలో వ్యక్తి మానసికంగా బలహీనంగా ఉంటారు. ఇది శరీరంలో శక్తి లేకపోవడానికి, నిరంతర అలసటకు దారితీస్తుంది.
ఎలా గుర్తించాలి?
పగటిపూట అలసటను గుర్తించడానికి మీ శరీరం ఇచ్చే సంకేతాలపై శ్రద్ధ పెట్టడం ముఖ్యం. ప్రతిరోజూ తగినంత నిద్రపోయిన తర్వాత కూడా మీకు అలసటగా అనిపిస్తే అది సాధారణం కాదని గ్రహించాలి. ఏకాగ్రత లోపం, తరచుగా తలనొప్పి, చిరాకు, పనిపై ఆసక్తి కోల్పోవడం వంటివి లక్షణాలు కనిపిస్తాయి. శరీరం బరువుగా అనిపించి, ఏ పని చేయకపోవడం, శక్తి కోల్పోయినట్లు అనిపించడం కూడా ఒక లక్షణమే. అంతేకాకుండా నిద్రలో గురక పెట్టడం, ఆయాసం, ఉదయం నిద్రలేచిన తర్వాత కూడా ఉత్సాహంగా అనిపించకపోవడం వంటివి నిద్ర సంబంధిత సమస్యలను సూచిస్తాయి. ఈ పరిస్థితి ఎక్కువ కాలం కొనసాగితే, వైద్యుడిని సంప్రదించడం అవసరం.
ఎలా రక్షించుకోవాలి?
అలసటను నివారించడానికి అత్యంత ముఖ్యమైన విషయం సరైన దినచర్యను పాటించడం. ప్రతిరోజూ 7 నుండి 8 గంటల పాటు చక్కగా నిద్రపోవాలి. పడుకునే సమయాన్ని నిర్ణయించుకోవాలి. శరీరానికి అవసరమైన పోషకాలు అందేలా పండ్లు, కూరగాయలు, ప్రోటీన్తో కూడిన సమతుల్య ఆహారం తీసుకోవాలి. క్రమం తప్పని వ్యాయామం శరీర శక్తిని పెంచి, అలసటను తగ్గిస్తుంది. అలాగే మానసిక ఒత్తిడిని తగ్గించుకోవడానికి యోగా, ధ్యానం, మీకు ఇష్టమైన కార్యకలాపాలను అలవాటు చేసుకోవాలి. రాత్రి పడుకునే ముందు స్క్రీన్ సమయాన్ని తగ్గించుకోవాలి. మొబైల్ వాడకం తగ్గించాలి. అయినా ఈ సమస్య కొనసాగితే వీలైనంత త్వరగా వైద్యుడిని సంప్రదించి సరైన చికిత్స తీసుకోవాలి.
మరిన్ని ఆరోగ్య కథనాల కోసం క్లిక్ చేయండి.