దీపావళి కాలుష్యం నుంచి ఊపిరితిత్తులను ఎలా కాపాడుకోవాలి? వైద్యుల ముఖ్యమైన సలహాలు
దీపావళి సమయంలో విపరీతంగా పెరిగే వాయు కాలుష్యం, పటాకుల పొగ కారణంగా ఊపిరితిత్తులు తీవ్రంగా దెబ్బతింటాయి. డాక్టర్ల హెచ్చరికల ప్రకారం, ఈ కాలుష్యం నుంచి ఊపిరితిత్తులను కాపాడుకోవడానికి కొన్ని ముఖ్యమైన జాగ్రత్తలు తీసుకోవాలి. ఇళ్లలో ఎయిర్ ప్యూరిఫైయర్‌లను ఉపయోగించడం, తగినంత నీరు తాగుతూ హైడ్రేటెడ్‌గా ఉండటం చాలా ముఖ్యం. పొగ వల్ల దగ్గు, గొంతు నొప్పి లేదా శ్వాస తీసుకోవడంలో ఇబ్బంది తలెత్తితే వెంటనే వైద్యులను సంప్రదించాలి. మరిన్ని ముఖ్యమైన జాగ్రత్తలేంటో వివరంగా తెలుసుకుందాం..
పండుగల సమయం అనగానే అందరిలోనూ ఉత్సాహం నిండుతుంది. అయితే, దీపావళి వేడుకల్లో కాల్చే పటాకులు, చిచ్చుబుడ్లు వంటి వాటి కారణంగా వెలువడే దట్టమైన పొగ వాతావరణాన్ని తీవ్రంగా కలుషితం చేస్తుంది. గాలిలో పేరుకుపోయే పీఎం 2.5 (PM 2.5), పీఎం 10 (PM 10) వంటి హానికరమైన సూక్ష్మ కణాలు శ్వాసనాళాల ద్వారా నేరుగా ఊపిరితిత్తులను చేరుకుంటాయి. దీనివల్ల గొంతులో మంట, దగ్గు, ఆస్తమా లక్షణాలు ఉద్ధృతం కావడం మరియు శ్వాస తీసుకోవడంలో తీవ్రమైన ఇబ్బందులు తలెత్తుతాయి. ఈ నేపథ్యంలో నిపుణులు, ప్రముఖ వైద్యులు సూచించిన కొన్ని కీలకమైన నివారణా మార్గాల ద్వారా మన ఊపిరితిత్తులను సురక్షితంగా ఉంచుకోవచ్చు.
ఇంట్లోనే ఉంటూ కాలుష్యాన్ని నియంత్రించడం
బయట గాలి నాడ్యత పడిపోయినప్పుడు, వీలైనంత వరకు ఇంట్లోనే ఉండటం మంచిది. ఉదయం, సాయంత్రం వేళల్లో కాలుష్యం తీవ్రత ఎక్కువగా ఉంటుంది. కాబట్టి కిటికీలు, తలుపులు మూసి ఉంచాలి. ఇళ్లలో హెపా ఫిల్టర్లు కలిగిన ఎయిర్ ప్యూరిఫైయర్‌లను ఉపయోగించడం వల్ల గదిలోని గాలి శుభ్రపడుతుంది. అలాగే, ఇళ్లలో ధూప్, అగర్‌బత్తీలు లేదా కొవ్వొత్తులను కాల్చడం మానేయాలి.
N95 మాస్క్‌ల వినియోగం
అత్యవసర పరిస్థితుల్లో బయటికి వెళ్లాల్సి వస్తే సాధారణ కాటన్ మాస్క్‌లకు బదులుగా, సరిగ్గా సరిపోయే N95 లేదా తత్సమాన రెస్పిరేటర్ మాస్క్‌లను ధరించాలి. ఇవి గాలిలోని ప్రమాదకరమైన సూక్ష్మ కణాలు శ్వాసనాళాల్లోకి ప్రవేశించకుండా అడ్డుకుంటాయి.
అవుట్‌డోర్ వ్యాయామాలకు విరామం
గాలి నాణ్యత సూచిక క్షీణించిన రోజుల్లో బహిరంగ ప్రదేశాల్లో జాగింగ్, రన్నింగ్, సైక్లింగ్ లేదా ఇతర కఠినమైన వ్యాయామాలు చేయడం ఆరోగ్యానికి హానికరం. శారీరక శ్రమ పెరిగినప్పుడు వేగంగా శ్వాస తీసుకోవడం వల్ల ఎక్కువ మోతాదులో కాలుష్య కణాలు శరీరంలోకి వెళతాయి. కాబట్టి వాతావరణం మెరుగయ్యే వరకు ఇండోర్ వ్యాయామాలకు ప్రాధాన్యత ఇవ్వాలి.
శ్వాసకోస రోగులు అప్రమత్తంగా ఉండాలి
ఆస్తమా, క్రానిక్ బ్రాంకైటిస్ లేదా ఇతర దీర్ఘకాలిక శ్వాస సమస్యలతో బాధపడేవారు తమ మందులు, ఇన్హేలర్లను ఎల్లప్పుడూ దగ్గరే ఉంచుకోవాలి. వైద్యుల సలహా లేకుండా మందుల మోతాదును మార్చకూడదు.
తగినంత నీరు, ఆరోగ్యకరమైన ఆహారం
శరీరాన్ని ఎప్పుడూ హైడ్రేటెడ్‌గా ఉంచుకోవడం వల్ల గొంతు, శ్వాసనాళాల్లోని మ్యూకస్ పొరలు తేమగా ఉంటాయి. అలాగే, రోగనిరోధక శక్తిని పెంపొందించే విటమిన్ సి, ఒమేగా-3 ఫ్యాటీ యాసిడ్స్, యాంటీ ఆక్సిడెంట్లు ఉన్న పండ్లు, ఆకుకూరలను ఆహారంలో చేర్చుకోవాలి.
ఒకవేళ దగ్గు మూడు రోజులకు పైగా కొనసాగినా, లేదా ఛాతిలో బిగువుగా అనిపించినా, శ్వాస తీసుకోవడంలో తీవ్ర ఇబ్బంది తలెత్తితే ఎలాంటి ఆలస్యం చేయకుండా వెంటనే వైద్యులను సంప్రదించి తగిన చికిత్స తీసుకోవాలి.
మరిన్ని లైఫ్ స్టైల్ న్యూస్ కోసం క్లిక్ చేయండి..