అరెరే.. వేడి వేడిగా తింటుంటే నాలుక కాలిందా..? తక్షణ ఉపశమనం కోసం ఇలా చేయండి..
వేడి వేడి కాఫీ, టీ, పిజ్జా లేదా ఘుమఘుమలాడే సూప్స్ చూసినప్పుడు తొందరపడి తినేయడం చాలామందికి అలవాటు. అయితే, ఈ క్రమంలో నాలుక లేదా నోటి లోపలి భాగం కాలడం చాలా సాధారణంగా జరుగుతుంది. నాలుక కాలినప్పుడు మంట పుట్టడమే కాకుండా, ఆ తర్వాత ఏ ఆహారం తినాలన్నా తీవ్రమైన ఇబ్బందిగా మారుతుంది. ఇలాంటి పరిస్థితి ఎదురైనప్పుడు కంగారు పడకుండా ఇంట్లోనే తక్షణ ఉపశమనం పొందేందుకు డెంటిస్టులు కొన్ని సులువైన మార్గాలను సూచిస్తున్నారు.
Updated on: Aug 15, 2026 | 7:52 PM
వేడి వేడి ఆహారం, సూప్లు లేదా కాఫీ తాగేటప్పుడు నాలుక కాలడం సాధారణంగా జరుగుతుంటుంది. ఇలా జరిగిన వెంటనే ఉపశమనం పొందడానికి కొన్ని వంటింటి చిట్కాలు అద్భుతంగా పనిచేస్తాయి. నాలుక కాలిన వెంటనే ముందుగా చల్లటి నీటిని నోట్లో పోసుకుని కాసేపు ఉంచడం లేదా తాగడం చేయాలి. ఇది కాలిన ప్రాంతంలో ఉష్ణోగ్రతను తగ్గించి మంటను, నొప్పిని వెంటనే అదుపు చేస్తుంది.
లేదంటే, సౌకర్యంగా ఉంటే ఒక చిన్న ఐస్ ముక్కను నాలుకపై కాలిన ప్రదేశంలో కొన్ని సెకన్ల పాటు ఉంచుకోవచ్చు. ఇది వాపును తగ్గించడంలో బాగా సహాయపడుతుంది. అయితే, ఆ ఐస్ ముక్కను కొరకడం లేదా నమలడం చేయకూడదు. నాలుకపై కాలిన గాయం పూర్తిగా తగ్గే వరకు తినే ఆహారం విషయంలో కొన్ని జాగ్రత్తలు తీసుకోవడం చాలా అవసరం.
నోరు, నాలిక కాలినప్పుడు అతిగా వేడిగా ఉన్న పదార్థాలు, కారం, నూనె, ఎక్కువ ఉప్పు ఉన్న ఆహారాలను తినకూడదని నిపుణులు చెబుతున్నారు. ఇవి కాలిన గాయంపై చికాకును పెంచుతాయి. కాబట్టి, మంటను తగ్గించే పెరుగు, పుడ్డింగ్ లేదా చల్లటి జ్యూస్ వంటి చాలా మృదువైన ఆహార పదార్థాలను తీసుకోవడం మంచిది.
కాలిన గాయాల వల్ల బాక్టీరియల్ ఇన్ఫెక్షన్లు రాకుండా ఉండటానికి ప్రతిరోజూ క్రమం తప్పకుండా బ్రషింగ్, ఫ్లాసింగ్ చేస్తూ నోటిని శుభ్రంగా ఉంచుకోవాలి. ముఖ్యంగా రాత్రి పడుకునే ముందు నోటిని శుభ్రం చేసుకోవడం మర్చిపోవద్దు. మంట లేదా చికాకు చాలా తీవ్రంగా ఉంటే, నిపుణుల సలహా మేరకు మార్కెట్లో లభించే తేలికపాటి జెల్ లేదా నంబింగ్ క్రీమ్ను ఉపయోగించవచ్చు.
వైద్యుడిని ఎప్పుడు సంప్రదించాలి?: సాధారణంగా చిన్నపాటి కాలిన గాయాలు రెండు మూడు రోజుల్లోనే వాటంతట అవే తగ్గిపోతాయి. కానీ, రోజులు గడుస్తున్నా నొప్పి తగ్గకుండా పెరుగుతున్నా, గాయం ఉన్న చోట ఎరుపు మరియు వాపు ఎక్కువవుతున్నా ఆలస్యం చేయకుండా వెంటనే దంత వైద్యుడిని సంప్రదించి చికిత్స తీసుకోవాలి. చిన్నపాటి జాగ్రత్తలతో ఈ సమస్య నుండి త్వరగా ఉపశమనం పొందవచ్చు.
