వరంగల్ కోర్టు సంచలన తీర్పు.. తొమ్మిది మందిని చంపిన సంజయ్ కి ఉరిశిక్ష

వరంగల్ జిల్లా న్యాయస్థానం సంచలన తీర్పు వెలువరించింది.

  • Balaraju Goud
  • Publish Date - 2:15 pm, Wed, 28 October 20
వరంగల్ కోర్టు సంచలన తీర్పు.. తొమ్మిది మందిని చంపిన సంజయ్ కి ఉరిశిక్ష

వరంగల్ జిల్లా న్యాయస్థానం సంచలన తీర్పు వెలువరించింది. వరంగల్ జిల్లా గొర్రెకుంటలో తొమ్మిదిమందిని జలసమాధి చేసిన మానవ మృగం సంజయ్ కుమార్ యాదవ్ కి ఉరిశిక్ష విధిస్తూ సంచలన తీర్పు వెల్లడి చేశారు జిల్లా సెషెన్స్ జడ్జ్ జయకుమార్. గొర్రెకుంటలో తొమ్మిది మందిని హత్య చేసినట్టుగా నిందితుడు సంజయ్ కుమార్ కోర్టులో ఒప్పుకొన్నాడు. దీనిపై విచారణ జరిపిన వరంగల్ కోర్టు ఇవాళ తీర్పు వెలువరించింది. నిందితుడికి శిక్ష పడటం పట్ల జిల్లా బార్ అసోసియేషన్, స్థానికులు హర్షం వ్యక్తం చేశారు.

వరంగల్: తెలంగాణలో సంచలనం సృష్టించిన తొమ్మిది మంది హత్య కేసులో నిందితుడిపై నేరం రుజువు కావడంతో న్యాయస్థానం కీలక తీర్పు ఇచ్చింది. ఈ ఏడాది మే 20న వరంగల్‌ నగర శివారులోని గొర్రెకుంట బావిలో 9మందిని హత్య చేసిన కేసులో విచారణ పూర్తయింది. పబ్లిక్‌ ప్రాసిక్యూటర్‌ నిందితుడిపై అభియోగాలను నిరూపించడంతో ఉరిశిక్ష ఖరారు చేస్తూ వరంగల్‌ మొదటి అదనపు జిల్లా కోర్టు న్యాయమూర్తి జయకుమార్‌ తీర్పు వెల్లడించారు. నిందితుడిపై 7 సెక్షన్ల కింద కేసు నమోదు చేశారు పోలీసులు. తొమ్మిది మందిని హత్య చేయడాన్నిసీరియస్ గా తీసుకున్న వరంగల్ జిల్లా పోలీసులు.. సంఘటన జరిగిన నెల రోజుల్లోనే ఛార్జ్‌షీట్‌ దాఖలు చేశారు.

దేశ వ్యాప్తంగా సంచలనం సృష్టించిన వరంగల్‌ హత్యలను కాల్‌ డేటా రికార్డింగ్‌ ఆధారంగానే పోలీసులు కేసును ఛేదించారు. వరంగల్ నగర శివారులో గోనె సంచులు తయారు చేసే కేంద్రంలో మక్సూద్‌, అతడి భార్య పనిచేసేవారు. ఈ క్రమంలోనే బిహార్‌కు చెందిన సంజీవ్‌ కుమార్‌ యాదవ్‌కు ఆ కుటుంబంతో పరిచయం ఏర్పడింది. మక్సూద్‌ భార్య నిషా అక్క కూతురు రఫీకా (31)తో పరిచయం ఏర్పడింది. అప్పటికే భర్తతో విడిపోయి ముగ్గురు పిల్లలతో ఒంటరిగా ఉంటున్న రఫీకాకు సంజీవ్‌ దగ్గరయ్యాడు. అనంతరం గీసుకొండ మండలం జాన్‌పాక ప్రాంతంలో రెండు గదుల ఇంటిని కిరాయికి తీసుకుని ఆమెతో సహజీవనం చేశాడు. అయితే, తన కుమార్తెతో కూడా నిందితుడు చనువుగా ఉండడాన్ని రఫీకా గమనించి సంజయ్‌ను మందలించింది. పలుమార్లు అతడితో గొడవ పడింది. తనను పెళ్లి చేసుకుంటానని చెప్పి తన కుమార్తెతో సన్నిహితంగా ఉండడంపై పోలీసులకు ఫిర్యాదు చేస్తామని హెచ్చరించడంతో రఫీకాను అడ్డు తొలగించుకోవాలని నిర్ణయించుకున్నాడు.

పెళ్లి విషయాన్ని పెద్దలతో చెప్పేందుకు వెళ్దామని రఫీకాను మాత్రమే తీసుకుని సంజీవ్‌ యాదవ్‌ మార్చి 6న విశాఖ వైపు వెళ్లే గరీభ్‌ రథ్‌ రైలు ఎక్కాడు. దారిలో మజ్జిగ ప్యాకెట్లలో నిద్రమాత్రలు కలిపి ఆమె అపస్మారక స్థితిలో ఉన్న సమయంలో రైల్లోంచి తోసేశాడు. అనంతరం తిరిగి గీసుకొండ చేరుకున్నాడు. అయితే, తన అక్క కూతురు గురించి మక్సూద్‌ భార్య నిషా నిలదీసింది. ఆమె గురించి పోలీసులకు ఫిర్యాదు చేస్తామని చెప్పింది. దీంతో మక్సూద్‌ కుటుంబాన్ని కూడా హతమార్చాలని టార్గెట్‌ పెట్టుకున్నాడు.

ఇదే క్రమంలో మే 16 నుంచి 20వ తేదీ వరకు రోజూ వారు పనిచేసే గోనె సంచుల తయారీ కేంద్రానికి నిత్యం వచ్చేవాడు. చుట్టు పక్కల ప్రదేశాలను పరిశీలించాడు. మే 20వ తేదీన మక్సూద్‌ మొదటి కుమారుడైన షాబాజ్‌ పుట్టిన రోజు అని తెలుసుకుని ఆ రోజే చంపాలని నిర్ణయించుకున్నాడు. ఇందుకోసం 18వ తేదీన వరంగల్‌ చౌరస్తాలో ఓ మెడికల్‌ షాపులో సుమారు 60 నిద్రమాత్రలు కొనుగోలు చేశాడు. 20వ తేదీ రాత్రి వారితో ముచ్చటించాడు. అనుకూలంగా ఉన్న సమయంలో మక్సూద్‌ కుటుంబం తయారు చేసుకున్న భోజనంలో నిద్రమాత్రలు కలిపాడు. తాను ఇక్కడికి వచ్చిన విషయాన్ని బయటకు చెబుతారన్న ఉద్దేశంతో ఈ కుటుంబానికి సంబంధం లేని శ్యాం, శ్రీరాం తయారు చేసుకున్న భోజనంలోనూ నిద్రమాత్రలు కలిపాడు. వారంతా నిద్రలోకి జారుకున్నాక అర్ధరాత్రి 12.30 గంటల నుంచి ఉదయం 5 గంటల మధ్య వరకు మత్తులో ఉన్న ఎండీ మక్సూద్‌(50), ఆయన భార్య నిషా(45), కుమార్తె బుస్ర (20), బుస్ర కుమారుడు(3), షాబాద్‌(22), సోహైల్‌(20), బిహార్‌కు చెందిన కార్మికులు శ్యామ్‌(22), శ్రీరామ్(20), వరంగల్‌ వాసి షకీల్ ను గోదాము పక్కనే ఉన్న బావిలో పడేసి ఇంటికెళ్లి పోయాడు.

ఈకేసును సవాల్ గా స్వీకరంచిన అప్పటి వరంగల్ పోలీసు కమిషనర్ రవీంద్రనాథ్ మొత్తం ఈ కేసు ఛేదించేందుకు ఆరు బృందాలను ఏర్పాటు చేశారు. గోదాం, గొర్రెకుంట ప్రాంతంలో ఏర్పాటు చేసిన సీసీ కెమెరాల ఫుటేజీలు ఈ కేసులో కీలకంగా మారాయి. వాటిని ఆధారంగా చేసుకుని పోలీసులు దర్యాప్తు చేపట్టారు. ఇంట్లోంచి వెళ్లడం దగ్గర నుంచి మళ్లీ చేరుకునే వరకు అందులో నమోదయ్యాయి. దీంతో నిందితుడిని జాన్‌పాక్‌లోని తన ఇంటిలో అదుపులోకి తీసుకున్నామని అని రవీందర్‌ వెల్లడించారు.

చివరికి సంజయ్ కుమార్ కు ఉరిశిక్ష పడటం పట్ల స్థానికులు సంతోషం వ్యక్తం చేశారు. పోలీసులు, లాయర్లు పరస్పరం స్వీట్స్ పంచుకుని సంబురాలు జరుపుకున్నారు.