బ్రేకింగ్: పట్టాలు తప్పిన ఎల్‌టీటీ ఎక్స్‌ప్రెస్.. 50 మందికి గాయాలు!

ఒడిశాలో రైలు ప్రమాదం చోటు చేసుకుంది. ముంబై నుంచి భువనేశ్వర్ వెళ్తున్న లోకమాన్య తిలక్ టెర్మినస్(ఎల్‌టీటీ) ఎక్స్‌ప్రెస్ నెర్‌గుండి రైల్వే స్టేషన్ సమీపంలో పట్టాలు తప్పింది. ఉదయం సుమారు 7 గంటల సమయంలో ఈ ఘటన జరిగినట్లు తెలుస్తోంది. పొగ మంచు కారణంగా ఆగి ఉన్న గూడ్స్ ట్రైన్‌ వ్యాన్‌ను ఢీ కొట్టడంతో ఎల్టీటీ ఎక్స్‌ప్రెస్ 6 బోగీలు పట్టాలు తప్పినట్లు అధికారులు చెబుతున్నారు.

ఈ ఘటనలో 50 మందికి గాయాలు కాగా.. ఐదుగురి పరిస్థితి విషమంగా ఉన్నట్లు సమాచారం. క్షతగాత్రులను చికిత్స నిమిత్తం కటక్‌లోని ఎస్‌సీబీ మెడికల్ ఆసుపత్రికి తరలించారు. ఇక ఈ ప్రమాదం గురించి సమాచారం అందుకున్న రైల్వే సిబ్బంది వెంటనే ఘటనాస్థలానికి చేరుకొని సహాయక చర్యలు చేపట్టారు. కాగా, ట్రైన్ వేగంగా రాకపోవడంతో పెను ప్రమాదం తప్పిందని అధికారులు చెబుతున్నారు.