ఆస్ట్రేలియా – ఇండియా టెస్ట్ సిరీస్… ఆ ఆటగాడిపై విపరీతమైన ట్రోల్స్… ఎందుకో తెలుసా…

టీమిండియా యువ ఓపెనర్ పృథ్వీ షా వైఫల్యాల బాట ఆస్ట్రేలియా గడ్డపైనా కొనసాగుతోంది. అడిలైడ్ వేదికగా డిసెంబర్ 17న ప్రారంభమైన డే/నైట్ టెస్టులో తొలి ఓవర్‌లోనే నిర్లక్ష్యపు షాట్‌తో పృథ్వీ షా (0: 2 బంతుల్లో) వికెట్ చేజార్చున్నాడు. మ్యాచ్‌లో టాస్ గెలిచిన విరాట్ కోహ్లీ బ్యాటింగ్ ఎంచుకోగా.. మయాంక్ అగర్వాల్‌తో కలిసి భారత్ ఇన్నింగ్స్‌ని ప్రారంభించిన పృథ్వీ షా డకౌట్‌గా వెనుదిరగడంపై నెటిజన్లు సెటైర్లు పేలుస్తున్నారు. ఫామ్‌లో ఉన్న శుభమన్ గిల్‌ని పక్కనపెట్టి.. తొలి టెస్టుకి పృథ్వీ షాని ఎంపిక చేయడంపై పెద్ద ఎత్తున విమర్శలు వచ్చిన విషయం తెలిసిందే.

వికెట్ ఇలా…

మిచెల్ స్టార్క్ తొలి ఓవర్‌లోనే రెండో బంతిని గుడ్ లెంగ్త్ రూపంలో ఆఫ్ స్టంప్‌కి వెలుపలగా సంధించాడు. ఆ బంతిని ఏమాత్రం పాదాల కదలిక లేకుండా కవర్స్ దిశగా హిట్ చేసేందుకు పృథ్వీ షా ప్రయత్నించాడు. దాంతో.. ఎడ్జ్ తాకిన బంతి నేరుగా వచ్చి మిడిల్ స్టంప్‌ని గీరాటేసింది. ఆఖరి క్షణంలో తన తప్పుని గ్రహించి పాదం కదిపినా.. పాదం గాల్లో ఉండగానే బెయిల్స్‌ గాల్లోకి లేచాయి. దాంతో స్కోరు బోర్డుపై ఒక్క పరుగు కూడా చేరకుండానే టీమిండియా వికెట్ చేజార్చుకుంది.

పూర్ ఫామ్ కంటిన్యూ….

వాస్తవానికి గత కొన్ని రోజుల నుంచి పృథ్వీ షా పేలవ ఫామ్‌తో నిరాశపరుస్తున్నాడు. ఎంతలా అంటే..? తొలి టెస్టుకి ముందు చివరి 10 ఇన్నింగ్స్‌ల్లో అతను చేసిన పరుగులు 0, 0, 7, 10, 9, 0, 0, 19, 40, 3 మాత్రమే.. దాంతో ఓపెనర్ శుభమన్ గిల్‌కి అవకాశమివ్వాలని అందరూ సూచించారు. కానీ.. టీమిండియా మేనేజ్‌మెంట్ మాత్రం పృథ్వీ షాకే తొలి టెస్టులో ఛాన్స్ ఇచ్చింది. అయితే.. తొలి ఇన్నింగ్స్‌లో అతను డకౌట్ అవడం ద్వారా మరోసారి అందర్నీ నిరాశపరిచాడు.

2018లో వెస్టిండీస్‌తో జరిగిన టెస్టు మ్యాచ్‌తో అంతర్జాతీయ క్రికెట్‌లోకి ఎంట్రీ ఇచ్చిన పృథ్వీ షా.. తొలి మ్యాచ్‌లోనే సెంచరీతో ఆకట్టుకున్నాడు. అతని ఆటతీరుని చూసిన మాజీ క్రికెటర్లు.. జూనియర్ సచిన్ అంటూ కితాబిచ్చారు. కానీ.. ఆ అంచనాల్ని అందుకోవడంలో పృథ్వీ షా తేలిపోతున్నాడు.