ప్రపంచకప్ నిర్వహణపై వచ్చే నెలలో నిర్ణయం

కరోనా వైరస్ క్రికెట్ తీవ్ర ప్రభావాన్ని చూపుతోంది. ప్రపంచకప్ నిర్వహణపై మరో సమావేశంలో నిర్ణయం తీసుకోవాలని తీర్మానం చేసింది ఐసీసీ. ఈ ఏడాది ఆస్ట్రేలియా వేదికగా జరుగాల్సిన టీ20 ప్రపంచకప్ భవితవ్యాన్ని వచ్చేనెలలో నిర్ణయం తీసుకోవాలని అంతర్జాతీయ క్రికెట్ మండలి నిర్ణయించుకుంది. బుధవారం వీడియో కాన్ఫరెన్స్ ద్వారా బోర్డు సమావేశాన్ని నిర్వహించిన ఐసీసీ.. ప్రపంచకప్​పై తుది నిర్ణయాన్ని జూలైలో తీసుకోవాలని భావిస్తున్నారు. కరోనా వైరస్ విజృంభణ నేపథ్యంలో అక్టోబర్​ 18 నుంచి నవంబర్​ 15వ తేదీ వరకు ఆస్ట్రేలియాలో జరుగాల్సిన టోర్నీ తీవ్ర సందిగ్ధంలో పడింది. జూన్​లో ఈ విషయంపై నిర్ణయం తీసుకుంటామని గత నెల చెప్పిన ఐసీసీ.. మరింత కాలం వేచిచూస్తామని మరోసారి వెల్లడించింది. ప్రపంచకప్ నిర్వహణకు అనుకూలమైన వాతావరణం కోసం ఎదురుచూస్తున్నామని.. సభ్య దేశాలు, బ్రాడ్​కాస్టర్లు, భాగస్వాములు, ప్రభుత్వాలు, ఆటగాళ్లతో సంప్రదింపులు జరుపుతున్నామని.. త్వరలో సరైన నిర్ణయం తీసుకుంటామని బోర్డు సమావేశం అనంతరం ఐసీసీ ఓ ప్రకటన విడుదల చేసింది.