Video: ఫిఫా వరల్డ్ కప్‌లో విచిత్రం.. నోరు మూసుకున్నందుకు రెడ్ కార్డ్.. పరాగ్వే ఆటగాడి షాకింగ్ రికార్డ్..!

Paraguay vs Turkiye, Miguel Almiron Red Card: ఫుట్‌బాల్ ప్రపంచకప్ చరిత్రలోనే ఎన్నడూ చూడని ఒక విచిత్రమైన సంఘటన అభిమానులను విస్మయానికి గురిచేసింది. మైదానంలో నోటికి చేయి అడ్డుపెట్టుకుని మాట్లాడడమే ఓ ఆటగాడి కొంపముంచింది. ఫిఫా తీసుకొచ్చిన సరికొత్త నిబంధనల కారణంగా పరాగ్వే స్టార్ ప్లేయర్ రెడ్ కార్డ్ అందుకుని మైదానం వీడాల్సి వచ్చింది. అదే మ్యాచ్‌లో పరాగ్వే మరో అద్భుతమైన రికార్డును కూడా సృష్టించింది.

నోరు మూసుకుంటే రెడ్ కార్డా? అసలేం జరిగిందంటే..

సాధారణంగా ఫుట్‌బాల్ మ్యాచ్‌లలో ఆటగాళ్లు ప్రత్యర్థి జట్టు వ్యూహాలు దెబ్బతీయడానికో, లేదా తమలో తాము రహస్యాలు మాట్లాడుకోవడానికో నోటికి చేతులు అడ్డుపెట్టుకోవడం మనం చూస్తూనే ఉంటాం. అయితే, ఈసారి ఫిఫా కఠినమైన నూతన నిబంధనలను తెరపైకి తెచ్చింది. మైదానంలో పారదర్శకతను పెంచేందుకు, స్లెడ్జింగ్ లేదా అనుచిత వ్యాఖ్యలను అడ్డుకునేందుకు నోరు మూసుకుని మాట్లాడటాన్ని నిషేధించింది.

తుర్కియేతో జరిగిన హోరాహోరీ పోరులో పరాగ్వే ఆటగాడు మిగెల్ అల్మిరన్ ఈ నిబంధనను ఉల్లంఘించాడు. ప్రత్యర్థి ఆటగాడితో నోటికి చేయి అడ్డుపెట్టుకుని ఏదో మాట్లాడటం రిఫరీ కంట పడింది. అంతే, క్షణం కూడా ఆలస్యం చేయకుండా రిఫరీ అతడికి నేరుగా రెడ్ కార్డ్ చూపించి షాక్ ఇచ్చాడు. దీంతో తీవ్ర నిరాశతో అల్మిరన్ మైదానాన్ని వీడాల్సి వచ్చింది. ఫిఫా ప్రపంచకప్ చరిత్రలో ఈ వింత నిబంధన కింద రెడ్ కార్డ్ అందుకున్న మొట్టమొదటి ఆటగాడిగా అల్మిరన్ ఒక అవాంఛిత రికార్డును తన పేరిట లిఖించుకున్నాడు. ప్రస్తుత టోర్నీలో నమోదైన నాలుగో రెడ్ కార్డ్ ఇది కావడం గమనార్హం.

అల్మిరన్ వీడియో మీకోసం..

Red card for Paraguay… At the world cup, against Turkey.

They destroyed a whole country’s chances to advance.. for speech. Yes you heard that right. Almiron covered his mouth, and got a red card. We’ve been swearing on the football field for 100years and now the politics have… pic.twitter.com/kRsyb35xv0

— Freaky Mickey (@SirDogTurd) June 20, 2026

ఒక్క మ్యాచ్.. రెండు భిన్నమైన రికార్డులు!

ఒకవైపు అల్మిరన్ చెత్త రికార్డుతో వార్తల్లో నిలిస్తే, మరోవైపు అదే జట్టుకు చెందిన మతియస్ గాలర్జా సరికొత్త చరిత్ర సృష్టించాడు. మ్యాచ్ ప్రారంభమైన క్షణాల్లోనే పరాగ్వే అభిమానులను ఉర్రూతలూగించాడు. ఆట మొదలైన కేవలం 64వ సెకనులోనే గాలర్జా మెరుపు వేగంతో అద్భుతమైన గోల్ సాధించాడు.

ఈ ప్రపంచకప్‌లోనే అత్యంత వేగవంతమైన గోల్‌గా ఇది సరికొత్త రికార్డు సృష్టించింది. అంతకుముందు మొరాకో ఆటగాడు మ్యాచ్ ప్రారంభమైన ఏడో నిమిషంలో సాధించిన గోల్ రికార్డును గాలర్జా కేవలం సెకన్ల వ్యవధిలోనే బద్దలు కొట్టాడు. ఈ అసాధారణ ప్రదర్శనకు గానూ అతడికి ‘ప్లేయర్ ఆఫ్ ది మ్యాచ్’ అవార్డు దక్కింది.

నాకౌట్ రేసులో పరాగ్వే దూకుడు..

ఈ మ్యాచ్‌లో పరాగ్వే జట్టు అద్భుత పోరాట పటిమను కనబరిచింది. ఒక ఆటగాడు రెడ్ కార్డ్ ద్వారా వెళ్ళిపోయినా, పట్టుదలతో ఆడి తుర్కియేపై 1-0 తేడాతో ఘన విజయం సాధించింది. గాలర్జా కొట్టిన ఆ ఒక్క గోల్ జట్టుకు కొండంత బలాన్ని ఇచ్చింది. ఈ విజయంతో గ్రూప్-డి నుండి పరాగ్వే నాకౌట్ బెర్తు రేసులో బలంగా నిలిచింది.

మరిన్ని క్రీడా వార్తల కోసం ఇక్కడ క్లిక్ చేయండి..