అమెరికా శునకమా ? మజాకా ?

ఆ మధ్య ఐసిస్ ఉగ్రవాది అబూ బకర్ అల్-బాగ్దాదీ ని సిరియాలో సొరంగంలోకి వెంటాడి.. అతడ్ని మట్టుబెట్టడానికి అమెరికా పోలీసులకు సహకరించిన శునకం గుర్తుందా ? సైనిక శిక్షణ పొందిన దాన్ని అమెరికా అధ్యక్షుడు ట్రంప్ అభినందించి మెడల్ కూడా బహుకరించారు. దాని సాహసాన్ని మెచ్చుకుంటూ ఫొటోతో కూడిన ట్వీట్ చేశారు. ఇప్పుడు అలాంటిదే మరో శునకం ‘ కథ ‘ కూడా తెలిసింది. దీనిపేరు ‘ డ్యూక్ ‘. వయస్సు 7 సంవత్సరాలు. బెల్జియన్ మాలినోయిస్ జాతికి చెందిన ఈ జాగిలం.. క్రిమినల్స్ ని పట్టుకోవడంలో పోలీసులకు తన ‘ సహకారం ‘ ఎంతగానో అందిస్తోంది. తన భార్యను హతమార్చుతానంటూ బెదిరిస్తున్న వాస్ క్వెజ్ అనే నేరగాణ్ణి పోలీసులు పట్టుకోవడంలో డ్యూక్ సాహసోపేతమైన పనే చేసింది. పోలీసుల కళ్ళు గప్పి వాస్ క్వెజ్ పారిపోతుండగా అతడ్ని వారు వెంటాడారు.

తమతో బాటు ఈ కుక్కను కూడా వారు తీసుకువెళ్లారు. నిందితుడు ప్రయాణిస్తున్న ట్రక్కును ఆపేందుకు పోలీసులు ఆ వాహనంపైకి రబ్బర్ బులెట్లను ప్రయోగించారు. ఈ కాల్పుల్లో అతని వాహనం విండో స్క్రీన్ దెబ్బతినగా ఒకచోట వాహనాన్ని ఆపేశాడు. విండో స్క్రీన్ పగిలిపోయి.. రంధ్రం ఏర్పడగా మన ‘ గురుడి ‘ ముఖం ఎంచక్కా బయటపడింది.

అంతే.. పోలీసు వాహనంలో ఉన్న ‘ డ్యూక్ ‘ ఒక్కసారిగా దూసుకుపోయి.. బద్దలైన ఆ విండో నుంచే అతనిమీద పడింది. వాస్ క్వెజ్ తప్పించుకోవడానికి వీల్లేకపోగా.. డ్యూక్ అతడ్ని వదలలేదు. ఈ శునకం పుణ్యమా అని.. ఈ నిందితుడు సులభంగా పోలీసులకు పట్టుబడ్డాడు. అతడ్ని అరెస్టు చేసి వాళ్ళు కటకటాల వెనక్కి నెట్టారు. డ్యూక్ సాహసం చూడాలంటే ఈ వీడియో చూడాల్సిందే..