Lung Health: ఊపిరితిత్తుల ఆరోగ్యాన్ని కాపాడుకోవడానికి ఇలా చేయండి..!
ఈ రోజుల్లో చాలా మందికి ఊపిరితిత్తుల సమస్యలు ఎక్కువవుతున్నాయి. దీనికి ముఖ్యమైన కారణాలు పొగతాగడం, కాలుష్యం, ఆరోగ్యకరమైన జీవనశైలికి దూరం కావడం. అయితే కొన్ని సహజమైన మార్గాలను అనుసరిస్తే ఊపిరితిత్తులను బలంగా ఉంచుకోవచ్చు. ఈ చిట్కాలు పాటిస్తే శ్వాస సంబంధిత సమస్యలు దూరం అవుతాయి.
ఈ రోజుల్లో ఊపిరితిత్తుల సమస్యలు సాధారణంగా కనిపిస్తున్నాయి. ముఖ్యంగా నగరాల్లో వాయు కాలుష్యం పెరగడం, పొగతాగడం, జీవిత విధానంలో మార్పులు కారణంగా శ్వాసకోశాలకు సంబంధించి అనేక రకాల ఇబ్బందులు ఎదురవుతున్నాయి. శ్వాస తీసుకోవడం కష్టమవడం, నిండుగా ఊపిరి పీల్చలేకపోవడం వంటి సమస్యలు ఊపిరితిత్తుల పనితీరు తగ్గినప్పుడు జరుగుతుంటాయి. ఈ పరిస్థితుల్లో సహజమైన మార్గాలను అనుసరించడం వల్ల ఊపిరితిత్తులను ఆరోగ్యంగా ఉంచుకోవచ్చు. ఆ మార్గాల గురించి ఇప్పుడు తెలుసుకుందాం.
పొగతాగడం ఊపిరితిత్తుల ఆరోగ్యానికి అస్సలు మంచిది కాదు. సిగరెట్, బీడి వంటివి ఊపిరితిత్తుల్లో హానికర రసాయనాలను చేరుస్తాయి. దీని వల్ల శ్వాసనాళాలు నెమ్మదిగా నాశనమవుతాయి. పొగతాగడాన్ని మానేయడం వల్ల ఊపిరితిత్తుల పునరుద్ధరణకు అవకాశం కలుగుతుంది. అలాగే అధిక కాలుష్యం ఉన్న ప్రాంతాల్లో ఎక్కువ సమయం గడపకుండా జాగ్రత్తలు తీసుకోవాలి.
ప్రకృతిలో గడిపే సమయం శరీరానికే కాదు ఊపిరితిత్తులకు కూడా ఎంతో మేలు చేస్తుంది. పచ్చటి ప్రకృతి, స్వచ్ఛమైన గాలి ఊపిరితిత్తులకు సహజమైన ఉపశమనం కలిగిస్తాయి. హిల్ స్టేషన్లు, అడవులు, ఉద్యానవనాల్లో కొంత సమయం గడిపితే శ్వాసనాళాల పనితీరు మెరుగవుతుంది. గాలిలో ఉండే కాలుష్య కణాల నుంచి దూరంగా ఉండే అవకాశం లభిస్తుంది.
శ్వాసకోశాన్ని బలంగా ఉంచేందుకు సహజమైన మూలికలు ఎంతో ఉపయోగపడతాయి. ముఖ్యంగా తులసి, అతిమధురం, వాము వంటి మూలికలు శరీరాన్ని డీటాక్స్ చేయడంలో సహాయపడతాయి. ఇవి శ్వాస సంబంధిత ఇన్ఫెక్షన్లను తగ్గించి ఊపిరితిత్తులను శుభ్రంగా ఉంచుతాయి. తులసి కషాయం లేదా అతిమధురం టీ తీసుకోవడం మంచి ఫలితాలను ఇస్తుంది.
ప్రతిరోజూ వ్యాయామం చేయడం వల్ల శరీరంలో ఆక్సిజన్ సరఫరా మెరుగవుతుంది. నడక, ప్రాణాయామం, బ్రీతింగ్ ఎక్సర్సైజులు ఊపిరితిత్తుల సామర్థ్యాన్ని పెంచుతాయి. ఇవి ఊపిరితిత్తుల్లోకి గాలి ప్రవేశాన్ని సులభతరం చేస్తాయి. నిత్యం వ్యాయామం చేయడం వల్ల ఊపిరితిత్తులు సమర్థవంతంగా పనిచేస్తూ శ్వాస సంబంధిత వ్యాధులకు వ్యతిరేకంగా రక్షణ కలిగిస్తాయి.
శరీరం హైడ్రేటెడ్గా ఉండేలా చూసుకోవడం వల్ల ఊపిరితిత్తుల పనితీరు మెరుగవుతుంది. నీరు తాగడం వల్ల శ్వాసనాళాల్లో ఉండే మ్యూకస్ (Mucus) క్లీన్ అవుతుంది. దీని ద్వారా ఊపిరితిత్తులలో పేరుకుపోయే ధూళి, కాలుష్యాన్ని బయటకు పంపించడం సులభమవుతుంది. రోజుకి కనీసం 3-5 లీటర్ల నీరు తాగడం మంచిది.
ఆరోగ్యకరమైన ఆహారం శరీరానికి మాత్రమే కాదు ఊపిరితిత్తులకు కూడా అవసరం. ఆకుకూరలు, పసుపు, అల్లం వంటి వాటిలో యాంటీ ఆక్సిడెంట్లు, యాంటీ ఇంఫ్లమేటరీ గుణాలు ఉంటాయి. ఇవి శరీరంలోని ఇన్ఫెక్షన్లను తగ్గించడంతో పాటు ఊపిరితిత్తులను రక్షిస్తాయి. రోజువారీ ఆహారంలో ఈ పదార్థాలను చేర్చుకోవాలి.
వేడి ఆవిరిని శ్వాస తీసుకోవడం వల్ల శ్వాసనాళాలు తెరుచుకొని లోపల పేరుకుపోయిన మలినాలు బయటకు వస్తాయి. ఇది ఊపిరితిత్తుల శుభ్రతకు దోహదపడుతుంది. ఈ ప్రక్రియలో నీలగిరి నూనె లేదా తులసి ఆకు నీటిని వేసుకోవచ్చు. ఇది దగ్గు, మ్యూకస్ను తగ్గించడంలో సహాయపడుతుంది.
లోతైన శ్వాస వ్యాయామాలు ఊపిరితిత్తుల సామర్థ్యాన్ని పెంచడంలో ఎంతో కీలకం. రోజు ఉదయం లేదా సాయంత్రం పది నిమిషాల పాటు దీన్ని సాధన చేస్తే శ్వాస సంబంధిత సమస్యలు తగ్గుతాయి. శ్వాస తీసుకోవడంలో ఉండే ఇబ్బందులు, ఉబ్బసం వంటి సమస్యలు కూడా అదుపులోకి వస్తాయి.
ఈ చిట్కాలను అనుసరించడం ద్వారా ఊపిరితిత్తులను సహజంగా కాపాడుకోవచ్చు. ఇలాంటి సాధారణ మార్గాలే దీర్ఘకాలిక ఆరోగ్యానికి బలమైన బాట వేస్తాయి. శ్వాసకోశ ఆరోగ్యం మెరుగవడం వల్ల మొత్తం శరీరం పుష్టిగా మారుతుంది.
(NOTE: ఇందులోని అంశాలు కేవలం అవగాహన కోసం మాత్రమే. నిపుణులు అందించిన సమాచారం ప్రకారం ఇక్కడ తెలియజేయడమైనది. ఆరోగ్యరీత్యా ఎలాంటి సమస్యలు ఉన్నానేరుగా వైద్య నిపుణులను సంప్రదించడం మంచిది)