ఫ్యామిలీ మెంబర్స్ హెల్త్ సరిగ్గా ఉండట్లేదా? ఈ పనులు చేశారా లేదా గుర్తుచేసుకోండి

మనం నివసించే ఇల్లు అద్దంలా మెరిసిపోవాలని రకరకాల జాగ్రత్తలు తీసుకుంటాం. కానీ, ఇంటి పైకప్పు మీద ఉండే వాటర్ ట్యాంక్ క్లీనింగ్ విషయంలో మాత్రం చాలామంది నిర్లక్ష్యం ప్రదర్శిస్తారు. నెలల తరబడి ట్యాంకును శుభ్రం చేయకపోవడం వల్ల అందులో నాచు, పూడిక, ప్రమాదకరమైన బ్యాక్టీరియా చేరుతాయి. అటువంటి కలుషిత నీటిని వాడటం వల్ల చర్మ వ్యాధులు, జీర్ణకోశ సమస్యలు రావడం ఖాయం. నీరు రంగు మారే వరకు లేదా వాసన వచ్చే వరకు వేచి చూడకుండా, ఇంట్లోనే సులభంగా వాటర్ ట్యాంకును ఎలా శుభ్రం చేసుకోవాలో తెలుసుకుందాం.

ట్యాంకును ఖాళీ చేయడం

శుభ్రం చేసే ముందు ట్యాంకులోని నీటిని పూర్తిగా ఖాళీ చేయాలి. అడుగున మిగిలిన కొద్దిపాటి నీటిని కూడా ఒక చిన్న కప్పు సాయంతో బయటకు తీసేయాలి. అప్పుడే లోపల పేరుకుపోయిన మట్టి, ఒండ్రు ఎంత ఉందో మనకు స్పష్టంగా కనిపిస్తుంది. ట్యాంకు లోపలికి దిగేటప్పుడు నాచు వల్ల కాలు జారే ప్రమాదం ఉంది కాబట్టి చాలా జాగ్రత్తగా ఉండాలి. గోడలకు అంటుకున్న జిగట నాచును తొలగించడానికి గట్టిగా ఉండే బ్రష్‌ను వాడాలి.

పొడవాటి హ్యాండిల్ ఉన్న బ్రష్ వాడటం వల్ల వంగాల్సిన అవసరం లేకుండా లోపలి మూలలను కూడా శుభ్రం చేయవచ్చు. ట్యాంక్ అంచులు, మూలల్లో మురికి ఎక్కువగా చేరుతుంది కాబట్టి అక్కడ కొంచెం ఎక్కువ ఒత్తిడి పెట్టి రుద్దాలి. చేతికి అందని లోతైన ప్రాంతాల కోసం బ్రష్‌ను ఒక కర్రకు కట్టి వాడటం ఒక మంచి ఉపాయం.

క్రిమిసంహారక చికిత్స

కేవలం బ్రష్‌తో రుద్దడం వల్ల మురికి పోతుంది కానీ బ్యాక్టీరియా చనిపోదు. నీరు 100 శాతం సురక్షితంగా ఉండాలంటే కొన్ని రసాయనాలు వాడాలి. ఒక బకెట్ నీటిలో కొద్దిగా స్పటిక పొడిని కలిపి, ఆ నీటితో ట్యాంక్ గోడలను రుద్దాలి. ఇది హానికర బ్యాక్టీరియాను నాశనం చేస్తుంది. ఆ తర్వాత బ్లీచింగ్ పౌడర్ కలిపిన నీటిని గోడలపై చల్లి ఒక 15 నిమిషాల పాటు అలాగే వదిలేయాలి. ఆ తర్వాత స్వచ్ఛమైన నీటితో ట్యాంకును పూర్తిగా కడిగేయాలి. కుటుంబ సభ్యులు ఆరోగ్యంగా ఉండాలంటే కనీసం ఒకటి నుండి మూడు నెలలకు ఒకసారి తప్పనిసరిగా ట్యాంక్ క్లీన్ చేయాలి. ట్యాంకుపై నాణ్యమైన మూత ఉండేలా చూసుకోవాలి. గాలి, వెలుతురు లోపలికి వెళ్లకపోతే నాచు పెరగడం చాలా వరకు తగ్గుతుంది.