ఫ్లైట్ ఎక్కాలంటే భయమా? ఇలా చేస్తే గాల్లో ట్రావెల్ ఎంజాయ్ చేసేయొచ్చు

చాలామంది విమానం మధ్యలో భయం పెరిగినప్పుడు దానిని అదుపు చేయడానికి ప్రయత్నిస్తారు. కానీ అప్పటికే నాడీ వ్యవస్థ అత్యుత్తమ స్థాయి ఒత్తిడికి లోనవుతుంది. కాబట్టి ఆందోళన మొదలవ్వకముందే మనల్ని మనం నియంత్రించుకోవాలి. దీనికోసం ‘ఎక్స్టెండెడ్ ఎక్స్‌హేల్ బ్రీతింగ్’ అద్భుతంగా పనిచేస్తుంది. అంటే శ్వాస పీల్చుకునే దానికంటే, వదిలే సమయం ఎక్కువగా ఉండాలి. ఇలా చేయడం వల్ల మన నాడీ వ్యవస్థ ప్రశాంత స్థితికి చేరుకుంటుంది. ఇది కేవలం ట్రిక్ కాదు, ఒక శాస్త్రీయ ప్రక్రియ.

శారీరక స్పందనలను..

భయాన్ని ఎదుర్కోవడానికి ప్రయత్నించడం వల్ల ఆందోళన మరింత పెరుగుతుంది. గుండె వేగంగా కొట్టుకోవడం, చెమటలు పట్టడం వంటివి శరీరంలో విడుదలయ్యే అడ్రినలిన్ వల్ల జరుగుతాయని గుర్తించండి. “ఇది కేవలం అడ్రినలిన్, ఇది త్వరలోనే తగ్గిపోతుంది” అని మీ శరీరానికి చెప్పండి.

దీనిని ఫిక్స్ చేయడానికి ప్రయత్నించకుండా, అది సహజంగానే తగ్గుతుందని నమ్మండి. అలాగే, ప్రయాణంలో మీ మెదడును మళ్లించడానికి ఒక పాటల ప్లేలిస్ట్, మంచి సువాసన వచ్చే వస్తువు లేదా ఏదైనా స్పర్శకు సంబంధించిన వస్తువును దగ్గర ఉంచుకోవడం ద్వారా మీ మెదడును ప్రశాంతంగా ఉంచవచ్చు.

అలవాటుగా మార్చుకోవద్దు..

చాలామంది భయపడుతూనే ప్రయాణం పూర్తి చేస్తారు. దీనివల్ల “ప్రయాణం ప్రమాదకరం, నేను బతికి బయటపడ్డాను” అని మీ మెదడు పొరపాటుగా ఫీడ్ అవుతుంది. దీనికి బదులుగా, అసౌకర్యంగా ఉన్నా, ఆ ప్రయాణం ముగిశాక “నేను సురక్షితంగానే ఉన్నాను” అని గమనించడం అలవాటు చేసుకోవాలి. ఇలా చేయడం ద్వారా నాడీ వ్యవస్థకు భద్రత పట్ల అవగాహన పెరుగుతుంది. థెరపీ, క్రమం తప్పని సెల్ఫ్-రెగ్యులేషన్ పద్ధతుల ద్వారా విమాన ప్రయాణ భయాన్ని పూర్తిగా జయించవచ్చు. మీ ప్రయాణాలను ఆనందదాయకంగా మార్చుకోండి.