విశాల్ సినిమా ఆగిపోవడానికి అసలు కారణం ఇదే.!

విశాల్ హీరోగా తెరకెక్కిన తాజా చిత్రం ‘అయోగ్య’. తెలుగు ‘టెంపర్’కు ఇది రీమేక్. ఇకపోతే ఈ సినిమా అనుకున్న ప్రకారం శుక్రవారం మే 10న విడుదల కావాల్సి ఉంది. దానికి తగ్గట్టు అడ్వాన్స్ బుకింగ్ కూడా జరిగాయి. అయితే ఏమి జరిగిందో తెలియదు గానీ లాస్ట్ మినిట్‌లో రిలీజ్ ఆగిపోయింది. అంతేకాదు ఆ రోజు రిలీజ్ కావాల్సిన మరో మూడు సినిమాలకు కూడా ఇదే ఇబ్బంది వచ్చిందట.

ఇది ఇలా ఉంటే తమిళంలో ఏ సినిమా రిలీజ్ అవ్వాలన్న నిర్మాతల మండలి నుంచి నో అబ్జెక్షన్ సర్టిఫికెట్ తప్పనిసరి. అయితే కొందరు ఫిలిం మేకర్స్ ఈ నిబంధనను పాటించట్లేదట. కానీ విశాల్ సినిమాకు మాత్రం ఆల్రెడీ NOC వచ్చేసిందని తెలుస్తోంది.  దీంతో ఈ సినిమాకు ఫైనాన్స్ సమస్యల కారణంగానే రిలీజ్ ఇబ్బందులు తలెత్తాయని కొందరు అంటున్నారు. ఎట్టికేలకు ఈ విషయం పై స్పందించిన విశాల్ తన ట్విట్టర్ ద్వారా ఒక ఎమోషనల్ ట్వీట్ చేశాడు.

“నేను ఎప్పటికీ వదిలి పెట్టను. అయోగ్య నాకు ఒక ప్రత్యేకమైన సినిమా. ఇది ఒక సామాజిక సమస్య మీద తెరకెక్కించిన చిత్రం. #రేప్ కు మరణ శిక్ష కాన్సెప్ట్ తో సినిమాను తీయడం నాకో గొప్ప అవకాశం.  నేను ఈ సినిమాను చేసినందుకు గర్విస్తున్నాను.  ఈ సినిమా తప్పనిసరిగా వస్తుంది.” అంటూ ట్వీట్ చేశాడు. మరోవైపు ఈ సినిమాకి ఫైనాన్స్ సమస్యలే కారణమని.. నిర్మాతలకు, డిస్ట్రిబ్యూటర్లకు మధ్య చర్చలు జరుగుతున్నాయని.. అవి  కొలిక్కి రాగానే సినిమా విడుదలవుతుందని కోలీవుడ్ మీడియా సమాచారం.