Tollywood: శర్వానంద్ గట్టెక్కారు.. మిగిలిన హీరోల పరిస్థితి ఏంటి? హిట్‌ కోసం ఏళ్ల తరబడి నిరీక్షణ!

తాజాగా ఒక సీనియర్ యంగ్ హీరో సంక్రాంతి బరిలో నిలిచి ఎట్టకేలకు గట్టెక్కారని ట్రేడ్ వర్గాల్లో టాక్ వినిపిస్తోంది. దాదాపు తొమ్మిదేళ్ల నిరీక్షణ తర్వాత ఆయన ఖాతాలో ఒక మంచి విజయం చేరింది. అయితే ఈయన దారిలోనే సక్సెస్ కోసం పరితపిస్తున్న మరికొందరు స్టార్ హీరోల పరిస్థితి మాత్రం ఆందోళనకరంగానే ఉంది. పుష్కర కాలంగా విజయం లేని హీరోలు కొందరైతే, అరడజను ఫ్లాపులతో సతమతమవుతున్న వారు మరికొందరు. ఇంతకీ ఆ హీరోలు ఎవరు?

శర్వానంద్ సక్సెస్..

టాలీవుడ్‌లో నోటెడ్ హీరోలందరిలోనూ శర్వానంద్ ఇప్పుడు కాస్త ఊపిరి పీల్చుకున్నారని చెప్పాలి. ఆయన నటించిన ‘నారీ నారీ నడుమ మురారి’ సినిమా ప్రేక్షకులను నవ్విస్తూ బాక్సాఫీస్ వద్ద మంచి వసూళ్లను రాబడుతోంది. నిజానికి ‘శతమానంభవతి’ వంటి భారీ హిట్ తర్వాత శర్వాకు ఆ స్థాయి సక్సెస్ దరిచేరలేదు. అంటే దాదాపు తొమ్మిదేళ్ల నుంచి ఆయన ఒక సాలిడ్ హిట్ కోసం ఎదురుచూశారు. ఇప్పుడు ఈ సినిమాతో ఆయన మళ్ళీ ఫామ్ లోకి వచ్చారని ట్రేడ్ పండితులు విశ్లేషిస్తున్నారు.

సుదీర్ఘ నిరీక్షణ..

శర్వా గట్టెక్కినా రవితేజ, గోపీచంద్ వంటి సీనియర్ హీరోలకు మాత్రం కష్టాలు తప్పడం లేదు. మాస్ మహారాజా రవితేజకు 2022లో ‘ధమాకా’ రూపంలో ఒక బంపర్ హిట్ లభించింది. ఆ తర్వాత చిరంజీవితో కలిసి నటించిన సినిమాలో కూడా మెరిశారు. కానీ అప్పటి నుంచి ఇప్పటి వరకు ఆరు సినిమాలు వరుసగా నిరాశపరిచాయి. ఇప్పుడు ఆయన తన ఆశలన్నీ ‘ఇరుముడి’ సినిమాపైనే పెట్టుకున్నారు. ఇక గోపీచంద్ పరిస్థితి మరీ ఘోరంగా ఉంది. 2014లో వచ్చిన ‘లౌక్యం’ తర్వాత ఆయనకు ఇప్పటి వరకు సరైన సక్సెస్ లేదు. అంటే దాదాపు 12 ఏళ్లుగా ఆయన హిట్ కోసం తపిస్తున్నారు. ప్రస్తుతం సంకల్ప్ రెడ్డి దర్శకత్వంలో చేస్తున్న సినిమాపైనే ఆయన ధీమాగా ఉన్నారు.

సక్సెస్ కి ఆమడ దూరంలో..

యంగ్ ఎనర్జిటిక్ స్టార్ రామ్ పోతినేని 2019లో ‘ఇస్మార్ట్ శంకర్’తో బాక్సాఫీస్ వద్ద ప్రభంజనం సృష్టించారు. కానీ ఆ తర్వాత చేసిన ఐదారు సినిమాలు ఆయనకు ఆశించిన ఫలితాన్ని ఇవ్వలేదు. మరోవైపు నితిన్ 2020లో ‘భీష్మ’తో భారీ విజయాన్ని అందుకున్నారు. ఆ తర్వాత ఆయన కూడా వరుస ఫ్లాపులనే ఎదుర్కొంటున్నారు. ప్రస్తుతం వి.ఐ. ఆనంద్ దర్శకత్వంలో చేస్తున్న సినిమాతో ఎలాగైనా హిట్ కొట్టాలని నితిన్ ప్లాన్ చేస్తున్నారు. ఈ ఇద్దరు హీరోలు ఆరు చిత్రాల నుంచి పరాజయాలను చవిచూడటం గమనార్హం.

Tollywood Heros

విజయ్ దేవరకొండ, నాగశౌర్య, విశ్వక్ సేన్ వంటి యంగ్ హీరోలు కూడా ఇదే బాటలో ఉన్నారు. ‘గీత గోవిందం’ తర్వాత విజయ్ దేవరకొండకు ‘టాక్సీవాలా’ మినహాయిస్తే అన్నీ చేదు అనుభవాలే మిగిలాయి. ప్రస్తుతం ఆయన ‘రణబాలి’ సినిమాతో తన అదృష్టాన్ని పరీక్షించుకోబోతున్నారు. నాగశౌర్య ‘ఛలో’ తర్వాత వరుసగా 11 చిత్రాలతో పరాజయం పాలయ్యారు. ఆయన ఆశలన్నీ ‘బ్యాడ్ బాయ్ కార్తీక్’ పైనే ఉన్నాయి.

విశ్వక్ సేన్ గతేడాది ‘గామి’తో హిట్ కొట్టినా, ఆ తర్వాత వరుసగా మూడు ఫ్లాపులు పడ్డాయి. ఇప్పుడు ఆయన ‘ఫంకీ’ సినిమాపై హోప్స్ పెట్టుకున్నారు. టాలీవుడ్ హీరోలందరికీ ఇప్పుడు ఒకే ఒక్క సాలిడ్ హిట్ అవసరం. అది దొరికితేనే వారి కెరీర్ మళ్ళీ స్పీడ్ అందుకుంటుంది. ఒక్క హిట్‌ వస్తే చాలు మరో పది సినిమాలకు కమిట్ అయిపోవడానికి మేకర్స్ సిద్ధంగా ఉన్నారు. మరి రాబోయే చిత్రాలతో ఈ హీరోల అదృష్టం మారుతుందో లేదో వేచి చూడాలి.