పార్టీకి చెక్ ఇద్దామని ఎన్టీఆర్ ఇంటికి వెళ్తే.. అందరిలో నా మీద ఎలా అరిచారంటే.. టాలీవుడ్ నటుడు

తెలుగు సినీ ఇండస్ట్రీలో క్రమశిక్షణకు మారుపేరు ఎన్.టి.రామారావు. ఆయనతో పనిచేయడం అంటే అప్పట్లో నటులకు ఒక పరీక్ష లాంటిది. సీనియర్ నటుడు శివకృష్ణ అన్నగారితో తనకున్న అనుబంధం గురించి చెబుతూ, ఆయన వ్యక్తిత్వంలోని అరుదైన కోణాలను ఆవిష్కరించారు. ఒక సినిమా షూటింగ్ సమయంలో డైరెక్టర్ చెప్పిన మాట విని డైలాగ్ మధ్యలో ఆపిన శివకృష్ణపై ఎన్టీఆర్ ఆగ్రహం వ్యక్తం చేశారు. “నీపై నమ్మకంతో టేక్ అంటే ఎందుకు ఆపావు?” అని ప్రశ్నించినప్పుడు, శివకృష్ణ కంగారు పడినా వెంటనే తేరుకుని ఫుల్ పేజీ డైలాగ్‌ను సింగిల్ టేక్‌లో పూర్తి చేశారు. ఆ ప్రతిభను చూసి అన్నగారు శివకృష్ణను తమ ‘లెక్క’లో వేసుకున్నారట. అంటే ఆయన నటనపై అన్నగారికి ఒక నమ్మకం ఏర్పడింది.

తెలుగుదేశం పార్టీని ప్రకటించే ముందు రామకృష్ణ స్టూడియోలో ఎన్టీఆర్ శివకృష్ణను పిలిపించి మెదక్ నుండి ఎమ్మెల్యేగా పోటీ చేయమని కోరారు. “మీలాంటి యంగ్ అండ్ డైనమిక్ వ్యక్తులు మాకు కావాలి” అని అన్నగారు ఆహ్వానించగా.. అప్పుడప్పుడే కెరీర్‌లో దూసుకుపోతున్న శివకృష్ణ, “సార్ మీ భక్తుడినై సినిమాల్లోకి వచ్చాను, ఇప్పుడే రాజకీయాల్లోకి వస్తే బాగుండదు.. వంద సినిమాలు పూర్తి చేశాక వస్తాను” అని సున్నితంగా తిరస్కరించారు. దానికి అన్నగారు నవ్వి అంగీకరించారు.

ఎన్టీఆర్ రాజకీయాల్లో ఎంత నిక్కచ్చిగా ఉండేవారో చెప్పడానికి ఈ సంఘటన ఒక నిదర్శనం. పార్టీ పెట్టిన కొత్తలో శివకృష్ణ తన వంతుగా రూ. 5,000 చెక్ పట్టుకుని తెల్లవారుజామున అన్నగారి ఇంటికి వెళ్లారు. అయితే డబ్బు తీసుకోవడానికి అన్నగారు నిరాకరిస్తూ.. “సినిమా వాళ్లని మేము దగ్గరికి రానివ్వం, నీ డబ్బు మాకొద్దు” అని కఠినంగా చెప్పారు. తన భక్తిని తిరస్కరించడంతో మనస్తాపం చెందిన శివకృష్ణ, “మీరు కాదంటే గేటు బయటే ఆత్మహత్య చేసుకుంటాను” అని భావోద్వేగానికి గురయ్యారు. శివకృష్ణ ప్రేమను చూసి చలించిన అన్నగారు, చివరకు ఆ చెక్‌ను స్వీకరించమని తన అనుచరుడు ఉపేంద్రకు సూచించారు. అలా తెలుగుదేశం పార్టీకి అందిన మొదటి డొనేషన్ శివకృష్ణ ఇవ్వడం విశేషం.