Puri Jagannadh: ఇదే పూరి జీవితంలో సక్సెస్ మంత్రం.. మీరు ఫాలో అయితే..

ప్రముఖ చిత్ర దర్శకుడు పూరి జగన్నాధ్ తన విజయ రహస్యం, స్ఫూర్తిదాయక పనితీరు గురించి ఒక ఆసక్తికరమైన అంశాన్ని పంచుకున్నారు. ఆయన ఖాళీగా ఉండటాన్ని అస్సలు ఇష్టపడరట. ఖాళీగా ఉంటే రాత్రి నిద్ర కూడా పట్టదని, నిరంతరం ఏదో ఒక పనిలో నిమగ్నమై ఉండటమే తన అలవాటు అని ఆయన వెల్లడించారు. పూరి జగన్నాధ్ దినచర్య తెల్లవారుజామునే మొదలవుతుంది. తన డ్రైవర్, ఇతర సిబ్బంది కంటే ముందే నిద్రలేచి పనులలోకి దిగుతానని ఆయన తెలిపారు. ఐదు గంటలకు అలారం పెట్టుకున్నా, అరగంట ముందే లేచి ఐదు ఎప్పుడు అవుతుందా అని ఎదురుచూస్తుంటానని ఆయన పేర్కొన్నారు. ఈ నిరంతర పనిచేయాలనే తత్వం తనను ఎప్పుడూ చురుకుగా ఉంచుతుందని, దీనివల్ల జబ్బులు, జ్వరాలు దరిచేరవని ఆయన గట్టిగా నమ్ముతారు. పని చేయడం ద్వారా లభించే శక్తి, ఆరోగ్యం తనను ఎప్పుడూ ఉత్సాహంగా ఉంచుతాయని పూరి జగన్నాధ్ అభిప్రాయపడ్డారు. ఈ పని పట్ల నిబద్ధతే ఆయన విజయానికి ప్రధాన కారణాలలో ఒకటిగా చెబుతుంటారు.

కాగా ప్రస్తుతం విజయ్ సేతుపతితో స్లమ్ డాగ్ అనే సినిమా తెరకెక్కిస్తున్నారు పూరి జగన్నాథ్. ఈ సినిమాతో ఆయన బౌన్స్ బ్యాక్ అవ్వాలని ఇండస్ట్రీ వర్గాలతో పాటు అభిమానులు కోరుకుంటున్నారు.

Also Read: ఇది చివరి రోజుల్లో సావిత్రి పరిస్థితి.. సినిమాలో మీకు చూపించని విషయాలు