మొదట యావరేట్ టాక్.. 3 వారాల తర్వాత మొదలైన ఉప్పెన.. కట్ చేస్తే..

విజయా సంస్థ నిర్మించిన రెండవ చిత్రం పాతాళ భైరవి తెలుగు సినిమా చరిత్రలో ఒక విప్లవాత్మక మార్పుకు నాంది పలికింది. తొలి సినిమా షావుకారు విమర్శకుల ప్రశంసలు పొందినా, ఆర్థికంగా విజయం సాధించకపోవడంతో, నిర్మాతల్లో ఒకరైన చక్రపాణి ప్రేక్షకులు కోరుకునే కథలను అందించాలని నిర్ణయించారు. దీనిలో భాగంగా, అరేబియన్ నైట్స్ తరహా కథను ఎన్నుకొని, దర్శకుడు కేవీ రెడ్డి, రచయిత పింగళి నాగేంద్రరావులను సంస్థలోకి తీసుకున్నారు. వీరికి కమలాకర కామేశ్వరరావు తోడవడంతో, ఈసారి వారి ఫార్ములా అద్భుతంగా పనిచేసి, జై పాతాళ భైరవి అనిపించింది. ఈ చిత్రం విడుదలైన తర్వాత తెలుగు సినిమా వ్యాపార పరిధి చాలా విస్తరించింది. దర్శకుడిగా కేవీ రెడ్డి అప్పటికే విజయాలు సాధించినా, ఎన్టీఆర్, ఎస్వీఆర్, పింగళిలకు పాతాళ భైరవి కెరీర్ పరంగా ఎంతో ఉపకారం చేసింది. వారు రాత్రికి రాత్రే తారలుగా మారారు. సామాన్యుడు రాజకుమారిని పెళ్లి చేసుకోవడం అనే కథాంశం ప్రేక్షకులను విశేషంగా ఆకట్టుకుంది. 72 ఏళ్లు గడిచినా, ఈ చిత్రం నేటికీ ప్రేక్షకుల ఆదరణ పొందుతూనే ఉంది.

ఎన్టీఆర్ జైత్రయాత్ర 1950లో పాతాళ భైరవితో ప్రారంభమై మూడున్నర దశాబ్దాల పాటు కొనసాగింది. విజయా సంస్థతో ఆయన రెండేళ్లపాటు ఒప్పందం చేసుకున్నారు, బయట చిత్రాలలో నటించకుండా సంస్థకే పరిమితమయ్యారు. ఈ ఒప్పందం ప్రకారం, మొదటి ఏడాది నెలకు 500 రూపాయలు జీతం, సినిమా నిర్మాణంలో ఉంటే చిత్రానికి 5000 రూపాయలు పారితోషికం పొందారు. విజయా సంస్థ కథా చర్చలకు మూడు నాలుగు నెలలు కేటాయించి, దర్శకుడు, రచయితలతో పాటు సంగీత దర్శకుడు, సినిమాటోగ్రాఫర్, కళా దర్శకుడు కూడా పాల్గొనే పద్ధతిని పాటించేది. రచయిత పింగళి నాగేంద్రరావు సృష్టించిన నేపాళ మాంత్రికుడు, తోటరాముడు, అంజిగాడు పాత్రలు నేటికీ సజీవంగా ఉన్నాయి. “డింగరీ, డంభకా, భుభల్, జాగీ” వంటి పదాలు, “మహాజనానికి మరదలు పిల్ల”, “సాహసం శాయరా, సంకల్పం సిద్ధిస్తుంది” వంటి డైలాగులు కాలాతీతంగా నిలిచాయి. రాజుగారి బామ్మర్ది పాత్రధారి రేలంగితో చెప్పించిన “తప్పు తప్పు” ఊతపదం, ఎన్టీఆర్ చెప్పిన “నిజం చెప్పమంటారా, అబద్ధం చెప్పమంటారా” వంటి సంభాషణలు ఇప్పటికీ ప్రేక్షకులను అలరిస్తున్నాయి.

విజయా సంస్థ క్రమశిక్షణకు మారుపేరు. నటీనటులు అందరికీ నెలసరి జీతాలు ఉండేవి. ఉదయం 9 గంటలకు వాహిని స్టూడియోకి వెళ్లి అటెండెన్స్ రిజిస్టర్లో సంతకం చేయాలి. షూటింగ్ లేని రోజుల్లో రిహార్సల్స్‌లో పాల్గొనాలి. పాతాళ భైరవి షూటింగ్‌కు ముందు ఎన్టీఆర్, ఎస్వీఆర్ ప్రతిరోజు ఉదయం 4:30కి స్టూడియోకి వెళ్లి ఓ గంట సేపు కరసాము సాధన చేసేవారు. క్యాంటీన్‌లో రెండు ఇడ్లీ, ఒక వడ మాత్రమే ఇచ్చేవారు, అది ఎన్టీఆర్‌కు సరిపోకపోవడంతో, నాగిరెడ్డి దానిని రెట్టింపు చేశారు. 1949లో విజయా సంస్థ ఘంటసాలతో ఐదు చిత్రాలకు సంగీత దర్శకత్వం వహించేలా ఒప్పందం చేసుకుంది, బయట చిత్రాలకు పనిచేయరాదనే షరతుతో. దీనికిగాను ఆయనకు 50,000 రూపాయలు చెల్లించారు. పాతాళ భైరవితో పాటు షావుకారు, పెళ్లి చేసి చూడు వంటి చిత్రాలకు ఆయన సంగీతం అందించారు. “కలవరమాయే మదిలో”, “ఎంత ఘాటు ప్రేమయో”, “ప్రేమకోసమే వలలో పడెనే పాపం పసివాడు” వంటి పాటలు అద్భుత విజయం సాధించాయి. ఘంటసాల తన మొదటి కుమారుడికి వెంకట సుబ్రహ్మణ్య విజయ్ కుమార్ అని పేరు పెట్టుకోవడం విజయా సంస్థతో ఆయనకున్న అనుబంధానికి నిదర్శనం. కళా దర్శకుడు మాధవపెద్ది గోఖలే, ఛాయాగ్రాహకుడు మార్కస్ బార్ట్‌లే పాతాళ భైరవి తెరవెనుక మహామంత్రికులు. మాంత్రికుడి గెటప్, గుహ, పాతాళ భైరవి విగ్రహం, మాయా మహల్ వంటివి గోఖలే ప్రతిభకు నిదర్శనం కాగా, బార్ట్‌లే తన కెమెరాతో ఆ సృష్టిని ప్రేక్షకులకు అద్భుతంగా అందించారు. చిత్ర విడుదల ముందురోజు బెజవాడలో ప్రదర్శించిన ప్రివ్యూలో పాతాళ భైరవికి ప్రతికూల స్పందన వచ్చింది. కేవీ రెడ్డికి తెలియకుండా ప్రివ్యూ వేయడంపై ఆయన తీవ్ర ఆగ్రహం వ్యక్తం చేశారు. మొదట యావరేట్ టాక్ వచ్చినా, మూడవ వారం నుంచి జనంలో ఉప్పెన మొదలై, అద్భుత విజయాన్ని నమోదు చేసింది.

(ఈ సమాచారం సీనియర్ ఫిల్మ్ జర్నలిస్టుల నుంచి సేకరించాం)

ఐబొమ్మ మళ్లీ వచ్చేసింది.. సడెన్‌గా ప్రత్యక్షమైన వెబ్ సైట్!