Manchu Lakshmi: పెదరాయుడి ఇంట విభేదాల వేళ.. మంచు లక్ష్మి పోస్ట్ వైరల్

టాలీవుడ్ సీనియర్ నటుడు మంచు మోహన్ బాబు ఇంట్లో గొడవలు తారా స్థాయికి చేరుకున్నాయి. రెండు రోజుల క్రితం చిన్నగా మొదలైన ఈ వివాదం చినికి చినికి గాలివానగా మారింది.

Manchu Lakshmi

Basha Shek |
Updated on: Dec 11, 2024 | 5:04 PM

టాలీవుడ్ పెదరాయుడు మోహన్ బాబు ఫ్యామిలీ గొడవ ఇప్పుడు రెండు తెలుగు రాష్ట్రాల్లో హాట్ టాపిక్ గా మారింది. ఆదివారం (డిసెంబర్ 08) తో మొదలైన ఈ గొడవ మంగళ వారం (డిసెంబర్ 10) రాత్రి నాటికి ఉద్రిక్త స్థాయికి చేరుకుంది. మంచు మనోజ్ దంపతులను లోపలికి రాకుండా సెక్యూరిటీ అడ్డుకున్నారు. ఇక ఈ విషయంపై సమాచారం తెలుసుకునేందుకు వచ్చిన మీడియా ప్రతినిధులపై మోహన్ బాబు దాడి చేయడం సంచలనంగా మారింది. జర్నలిస్టు సంఘాల యూనియన్లు, నాయకులతో పాటు పలువురు రాజకీయ నాయకులు మోహన్ బాబు తీరును ఖండిస్తున్నారు. కాగా మంచు ఫ్యామిలీలో ఇంత గొడవ జరుగుతుంటే మోహన్ బాబు కూతురు మంచు లక్ష్మి మాత్రం సైలెంట్ గా ఉన్నట్లు తెలుస్తోంది. ఈ గొడవ విషయం తెలుసుకున్న ఆమె ఆదివారం అలా వచ్చి ఇలా వెళ్లిపోయారు. ప్రస్తుతం మంచువారమ్మాయి ముంబైలోనే ఉన్నట్లు తెలుస్తోంది. ఈ క్రమంలో సోషల్ మీడియాలో మంచు లక్ష్మి షేర్ చేసిన పోస్ట్ ఇప్పుడు నెట్టింట వైరల్ గా మారింది. ఇన్ స్టా గ్రామ్ వేదికగా తన కుమార్తె చిరునవ్వులు చిందిస్తోన్న ఓ వీడియోను షేర్‌ చేస్తూ దానికి పీస్‌ (శాంతి) అని క్యాప్షన్ ఇచ్చింది. దీనిని చూస్తే శాంతించండి అంటూ ఇన్‌డైరెక్ట్‌గా మంచు లక్ష్మి సలహా ఇచ్చినట్లు అర్థమవుతోంది. ఈ పోస్ట్ కాస్తా వైరల్ కావడంతో నెటిజన్స్‌ భిన్న రకాలుగా స్పందిస్తున్నారు.

అంతకు ముందు తన ఇన్ స్టా గ్రామ్ స్టోరీలో ఒక వీడియోను షేర్ చేసింది మంచు లక్ష్మి. దీనిని బట్టి ఆమె హైదరాబాద్ లో లేదని తెలుస్తోంది. కాగా చాలా రోజుల నుంచి సినిమా ఇండస్ట్రీకి దూరంగా ఉంటోంది మంచు లక్ష్మి. ప్రస్తుతం ఆమె తన కూతురితో కలిసి ముంబైలోనే సెటిలైనట్లు తెలుస్తోంది. అయితే సినిమాలు, వెబ్‌సిరీస్‌ల్లో యాక్ట్‌ చేయడానికి సిద్ధంగా ఉన్నానని, ముంబైలో అవకాశాలు ఇంకా ఎక్కువగా దొరుకుతాయంటోంది. ఇక సోషల్ మీడియాలో మాత్రం ఫుల్ యాక్టివ్ గా ఉంటుంది మంచు వారమ్మాయి. తన డైలీ రొటీన్‌, ఫిట్‌నెస్‌ విషయాలతోపాటు కుమార్తె విద్యా నిర్వాణకు సంబంధించిన విశేషాలను అందులో షేర్ చేస్తూ ఉంటుంది.