Mahesh Babu: దిమ్మతిరిగే కలెక్షన్స్.. పోకిరి స్పెషల్ షో వసూళ్లకు బాక్సాఫీస్ షేక్..

సూపర్ స్టార్ మహేష్ బాబు.. మాస్ డైరెక్టర్ పూరి జగన్నాథ్ కాంబోలో వచ్చిన బ్లాక్ బస్టర్ హిట్ చిత్రం పోకిరి. వీరిద్దరి కలయికలో ప్రేక్షకుల ముందుకు వచ్చిన ఈ మూవీ గతంలో బాక్సాఫీస్ వద్ద సంచలనం సృష్టించింది. ఇలియనా, ప్రకాష్ రాజ్, నాజర్, అశీష్ విద్యార్థి కీలకపాత్రలలో నటించిన ఈ మూవీకి ఆడియన్స్ నుంచి భారీ రెస్పాన్స్ రావడమే కాకుండా.. మహేష్ కెరీర్‏లోనే అతి పెద్ద సూపర్ హిట్ చిత్రంగా నిలిచింది. తాజాగా మరోసారి ఈ సినిమా థియేటర్లలో సందడి చేసింది. మహేష్ బాబు పుట్టిన రోజు సందర్భంగా ఆగస్ట్ 9న ఈ చిత్రాన్ని తెలుగు రాష్ట్రాల్లో స్పెషల్ షో ప్రదర్శించిన సంగతి తెలిసిందే. అయితే మరోసారి ఈ చిత్రాన్ని విడుదల చేయడంతో భారీ రెస్పాన్స్ వచ్చింది.

తెలుగు రాష్ట్రాల్లో పోకిరి సినిమా మళ్లీ బాక్సాఫీస్ ను షేక్ చేసింది. ఉత్తరాంధ్రలో ఈ మూవీ స్పెషల్ షో వెయ్యగా దానికి 24 లక్షల 89 వేల 638 రూపాయాల గ్రాస్ వసూలు కాగా.. గుంటురు జిల్లాలో మొత్తం 33 షోలు వేయగా.. 13 లక్షలకు పైగా వసూళ్లు రాబట్టినట్లు తెలుస్తోంది. అంతేకాకుండా.. కృష్ణ జిల్లాలో మొత్తం 30 షోలు వేయగా.. రూ. 10 లక్షలకుపైగా రాబట్టిందట. చాలాకాలం తర్వాత మళ్లీ స్పెషల్ షోగా వేసిన పోకిరి చిత్రం ఈ రేంజ్ లో వసూళ్లు చేయడం ఇప్పుడు టాక్ ఆఫ్ ది ఇండస్ట్రీగా మారింది. ప్రస్తుతం మహేష్.. డైరెక్టర్ త్రివిక్రమ్ దర్శకత్వంలో రాబోయే సినిమా కోసం వెయిట్ చేస్తున్నాడు. అంతేకాకుండా.. డైరెక్టర్ రాజమౌళి దర్శకత్వంలోనూ మహేష్ ఓ సినిమా చేయనున్న సంగతి తెలిసిందే.