51 ఏళ్ల వయసులోనూ పాతికేళ్ల మెరుపు! రెటినోల్, బోటాక్స్ లేకుండా సాధ్యమంటున్న డింపుల్ బ్యూటీ

51 ఏళ్ల వయసులో ఇద్దరు పిల్లలకు తల్లి అయిన ప్రీతి జింటా మెరిసిపోయే చర్మంతో అందరినీ ఆశ్చర్యపరుస్తోంది. ఈ క్రమంలో ఆమె చర్మ సౌందర్య రహస్యమేంటో చెప్పాలని ఒక అభిమాని అడిగిన ప్రశ్నకు, ప్రీతి తన సోషల్ మీడియా వేదికగా ఆసక్తికరమైన విషయాలను పంచుకుంది. చాలా మంది సెలబ్రిటీలు ఖరీదైన క్రీములు, సర్జరీల వెంట పడుతుంటే.. ప్రీతి మాత్రం చాలా సింపుల్ పద్ధతులను పాటిస్తోంది.

కెమికల్స్ లేని సహజ సౌందర్యం

ప్రీతి జింటా తన స్కిన్ కేర్ రొటీన్ లో ఎటువంటి విలాసవంతమైన లేదా కెమికల్స్ ఎక్కువగా ఉన్న ఉత్పత్తులను వాడనని స్పష్టం చేసింది. ఆమె తన చర్మాన్ని వీలైనంత సహజంగా ఉంచుకోవడానికే ఇష్టపడుతుంది. సన్ స్క్రీన్ వాడటం, చర్మంపై తక్కువ మేకప్ వేసుకోవడం వల్ల చర్మం స్వేచ్ఛగా గాలి పీల్చుకుంటుందని ఆమె తెలిపింది. సాధారణంగా చర్మ నిపుణులు కొల్లాజెన్ ఉత్పత్తి కోసం రెటినోల్ వాడాలని సూచిస్తుంటారు, కానీ ప్రీతి మాత్రం రెటినోల్ లేదా మరే ఇతర కఠినమైన రసాయనాలను వాడనని చెప్పడం అందరినీ ఆశ్చర్యానికి గురిచేసింది.

అందం అనేది కేవలం ముఖానికి రాసుకునే క్రీముల్లోనే ఉండదని, అది మన జీవనశైలికి ప్రతిబింబమని ఆమె అభిప్రాయపడింది. సరైన ఆహారం తీసుకోవడం, జిమ్‌లో వర్కవుట్ చేయడం, తగినంత నిద్ర పోవడం, మానసిక ఒత్తిడిని తగ్గించుకోవడం వంటివి తన అందాన్ని కాపాడే గేమ్ ఛేంజర్స్ అని ఆమె వివరించింది. చర్మం మృదువుగా, తాజాగా ఉండటానికి ఆమె ఇచ్చే మరో ముఖ్యమైన సలహా హైడ్రేషన్. ప్రతిరోజూ ధారాళంగా నీరు తాగడం వల్ల చర్మం లోపలి నుండి శుభ్రపడి కాంతివంతంగా మారుతుంది.

దూరంగా ఉండాల్సిన అలవాట్లు

చర్మ సౌందర్యం దెబ్బతినకుండా ఉండాలంటే కొన్ని అలవాట్లకు దూరంగా ఉండాలని ప్రీతి సూచించింది. ధూమపానం, మద్యం సేవించడం, శరీరంలో మంటను కలిగించే వేపుళ్లు లేదా అనారోగ్యకరమైన ఆహారం తీసుకోవడం వల్ల చర్మం త్వరగా ముసలితనానికి చేరుకుంటుందని ఆమె హెచ్చరించింది. వీటిని పూర్తిగా మానేయడం వల్ల చర్మం ఆరోగ్యంగా ఉండటమే కాకుండా మొత్తం శారీరక ఆరోగ్యం మెరుగుపడుతుంది. “బేసిక్స్ పాటించండి, క్రమశిక్షణతో ఉండండి – అప్పుడు చర్మం విషయంలోనే కాదు జీవితంలో కూడా అద్భుతమైన ఫలితాలు వస్తాయి” అని ఆమె తన అభిమానులకు హితవు పలికింది.

ప్రీతి ఇచ్చిన ఈ సమాధానంపై నెటిజన్లు రకరకాలుగా స్పందిస్తున్నారు. ఆమెకు అసలు బోటాక్స్ చేయించుకోలేదనే విషయం తెలిసి చాలా మంది ఆశ్చర్యపోతున్నారు. హృతిక్ రోషన్ నటించిన కోయి మిల గయా సినిమాలోని క్లిప్స్ షేర్ చేస్తూ.. “నీ చర్మం ఒక మ్యాజిక్” అని కొందరు ప్రశంసిస్తుంటే, మరికొందరు ఆమె డైట్ ప్లాన్ కూడా చెప్పాలని కోరుతున్నారు. ఒకవైపు తన ఫ్యాషన్, ఫిట్‌నెస్‌తో అలరిస్తున్న ఈ డింపుల్ బ్యూటీ, మరోవైపు తన ఐపీఎల్ టీమ్ పంజాబ్ కింగ్స్ యజమానిగా కూడా బిజీగా ఉంది. ఈరోజు పంజాబ్ కింగ్స్, రాజస్థాన్ రాయల్స్ మధ్య జరగనున్న మ్యాచ్‌లో తన టీమ్‌ను ఉత్సాహపరచడానికి ఆమె సిద్ధమవుతోంది. ముఖంపై చిరునవ్వు, మనసులో ప్రశాంతత ఉంటే ఎవరైనా అందంగా కనిపిస్తారని ఆమె నిరూపిస్తోంది.