9 Hours: డిస్నీ ప్లస్ హాట్ స్టార్‏లో 9 అవర్స్ వెబ్ సిరీస్.. రియల్ టైమ్ థ్రిల్లర్ స్ట్రీమింగ్ ఎప్పుడంటే..

నందమూరి తారకరత్న, అజయ్, వినోద్ కుమార్, మధుషాలినీ ప్రధాన పాత్రలలో నటిస్తోన్న వెబ్ సిరీస్ 9 అవర్స్. నందమూరి తారకరత్న చాలా కాలం తర్వాత ఈ వెబ్ సిరీస్ తో ప్రేక్షకుల ముందుకు రాబోతున్నారు. ప్రముఖ దర్శకుడు క్రిష్ ఈ సిరీస్ కు షో రన్నర్ గా వ్యవహరిస్తుండగా.. ఫస్ట్ ఫ్రేమ్ ఎంటర్ టైన్ మెంట్స్ పతాకంపై రాజీవ్ రెడ్డి వై, సాయిబాబు జాగర్లమూడి నిర్మిస్తున్నారు. దీనికి నిరంజన్ కౌషిక్, జెకబ్ వర్గీస్ దర్శకత్వం వహిస్తున్నారు. పీరియాడికల్ డ్రామాగా రూపొందుతున్న ఈ వెబ్ సిరీస్ ప్రముఖ ఓటీటీ ప్లాట్ ఫాం డిస్నీ ప్లస్ హాట్ స్టార్ వేదికగా జూన్ 2 తేదీ నుంచి స్ట్రీమింగ్ అవుతుంది. (9 Hours) ఈ సందర్భంగా హైదరాబాద్ లో ప్రెస్ మీట్ నిర్వహించారు మేకర్స్. ఈ కార్యక్రమానికి షో రన్నర్ క్రిష్, మేకర్స్, ప్రధాన తారగణం పాల్గోన్నారు.

షో రన్నర్ క్రిష్ మాట్లాడుతూ…టెలివిజన్ సీరియల్స్ నిర్మించడం ఖర్చుతో, శ్రమతో కూడిన పని. ఓటీటీ ఫ్లాట్ ఫామ్స్ వచ్చాక ఒక మంచి కథను వెబ్ సిరీస్ గా చూపించే వీలు దొరికింది. అందుకు డిస్నీ ఫ్లస్ హాట్ స్టార్ వాళ్లకు కృతజ్ఞతలు చెబుతున్నా. మల్లాది గారి రచనలకు నేను అభిమానిని. మా నిర్మాణ సంస్థ నుంచి ఆయన నవలలు కొన్ని రైట్స్ తీసుకున్నాం. ఇంకొన్ని తీసుకోబోతున్నాం. మల్లాది రచన నుంచి వస్తున్న తొలి వెబ్ సిరీస్ 9 అవర్స్. రియల్ టైమ్ క్రైమ్ థ్రిల్లర్ గా ఆకట్టుకుంటుంది. నా గమ్యం సినిమాను కన్నడలో చేసిన జాకోబ్ వర్గీస్, యాడ్ ఫిల్మ్ మేకర్ నిరంజన్ ఈ వెబ్ సిరీస్ ను ఆసక్తికరంగా తెరకెక్కించారు. ఈ వెబ్ సిరీస్ మిమ్మల్ని ఆకట్టుకుంటుంది అన్నారు.

తారకరత్న మాట్లాడుతూ…9 అవర్స్ వెబ్ సిరీస్ లో నాకు బాగా నచ్చిన అంశం. ఇందులో ప్రతి క్యారెక్టర్ బాగుండటం. చాలా రోజుల తర్వాత సెట్ లో ఎంజాయ్ చేశాను. ఇద్దరు దర్శకులు ఒక్కొక్కరు ఒక్కో పార్ట్ డైరెక్షన్ చేస్తూ మంచి ఔట్ పుట్ ఇచ్చారు. బ్యాంక్ దొంగతనం అనేది దీంట్లో ఒక భాగం మాత్రమే. కథలో ఇంకా కొత్త విషయాలు ఉంటాయి. ఈ వెబ్ సిరీస్ ను కుటుంబమంతా కలిసి చూడొచ్చు. క్రిష్ గారి ఆధ్వర్యంలో గుర్తుండిపోయే వెబ్ సిరీస్ చేయగలిగాం అన్నారు.