అందుకే ఈ అవార్డు మా అమ్మకు అంకితం: కీర్తి సురేష్

శుక్రవారం ప్రకటించిన 66వ జాతీయ అవార్డుల్లో మహానటి చిత్రానికి గానూ జాతీయ ఉత్తమ నటి పురస్కారానికి ఎంపికైంది కీర్తి సురేష్. ఈ సందర్భంగా ఆమెకు ప్రశంసలు వెల్లువెత్తుతున్నాయి. ఇదిలా ఉంటే ఈ అవార్డు తనకు రావడంపై కీర్తి సురేష్ స్పందించింది. ఉత్తమ నటి పురస్కారం దక్కడం సంతోషంగా ఉందని..ఈ అవార్డును తన అమ్మకు అంకితమిస్తున్నట్లు మహానటి ప్రకటించింది. మేనక తొలి మలయాళం సినిమాకు జాతీయ అవార్డు రావాల్సి ఉందని.. కానీ కొద్దిలో జారిపోయిందని చెప్పిన ఆమె.. అందుకే ఈ అవార్డును ఆమెకు అంకితమిస్తున్నట్లు చెప్పుకొచ్చారు.

ఇక తనకు ఈ చిత్రంలో అవకాశం ఇచ్చిన మహానటి చిత్రబృందం మొత్తానికి కృతఙ్ఞతలు తెలిపారు. తన జీవితంలో ఇదో గొప్ప అనుభూతి అని చెప్పారు. కాగా అలనాటి అందాల తార సావిత్రి జీవిత కథ ఆధారంగా మహానటిని తెరకెక్కించారు. ఇందులో సావిత్ర పాత్రలో నటించిన కీర్తి సురేష్.. అందులో పరకాయ ప్రవేశం చేశారు. కొన్ని సన్నివేశాల్లో సావిత్రినే నటించిందా..! అన్నంతగా నటించి అందరినీ మెప్పించారు. ఇక జాతీయ అవార్డుల్లో మూడు విభాగాల్లో అవార్డులు దక్కించుకున్న మహానటి.. గతేడాది మెల్‌బోర్న్ ఫిలిం ఫెస్టివల్‌లోనూ ఈక్విటీ ఇన్ సినిమా అవార్డు కేటగిరీలో ఒక అవార్డును సొంతం చేసుకున్న విషయం తెలిసిందే.