56 ఏళ్ల వయసులోనూ తగ్గని పరువం..! జిమ్ సెల్ఫీతో నెట్టింట సెగలు రేపుతున్న గ్లోబల్ స్టార్

వయసు అనేది కేవలం అంకె మాత్రమే అని నిరూపిస్తోంది హాలీవుడ్ స్టార్ సింగర్ జెన్నిఫర్ లోపెజ్. 56 ఏళ్ల వయసులోనూ తన ఫిట్‌నెస్‌తో యువ హీరోయిన్లకు గట్టి పోటీనిస్తోంది. తాజాగా సోషల్ మీడియాలో ఆమె షేర్ చేసిన ఒక జిమ్ సెల్ఫీ ఇప్పుడు ఇంటర్నెట్‌ను షేక్ చేస్తోంది. తన కండలు తిరిగిన శరీరాన్ని, ఫ్లాట్ అబ్స్‌ను ప్రదర్శిస్తూ ఆమె దిగిన ఫోటోలు చూసి నెటిజన్లు ఆశ్చర్యపోతున్నారు. క్రాప్ టాప్, జిమ్ టైట్స్ ధరించి, తన ఫిట్‌నెస్ స్థాయిని మరో మెట్టు పైకి తీసుకెళ్లింది ఈ “ఆన్ ది ఫ్లోర్” హిట్ మేకర్. ఈ ఫోటోకు కేవలం ఒక బైసెప్ ఎమోజీని మాత్రమే క్యాప్షన్‌గా పెట్టి, తన కష్టానికి నిదర్శనంగా నిలిచింది.

కోచెల్లా వేదికపై తొలి అడుగు

జెన్నిఫర్ లోపెజ్ కేవలం ఫిట్‌నెస్ మాత్రమే కాదు, కెరీర్ పరంగా కూడా అద్భుతమైన ఫామ్‌లో ఉంది. తాజాగా ప్రపంచ ప్రఖ్యాత మ్యూజిక్ ఫెస్టివల్ ‘కోచెల్లా’లో ఆమె తొలిసారి ప్రదర్శన ఇచ్చి అందరినీ అలరించింది. ఫ్రెంచ్ డీజే డేవిడ్ గ్వెట్టాతో కలిసి ఆమె చేసిన ‘సేవ్ మీ టునైట్’ లైవ్ పర్ఫార్మెన్స్ ప్రేక్షకులను ఉర్రూతలూగించింది. ఈ సందర్భంగా ఆమె మాట్లాడుతూ, ప్రస్తుతం తాను తన జీవితంలో అత్యంత సంతోషకరమైన “హ్యాపీ ఎరా”లో ఉన్నానని, ఇది తన జీవితంలో ప్రతి అంశాన్ని కొత్తగా తిరగరాస్తోందని ఎమోషనల్ అయ్యింది. తనను తాను కొత్తగా ఆవిష్కరించుకోవడంలో ఎప్పుడూ వెనకడుగు వేయవద్దని ఆమె తన అభిమానులకు సూచించింది.

రామ్-కామ్ ప్రపంచంలోకి..

చాలా కాలం తర్వాత జెన్నిఫర్ లోపెజ్ తన ఫేవరెట్ ‘రొమాంటిక్ కామెడీ’ జోనర్‌లోకి అడుగుపెడుతోంది. ఆమె నటిస్తున్న లేటెస్ట్ మూవీ “ఆఫీస్ రొమాన్స్” త్వరలోనే విడుదల కానుంది. ఈ సందర్భంగా ఆమె తన కెరీర్‌లో మైలురాయిగా నిలిచిన 2002 నాటి హిట్ చిత్రం “మెయిడ్ ఇన్ మాన్హట్టన్” షూటింగ్ సమయంలోని కొన్ని అరుదైన ఫోటోలను సోషల్ మీడియాలో పంచుకుంది.

ఆనాటి జ్ఞాపకాలను గుర్తు చేసుకుంటూ, మళ్ళీ రామ్-కామ్ ప్రపంచంలోకి రావడం చాలా సంతోషంగా ఉందని పేర్కొంది. ఓల్ పార్కర్ దర్శకత్వం వహిస్తున్న “ఆఫీస్ రొమాన్స్” చిత్రంలో బ్రెట్ గోల్డ్‌స్టెయిన్, బెట్టీ గిల్పిన్ వంటి ప్రముఖ నటులు కీలక పాత్రలు పోషిస్తున్నారు. మొత్తానికి అటు మ్యూజిక్ ఫెస్టివల్స్, ఇటు సినిమాలు, మరోవైపు తన అదిరిపోయే ఫిట్‌నెస్‌తో జెన్నిఫర్ లోపెజ్ నిజంగానే తన ‘హ్యాపీ ఎరా’ను ఎంజాయ్ చేస్తోంది.