తెలుగు మూవీని వాయిదా వేసిన దుల్కర్‌..!

మహానటితో టాలీవుడ్‌కి ఎంట్రీ ఇచ్చిన మలయాళ నటుడు దుల్కర్ సల్మాన్‌ మరో తెలుగు చిత్రంలో నటించేందుకు ఆ మధ్య ఓకే చెప్పారు. కృష్ణగాడి వీర ప్రేమగాథ, పడి పడి లేచే మనసు ఫేమ్ హను రాఘవపూడి దర్శకత్వంలో దుల్కర్ నటించేందుకు గ్రీన్ సిగ్నల్ ఇచ్చారు. మహానటి నిర్మాతలు స్వప్పా దత్‌, ప్రియాంక దత్‌ ఈ చిత్రాన్ని నిర్మించేందుకు సిద్ధమయ్యారు. ఇక ఇప్పటికే  స్క్రిప్ట్‌ రెడీ అవ్వగా.. ఈ ఏడాది చివరిలో ఈ మూవీని సెట్స్ మీదకు తీసుకువెళ్లాలని దర్శక నిర్మాతలు అనుకున్నారు.

అయితే కరోనా నేపథ్యంలో మార్చి నుంచి షూటింగ్‌లకు బ్రేక్ పడింది. ఇప్పుడు కేసులు రోజుకు పెరుగుతున్న నేపథ్యంలో సెట్స్ మీదకు వెళ్లేందుకు ఎవరూ సాహసించడం లేదు. దీంతో ఈ చిత్రాన్ని దుల్కర్ వాయిదా వేశారట. ముందుగా తాను ఒప్పుకున్న తమిళం, మలయాళం చిత్రాలను పూర్తి చేసిన తరువాతనే ఈ సినిమాలో నటించాలని ఈ హీరో అనుకుంటున్నారట. దీంతో కొద్ది రోజులు ఈ మూవీని వాయిదా వేయాలని ఆయన దర్శకనిర్మాతలకు సూచించినట్లు తెలుస్తోంది.