Balagam Venu: కొండగట్టు అంజన్న స్వామి ఆలయంలో ‘బలగం’ వేణు.. ఫ్యామిలీతో కలిసి ప్రత్యేక పూజలు.. ఫొటోలు వైరల్‌

Balagam Director Venu

తక్కువ బడ్జెట్‌తో తెరకెక్కి ఎలాంటి అంచనాలు లేకుండా విడుదలై భారీ విజయం అందుకున్న చిత్రం బలగం. జబర్దస్త్‌ కమెడియన్‌ యెల్దండి వేణు మొదటిసారి మెగా ఫోన్‌ పట్టుకుని ఈ సినిమాను తెరకెక్కించారు. తెలంగాణ భాష, యాస, సంస్కృతి, సంప్రదాయాలను ప్రతిబింబిస్తూ ఎంతో అద్భుతంగా ఈ సినిమాను రూపొందించాడు వేణు. మార్చి 3న విడుదలైన బలగం విమర్శకుల ప్రశంసలతో పాటు బాక్సాఫీస్‌ వద్ద భారీ వసూళ్లను రాబట్టింది. తెలుగుతనం ఉట్టిపడేలా రూపొందిన ఈ సినిమాను మెగాస్టార్‌ చిరంజీవి, మంత్రి కేటీఆర్‌ తదితర ప్రముఖులు సైతం మెచ్చుకున్నారు. ఇప్పటికీ థియేటర్లలో వసూళ్లు రాబడుతోన్న ఈచిత్రం తాజాగా ప్రముఖ ఓటీటీ అమెజాన్‌ ఫ్రైమ్‌లోకి కూడా అందుబాటులోకి వచ్చింది. దీంతో పలువురు ఈ సినిమాను చూసి ఎమోషనల్‌ అవుతున్నారు. తమ అభిప్రాయాలను సోషల్‌ మీడియాలో పంచుకుంటున్నారు. కాగా మొదటి చిత్రమే భారీ విజయం సాధించడంతో డైరెక్టర్‌ వేణు ఫుల్‌ జోష్‌లో ఉన్నాడు. ఇప్పటివరకు బలగం సినిమా ప్రమోషన్ల కోసం పలు ఛానెళ్లకు ఇంటర్వ్యూలు ఇస్తూ తిరిగిన అతను తాజాగా కొండగట్టు ఆంజనేయ స్వామిని దర్శించుకున్నాడు. కుటుంబ సభ్యులతో కలిసి కొండగట్టు దేవాలయానికి వెళ్లిన వేణు.. అక్కడ ప్రత్యేక పూజలు నిర్వహించారు. అనంతరం దీనికి సంబంధించిన ఫొటోలను సోషల్ మీడియాలో షేర్‌ చేసుకున్నాడు.

‘కొండగట్టు అంజన్న ఆశీర్వాదంతో బలగం సినిమా మొదలు పెట్టాను. అంజన్న దయతో బలగం మీ అందరిని మెప్పించింది. అంజన్న దర్శనం అద్భుతంగా జరిగింది’ అని తన ఫొటోలకు క్యాప్షన్‌ ఇచ్చాడు వేణు. కాగా దిల్ రాజు ప్రొడక్షన్ బ్యానర్‌పై శిరీష్ సమర్పణలో హర్షిత్ రెడ్డి, హన్షిత నిర్మించిన బలగం సినిమాలో ప్రియదర్శి, కావ్య కళ్యాణ్ రామ్ హీరో, హీరోయిన్లుగా నటించారు. సుధాకర్ రెడ్డి, మురళీధర్ గౌడ్ తదితరులు ప్రధాన పాత్రలలో కనిపించారు. ఓవైపు థియేటర్లలో వసూళ్లు రాబడుతోన్న ఈ చిత్రం ఇటీవలే అమెజాన్‌ ప్రైమ్‌ వీడియో ద్వారా ఓటీటీలోకి వచ్చేసింది. రికార్డ్ స్థాయిలో వ్యూస్ అందుకుంటూ ట్రెండింగ్‌ లిస్టు టాప్‌-2లో నిలిచింది.

మరిన్ని సినిమా వార్తల కోసం క్లిక్ చేయండి..