Tollywood : సినిమాలంటే పిచ్చి.. ఎన్టీఆర్ ఇచ్చిన ఎమ్మెల్యే సీటునే వదులుకున్న నటుడు.. చిడతల అప్పారావు గురించి తెలుసా.. ?
తెలుగు తెరపై తన ముఖ కవళికలతోనే నవ్వులు పూయించిన ప్రముఖ హాస్యనటుడు చిడతల అప్పారావు జీవితంలో అరుదైన ఘట్టాలు ఉన్నాయి. రాజమండ్రి నుంచి ఖాళీ జేబులతో మద్రాస్ రైలు ఎక్కిన ఆయన, వందలాది చిత్రాల్లో నటించి మెప్పించారు. ఆఖరికి అప్పటి ముఖ్యమంత్రి నందమూరి తారకరామారావు (ఎన్టీఆర్) స్వయంగా ఇచ్చిన ఎమ్మెల్యే పోటీ చేసే అవకాశాన్ని కూడా సినిమాలపై ఉన్న పిచ్చితో సున్నితంగా తిరస్కరించి, నటనకే తన జీవితాన్ని అంకితం చేశారు.
తెలుగు చలనచిత్ర పరిశ్రమలో వందలాది సినిమాల్లో నటించి, కేవలం తన ముఖ కవళికలతోనే ప్రేక్షకులను కడుపుబ్బా నవ్వించిన హాస్యనటుడు చిడతల అప్పారావు. తెరపై ఆయన కనిపిస్తే చాలు థియేటర్లలో నవ్వుల గ్యారెంటీ అనే నమ్మకం అప్పట్లో దర్శకులలో ఉండేది. వందల సినిమాల్లో నటించినా స్టార్‌డమ్ ఆయన గుమ్మం దాటకపోవడానికి కారణం ఆయన ప్రతిభ లేకపోవడం కాదు, ఆయనకున్న అమాయకత్వం, విపరీతమైన మొహమాటమే. రాజమండ్రి వీధుల్లో పెరిగిన అప్పారావుకు చిన్నప్పటి నుంచే నాటక రంగంపై మక్కువ ఎక్కువ. ‘శ్రీకృష్ణ తులాభారం’, ‘చింతామణి’, ‘బాలనాగమ్మ’ వంటి నాటకాల్లో నటించి మెప్పించారు. ముఖ్యంగా బాలనాగమ్మ నాటకంలో ఆయన వేసిన ‘తిప్పడు’ పాత్రకు అద్భుతమైన గుర్తింపు లభించింది. నటనతో పాటు బుర్రకథలు, హరికథల్లో ‘చిడతలు’ అనే వాద్యాన్ని ఎంతో అద్భుతంగా వాయించేవారు. అలా ఆయన అసలు పేరు కంటే ‘చిడతల అప్పారావు’ అనే పేరే కాలక్రమేణా స్థిరపడిపోయింది. ఒక రోజు జేబులో రూపాయి లేకుండా రాజమండ్రి రైల్వే స్టేషన్‌లో మద్రాస్ వెళ్లే రైలు ఎక్కారు. ఆ నలుగురు యువకులలో ఒకరు హాస్యబ్రహ్మ రాజబాబు కాగా, మరొకరు ప్రముఖ నిర్మాత జైకృష్ణ, ఇంకొకరు చిడతల అప్పారావు కావడం విశేషం.
మద్రాసులో జీవితం ఆయన అనుకున్నంత సులభంగా సాగలేదు. మొదటి సినిమా ‘పెంకిపిల్ల’ దర్శకుడు బి.వి. రామనాథం హఠాన్మరణంతో అప్పారావు మళ్లీ మొదటికొచ్చారు. కడుపు నింపుకోవడం కోసం నటనతో పాటు మేకప్ సహాయకుడిగా, డ్రెస్సింగ్ విభాగంలో, టైలరింగ్‌లో పనిచేశారు. ఎవరినీ అవకాశాల కోసం బ్రతిమాలే స్వభావం ఆయనది కాదు. పని చిన్నదా పెద్దదా అని చూడకుండా, కళను నమ్ముకుని కుటుంబాన్ని పోషించిన నిజమైన తెర వెనుక హీరో ఆయన. ఎందరో హాస్యనటులు డైలాగులతో నవ్విస్తే, అప్పారావు మాత్రం ఒక్క డైలాగ్ లేకపోయినా కేవలం తన హావభావాలు, ముఖ కవళికలతోనే నవ్వులు పూయించేవారు. జంధ్యాల, దాసరి నారాయణరావు, కె. రాఘవేంద్రరావు, ఇ.వి.వి. సత్యనారాయణ వంటి అగ్ర దర్శకులు ఆయనకు వరుసగా అవకాశాలు ఇచ్చారు. ‘జంబలకడిపంబ’, ‘ఏవండీ ఆవిడ వచ్చింది’, ‘ఆలీబాబా అరడజను దొంగలు’, ‘కొండవీటి సింహం’, ‘సర్దార్ పాపారాయుడు’, ‘ఆ ఒక్కటీ అడక్కు’ వంటి చిత్రాలలో ఆయన పాత్రలు చిరస్మరణీయం.
ఎన్టీఆర్ ఇచ్చిన ఎమ్మెల్యే సీటు తిరస్కరణ:
చిడతల అప్పారావు జీవితంలో ఎవరికీ తెలియని అత్యంత ఆసక్తికరమైన కోణం ఒకటి ఉంది. అప్పట్లో ఆంధ్రప్రదేశ్ ముఖ్యమంత్రిగా ఉన్న నందమూరి తారకరామారావు (ఎన్టీఆర్) అప్పారావుకు రాజమండ్రి ప్రాంతం నుండి ఎమ్మెల్యేగా పోటీ చేసే సువర్ణావకాశాన్ని ఇవ్వజూపారు. కానీ అధికారం, హోదాల కంటే నటన , కళారంగమే నా ప్రపంచం అని నమ్మిన అప్పారావు, ఎన్టీఆర్ ఇచ్చిన ఆ రాజకీయ అవకాశాన్ని నవ్వుతూ సున్నితంగా తిరస్కరించారు.
నిజ జీవితంలో అప్పారావు చాలా సాదాసీదా మనిషి. జూనియర్ ఆర్టిస్టులు కష్టాల్లో ఉంటే తన జేబులో ఉన్న డబ్బులు ఇచ్చేసే గొప్ప దానగుణం ఆయనది. అయితే, అందరినీ నవ్వించిన ఈ మహానటుడి జీవిత చరమాంకం మాత్రం లంగ్ క్యాన్సర్ కారణంగా ఎంతో బాధాకరంగా ముగిసింది. భౌతికంగా ఆస్తులు సంపాదించకపోయినా, తెలుగు ప్రేక్షకుల గుండెల్లో ‘ఒక మంచి మనిషిగా’ ఆయన సంపాదించుకున్న స్థానం శాశ్వతంగా నిలిచిపోతుంది.
ఎక్కువ మంది చదివినవి : Trending Song : ఏముంటది మావ ఈ సాంగ్.. స్టార్ హీరోహీరోయిన్ లేకపోయినా సెన్సేషనల్ హిట్.. మిలియన్ వ్యూస్తో యూట్యూబ్ షేక్..