Telangana: బిర్యానీ రుచిగా లేదని రెచ్చిపోయిన కస్టమర్లు..! రెస్టారెంట్‌లో లొల్లి..

కామారెడ్డి జిల్లాలో యువకులు రెచ్చిపోయారు. బిర్యానీ రుచిగా లేదంటూ హోటల్ సిబ్బందిపై దాడికి పాల్పడ్డారు. ఓ రెస్టారెంట్ లో ఆర్డర్ ఇచ్చిన బిర్యానీ రుచిగా కాలేదంటూ కోపంతో ఊగిపోయారు ఐదుగురు వ్యక్తులు. నోటికి వచ్చిన బూతు మాటలు తిడుతూ హల్‌చల్‌ చేశారు. రెస్టారెంట్ యజమాని సంతోష్ , కుకర్, వెటర్ వర్కర్ల పై దాడికి దిగారు. ఈ దాడిలో ఇద్దరు వర్కర్లకు తీవ్ర గాయాలయ్యాయి. రెస్టారెంట్ లోని ఫర్నీచర్‌ మొత్తం ధ్వంసం చేశారు.

జిల్లాలోని బీబీపేట మండల కేంద్రంలోని ఓ రెస్టారెంట్‌కు ఐదుగురు వ్యక్తులు వచ్చారు. బిర్యానీ కావాలని ఆర్డర్‌ పెట్టారు. అయితే, వెయిటర్‌ బిర్యానీ తీసుకొచ్చారు. కానీ, ఆ వచ్చిన వ్యక్తులకు బిర్యానీ నచ్చలేదట. దాంతో కోపంతో ఊగిపోయిన ఆ ఐదుగురు రెచ్చిపోయారు. విచక్షణా రహితంగా హోటల్‌ సిబ్బందిపై దాడికి దిగారు. యువకుల దాడిలో హోటల్‌ సిబ్బంది తీవ్రంగా గాయపడ్డారు. గాయపడిన వారిని స్థానిక ఆస్పత్రికి తరలించారు. ఈ దాడిలో రెస్టారెంట్ లోని ఫర్నిచర్‌ని సైతం ధ్వంసం చేశారు ఆ ఐదుగురు వ్యక్తులు. దాడికి పాల్పడ్డ వారు బీబీపేట మండలం మల్కాపూర్ గ్రామానికి చెందిన వాసులుగా గుర్తించారు. వెంటనే బీబీపేట పోలీస్ స్టేషన్ లో ఫిర్యాదు చేశారు రెస్టారెంట్ యజమాని సంతోష్. కేసు నమోదు చేసుకున్న పోలీసులు దర్యాప్తు చేస్తున్నారు.