Loan App Case : ఆగిపోయిన ఖాతా నుంచి కోటి కొట్టేశాడు..! వీడు మామూలోడు కాదు.. లోన్ యాప్ కేసులో మరో ట్విస్ట్..
Loan App Case : అక్రమ మైక్రోఫైనాన్సింగ్ కేసు దర్యాప్తు చేస్తున్న హైదరాబాద్ పోలీసులకు ఊహించని సమస్య ఎదురైంది.
Loan App Case : అక్రమ మైక్రోఫైనాన్సింగ్ కేసు దర్యాప్తు చేస్తున్న హైదరాబాద్ పోలీసులకు ఊహించని సమస్య ఎదురైంది. ఓ పక్క ఈ కేసు దర్యాప్తు పూర్తి చేసిన సైబర్ క్రైమ్‌ పోలీసులు న్యాయస్థానంలో అభియోగపత్రాలు కూడా దాఖలు చేశారు. అయితే ఈ కేసునే టార్గెట్ చేసిన ఓ సైబర్ కేటుగాడు పోలీసులు డీ ఫ్రీజ్ చేయించిన అకౌంట్ నుంచి కోటి రూపాయలు స్వాహా చేశాడు. దీనిపై కేసు నమోదు చేసిన పోలీసులు దర్యాప్తు ముమ్మరం చేశారు. ఇది ఎలా జరిగిందో తెలుసుకుంటే ఆశ్చర్యం కలుగుతుంది. వివరాల్లోకి వెళితే..
గతంలో అక్రమ వ్యవహారాలకు పాల్పడ్డ 32 కంపెనీలకు చెందిన బ్యాంకు ఖాతాలను గుర్తించిన సైబర్ క్రైమ్‌ పోలీసులు రూ.400 కోట్లకుపైగా ఫ్రీజ్ చేశారు. ఈ ఖాతాల్లో కోల్‌కతాలోని ఐల్‌పోరే ప్రాంతంలో ఉన్న ఐసీఐసీఐ బ్యాంకులో కూడా ఉంది. ఈ ఖాతాను పోలీసులు గత ఏడాది డిసెంబర్‌లో స్తంభింపచేశారు. ఈ సమాచారం తెలుసుకున్న నిందితుడు ఎలాగైనా డబ్బు కొట్టేయాలని పథకం వేశాడు. అక్కడి బ్రాంచ్ మేనేజర్‌ను బోల్తా కొట్టించి డబ్బు ఉడాయించాడు.
తాను హైదరాబాద్ సైబర్ క్రైమ్‌లో ఎస్సైగా పనిచేస్తున్నానని నకిలీ పత్రాలను క్రియేట్ చేసి వాటిని సదరు బ్యాంకు మేనేజర్‌కి సమర్పించాడు. మేనేజర్‌ని మాటల్లో దింపి డీ ఫ్రిజ్ అయిన ఖాతాలను యాక్టివేట్ చేయించాడు. ఆపై గత నెల 13నరూ.1,18,70,779 స్టేట్‌ బ్యాంక్‌ ఆఫ్‌ ఇండియాలో ఆనంద్‌ జన్ను పేరుతో ఉన్న ఖాతాలోకి బదిలీ చేసి స్వాహా చేశాడు. గత నెల 20 మరికొంత మొత్తం ట్రాన్స్‌ఫర్‌ చేయించడానికి ప్రయత్నించాడు. దీనిని సిటీ సైబర్ క్రైమ్‌ పోలీసులు గుర్తించారు. దీంతో బ్యాంకు రీజనల్‌ మేనేజర్‌కు నోటీసులు జారీ చేశారు. వెంటనే బ్యాంకు మేనేజర్ పోలీసులకు ఫిర్యాదు చేయడంతో అసలు వివరాలు వెలుగులోకి వచ్చాయి. పోలీసులు కేసు నమోదు చేసి దర్యాప్తు చేస్తున్నారు.