JEE Main 2026 Results: ఇవాళే జేఈఈ మెయిన్ 2026 ఫలితాలు.. మీ స్కోర్ కార్డ్ ఇలా డౌన్‌లోడ్ చేసుకోండి..

ఇంజనీరింగ్ విద్యార్థుల నిరీక్షణకు ఇవాళ తెరపడనుంది. నేషనల్ టెస్టింగ్ ఏజెన్సీ సోమవారం JEE మెయిన్ 2026 సెషన్-1 ఫలితాలను అధికారికంగా విడుదల చేయనుంది. జనవరి 21 నుండి జనవరి 29 వరకు జరిగిన ఈ ప్రతిష్టాత్మక పరీక్షా ఫలితాల కోసం దేశవ్యాప్తంగా లక్షలాది మంది విద్యార్థులు ఆసక్తిగా ఎదురుచూస్తున్నారు. అభ్యర్థులు తమ ఫలితాలను, స్కోర్ కార్డ్‌లను నేరుగా అధికారిక వెబ్‌సైట్‌ల నుండి డౌన్‌లోడ్ చేసుకోవచ్చు. jeemain.nta.nic.in, nta.ac.in వెబ్‌సైట్ల ద్వారా ఫలితాలను తెలుసుకోవచ్చు.

డౌన్‌లోడ్ ప్రక్రియ

• వెబ్‌సైట్‌ను సందర్శించి JEE Main 2026 Session 1 Scorecard లింక్‌పై క్లిక్ చేయండి.
• మీ అప్లికేషన్ నంబర్, పుట్టిన తేదీ వివరాలను నమోదు చేయండి.
• మీ హాల్ టికెట్‌లో ఉన్న విధంగా వివరాలు సరిచూసుకుని సబ్మిట్ నొక్కండి.
• స్కోర్ కార్డ్ స్క్రీన్ మీద కనిపిస్తుంది. భవిష్యత్తు అవసరాల కోసం దానిని ప్రింట్ తీసుకోండి.

ఈ ఏడాది పరీక్షా సరళి ఎలా ఉంది?

గత ఏడాదితో పోలిస్తే ఈసారి పేపర్లు మోస్తరు నుండి కష్టంగా ఉన్నాయని విశ్లేషకులు చెబుతున్నారు. ముఖ్యంగా జనవరి 21 నుండి 28 వరకు జరిగిన BTech/BE (పేపర్ 1) పరీక్షల్లో ప్రశ్నలు విద్యార్థుల కాన్సెప్చువల్ క్లారిటీని, సమయ నిర్వహణను పరీక్షించే విధంగా క్లిష్టంగా వచ్చాయి. ఫిబ్రవరి 4న విడుదలైన తాత్కాలిక కీపై అభ్యంతరాలను పరిగణనలోకి తీసుకున్న తర్వాతే తుది ఫలితాలను NTA ప్రకటించింది. మొత్తం 13లక్షలకుపైగా విద్యార్థులు ఈ ఫలితాల కోసం ఎదురుచూస్తున్నారు. ఏప్రిల్‌లో జరిగే సెషన్-2 పరీక్షలు కూడా ముగిసిన తర్వాతే NTA తుది ర్యాంకులు, EE అడ్వాన్స్‌డ్ కట్-ఆఫ్ వివరాలను వెల్లడిస్తుంది.

కొనసాగుతున్న సెషన్-2 దరఖాస్తు ప్రక్రియ

మరోవైపు జేఈఈ మెయిన్ సెషన్-2 దరఖాస్తు ప్రక్రియ ఇప్పటికే జోరుగా కొనసాగుతోంది. ఫిబ్రవరి 1న ప్రారంభమైన ఈ ఆన్‌లైన్ దరఖాస్తులకు ఫిబ్రవరి 25 వరకు గడువు ఉంది. సెషన్-1 రాసిన విద్యార్థులు సైతం తమ స్కోర్‌ను మెరుగుపరుచుకోవడానికి ఈ మలి విడత పరీక్షకు దరఖాస్తు చేసుకోవచ్చు. అయితే గతంలోనే రెండు సెషన్లకు కలిపి ఫీజు చెల్లించి దరఖాస్తు చేసిన వారు మళ్లీ కొత్తగా అప్లై చేయాల్సిన అవసరం లేదని ఎన్‌టీఏ స్పష్టం చేసింది. షెడ్యూల్ ప్రకారం.. సెషన్-2 పరీక్షలు ఏప్రిల్ 2 నుండి ఏప్రిల్ 9 వరకు ప్రతిరోజూ రెండు షిఫ్టుల్లో జరగనున్నాయి. అభ్యర్థులు రాసిన రెండు సెషన్లలో దేనిలో ఉత్తమ స్కోర్ వస్తే దాన్నే తుది ర్యాంకు నిర్ణయానికి పరిగణనలోకి తీసుకుంటారు.

నెక్ట్స్ ఏంటీ?

• సెషన్-1 ముగిసిన వెంటనే విద్యార్థులు ఏప్రిల్ సెషన్‌కు సిద్ధం కావాల్సి ఉంటుంది.
• ఏప్రిల్ సెషన్ ముగిసిన తర్వాతే NTA ఫైనల్ ర్యాంకులు, JEE అడ్వాన్స్‌డ్ కోసం కట్ ఆఫ్ పర్సంటైల్‌ను ప్రకటిస్తుంది.
• విద్యార్థులు తమ పర్సంటైల్ ఆధారంగా అంచనా వేయడానికి ఆన్‌లైన్ ర్యాంక్ ప్రిడిక్టర్ టూల్స్‌ను ఉపయోగించవచ్చు.