14 ఏళ్లకే SATలో 1600కి 1600 మార్కులు.. చిన్న వయసులోనే తెలుగు బాలుడి ప్రతిభ
14 ఏళ్ల వయసులోనే జార్జియాకు చెందిన తెలుగు బాలుడు అశ్రిత్ తల్లూరి SATలో 1600కి 1600 పర్ఫెక్ట్ స్కోర్ సాధించి అద్భుత ప్రతిభ చాటాడు. మిడిల్ స్కూల్లోనే హైస్కూల్ క్రెడిట్లు పూర్తి చేసిన అశ్రిత్, ప్రస్తుతం తొమ్మిదో తరగతిలో కాలేజ్ స్థాయి కోర్సులను అభ్యసిస్తున్నాడు. భవిష్యత్తులో న్యూరోసర్జన్గా ఎదగాలని లక్ష్యంగా పెట్టుకున్నాడు..
Updated on: Sep 28, 2026 | 3:50 PM
సాధారణంగా హైస్కూల్ చివరి దశలో విద్యార్థులు రాసే SAT పరీక్షలో జార్జియాకు చెందిన 14 ఏళ్ల అశ్రిత్ తాళ్లూరి అత్యుత్తమ స్కోరు సాధించాడు. ఫుల్టన్ కౌంటీకి చెందిన అశ్రిత్ 1,600కి 1,600 మార్కులు సాధించి తన ప్రతిభను చాటుకున్నాడు. FOX 5 Atlanta, The Independentతో పాటు ఆంధ్రజ్యోతి వంటి మీడియా సంస్థలు ఈ విషయాన్ని వెల్లడించాయి. SATలో Reading and Writing, Math అనే రెండు విభాగాలు ఉంటాయి. ఒక్కో విభాగానికి 800 మార్కులు.. మొత్తం 1,600 మార్కులు. కాలేజ్ బోర్డు గణాంకాల ప్రకారం 1,600 స్కోరు అత్యున్నత శాతాల్లోకి వస్తుంది.
మిడిల్ స్కూల్లోనే హైస్కూల్ క్రెడిట్లు
అశ్రిత్ విద్యాభ్యాసం చిన్న వయసులోనే సాధారణ స్థాయిని దాటింది. మిడిల్ స్కూల్లో ఉన్నప్పుడే 14.5 హైస్కూల్ క్రెడిట్లు పూర్తి చేశాడు. ఈ కోర్సుల ఆధారంగా హార్వర్డ్, రైస్ విశ్వవిద్యాలయాల్లో కాలేజ్ స్థాయి సమ్మర్ ప్రోగ్రామ్లకు అర్హత సాధించాడు. తండ్రి, మిడిల్ స్కూల్ కౌన్సెలర్ సూచనతో అశ్రిత్ SAT రాయాలని నిర్ణయించుకున్నాడు. జనవరిలో పరీక్షకు నమోదు చేసుకుని సుమారు ఐదు నెలల పాటు సిద్ధమయ్యాడు. ట్యూటర్ సహాయం తీసుకోవడంతో పాటు ఆన్లైన్ స్టడీ మెటీరియల్ ఉపయోగించాడు. 20కి పైగా ప్రాక్టీస్ టెస్టులు పూర్తి చేశాడు. అధికారిక పరీక్షకు ముందే మూడు ప్రాక్టీస్ SAT పరీక్షల్లో 1,600 స్కోరు సాధించినట్లు FOX 5 వెల్లడించింది. జూన్లో అధికారిక SAT పరీక్ష రాశాడు. ఫలితాలు విడుదలయ్యే ముందు అతని స్కోరును ధ్రువీకరణ ప్రక్రియ ద్వారా పరిశీలించారు. చివరకు ఫలితం విడుదల కాగా.. అశ్రిత్ సాధించిన స్కోరు 1600/1600గా నమోదైంది.
తొమ్మిదో తరగతిలోనే కాలేజ్ కోర్సులు
ప్రస్తుతం అశ్రిత్ ఫుల్టన్ కౌంటీలోని Innovation Academyలో తొమ్మిదో తరగతి చదువుతున్నాడు. డ్యూయల్ ఎన్రోల్మెంట్ ద్వారా రెండు కాలేజ్ స్థాయి కోర్సులను కూడా అభ్యసిస్తున్నాడు. చదువుతో పాటు అట్లాంటా ప్రాంతంలో నిర్వహించే హ్యాకథాన్లలో పాల్గొంటున్నాడు. చెస్, ఏవియేషన్ వంటి రంగాల్లోనూ ఆసక్తి చూపుతున్నాడు. ఆర్టిఫిషియల్ ఇంటెలిజెన్స్, మెడిసిన్, కంప్యూటర్ సైన్స్, పరిశోధనలపై కూడా ఆసక్తి ఉన్నట్లు అతని పబ్లిక్ ప్రొఫైల్లో పేర్కొన్నాడు. SATలో పర్ఫెక్ట్ స్కోరు సాధించినప్పటికీ పరీక్షలతో తన అనుబంధాన్ని కొనసాగిస్తున్నాడు. ఇతర విద్యార్థులకు ఉపయోగపడేలా ప్రాక్టీస్ ప్రశ్నలు రూపొందించడం, వివిధ పరీక్షా వ్యూహాలను అధ్యయనం చేయడంలో తన ఖాళీ సమయాన్ని వినియోగిస్తున్నాడు.
న్యూరోసర్జన్ కావాలన్న లక్ష్యం
భవిష్యత్తులో న్యూరోసర్జన్ కావాలన్నది అశ్రిత్ లక్ష్యం. మెడిసిన్, టెక్నాలజీ రెండింటిపైనా ఉన్న ఆసక్తికి అనుగుణంగా తన విద్యా ప్రయాణాన్ని కొనసాగిస్తున్నాడు. అతని ప్రొఫైల్లో CerebroAegis అనే ప్రాజెక్ట్కు వ్యవస్థాపకుడిగా పేర్కొన్నాడు. స్మార్ట్ఫోన్ సెన్సర్లను ఉపయోగించి స్ట్రోక్లను ముందస్తుగా గుర్తించడంలో సహాయపడే సాంకేతికతపై ఈ ప్రాజెక్ట్ దృష్టి సారిస్తోంది. ఇది వైద్యుల నిర్ధారణకు ప్రత్యామ్నాయం కాకుండా ఆరోగ్య సంరక్షణలో సహాయక సాంకేతికతగా రూపొందించబడుతున్నట్లు పేర్కొన్నాడు. ప్రస్తుతం తొమ్మిదో తరగతి చదువుతున్న అశ్రిత్.. కాలేజ్ స్థాయి కోర్సులతో పాటు సాంకేతిక, శాస్త్రీయ రంగాల్లోని ఆసక్తులను సమన్వయం చేసుకుంటూ ముందుకు సాగుతున్నాడు. 14 ఏళ్ల వయసులోనే SATలో అత్యున్నత స్కోరు సాధించడం అతని విద్యా ప్రయాణంలో ఒక ముఖ్యమైన మైలురాయిగా నిలిచింది.
