Silver: వెండి ధర ఒక్కసారిగా రూ.77 వేలు ఎందుకు పెరిగింది? వెనకున్న కారణలు ఇవేనా?
బుధవారం దేశీయ, అంతర్జాతీయ మార్కెట్లలో బంగారం, వెండి ధరలు గణనీయంగా పెరిగాయి. అంతర్జాతీయ రాజకీయ పరిణామాలు, ముఖ్యంగా అమెరికా-ఇరాన్ చర్చలు, ద్రవ్యోల్బణ భయాలు ఈ పెరుగుదలకు ప్రధాన కారణాలు. పెట్టుబడిదారులు సురక్షిత ఆస్తులైన బంగారం, వెండి వైపు మళ్లడం వల్ల ఈ లోహాలకు డిమాండ్ పెరిగి, ధరలు రికార్డు స్థాయికి చేరాయి.
బుధవారం దేశీయ, అంతర్జాతీయ మార్కెట్లలో బంగారం, వెండి ధరలు గణనీయంగా పెరిగి పెట్టుబడిదారుల దృష్టిని ఆకర్షించాయి. ముఖ్యంగా MCXలో వెండి ధరలు ఒక్కసారిగా పెరగడం మార్కెట్లో చురుకుదనాన్ని సూచిస్తోంది. జూలై 2026 డెలివరీకి వెండి ధర కిలోగ్రాముకు సుమారు రూ.7,684 (3.1 శాతం) పెరిగి రూ.2,52,000 వద్ద ట్రేడ్ అవుతుండగా, జూన్ డెలివరీకి బంగారం ధర 10 గ్రాములకు రూ.2,429 పెరిగి రూ.1,52,182కి చేరింది. గత ట్రేడింగ్ సెషన్లో కూడా ఈ రెండు లోహాలు లాభాలతో ముగియడం గమనార్హం. ఈ పెరుగుదలకు అంతర్జాతీయ రాజకీయ పరిణామాలు కూడా కారణమవుతున్నాయి. ముఖ్యంగా అమెరికా అధ్యక్షుడు డొనాల్డ్ ట్రంప్ చేసిన తాజా వ్యాఖ్యలు మార్కెట్ సెంటిమెంట్ను ప్రభావితం చేశాయి.
అమెరికా–ఇరాన్ మధ్య ఉద్రిక్తతలను తగ్గించే దిశగా చర్చలు జరుగుతున్నాయని, ఒక సమగ్ర ఒప్పందం దిశగా పురోగతి ఉందని ఆయన సంకేతాలు ఇవ్వడంతో గ్లోబల్ మార్కెట్లలో అనిశ్చితి కొంత తగ్గింది. హోర్ముజ్ జలసంధి ప్రాంతంలో నౌకల తరలింపును తాత్కాలికంగా నిలిపివేయడం కూడా ఈ పరిణామాల్లో భాగంగా కనిపిస్తోంది. అయితే ఈ ప్రకటనలపై ఇరాన్ నుంచి వెంటనే స్పందన రాకపోవడం గమనించాల్సిన అంశం. ఇదిలా ఉండగా అంతర్జాతీయ మార్కెట్లలో కూడా బంగారం, వెండి ధరలు పెరుగుదల దిశగా కదిలాయి. స్పాట్ గోల్డ్ సుమారు 1.7 శాతం పెరిగి ఔన్సుకు 4,633.31 డాలర్లకు చేరగా, యూఎస్ గోల్డ్ ఫ్యూచర్స్ కూడా అదే స్థాయిలో పెరిగి 4,643.20 డాలర్ల వద్ద ట్రేడ్ అయ్యాయి. వెండి ధరలు మరింత వేగంగా పెరిగి ఔన్సుకు 74.80 డాలర్లకు చేరడం గమనార్హం. మరోవైపు చమురు ధరలు ఇంకా అధిక స్థాయిలో ఉన్నప్పటికీ, వరుసగా రెండో రోజు పడిపోవడంతో బ్యారెల్కు 110 డాలర్ల దిగువకు చేరాయి.
మార్కెట్ నిపుణుల ప్రకారం చమురు ధరల పెరుగుదల వల్ల ద్రవ్యోల్బణ భయాలు పెరుగుతున్నాయి. దీని ప్రభావంగా కేంద్ర బ్యాంకులు వడ్డీ రేట్లను పెంచే అవకాశాలు ఉన్నాయని అంచనా వేస్తున్నారు. ఈ పరిస్థితుల్లో పెట్టుబడిదారులు సురక్షిత ఆస్తులైన బంగారం, వెండివైపు మళ్లడం సహజమేనని విశ్లేషకులు చెబుతున్నారు. మొత్తంగా గ్లోబల్ జియోపాలిటికల్ పరిణామాలు, ద్రవ్యోల్బణ ఆందోళనలు, పెట్టుబడిదారుల భద్రతా దృక్పథం అన్నీ కలిసి బంగారం, వెండి ధరల పెరుగుదలకు దారితీస్తున్నాయి. రాబోయే రోజుల్లో ఈ ట్రెండ్ కొనసాగుతుందా లేదా అనేది అంతర్జాతీయ పరిణామాలపై ఆధారపడి ఉండనుంది.
మరిన్ని బిజినెస్ వార్తల కోసం ఇక్కడ క్లిక్ చేయండి