మీ ఎమర్జెన్సీ ఫండ్‌ ఎక్కడ పెట్టుబడి పెట్టాలి? సేవింగ్స్ ఖాతా, FD లేదా ఆర్బిట్రేజ్ ఫండ్.. ఏది బెస్ట్?

Emergency Fund

జీవితంలో ఎప్పుడు ఏ పరిస్థితి ఎదురవుతుందో చెప్పలేం. అకస్మాత్తుగా వైద్య అత్యవసర పరిస్థితి, ఉద్యోగ నష్టం లేదా కుటుంబ అవసరాలు ఎదురైతే వెంటనే ఉపయోగపడేది ఎమర్జెన్సీ ఫండ్‌. అయితే ఈ డబ్బును కేవలం సేవింగ్స్ ఖాతాలో ఉంచాలా? లేక ఫిక్స్‌డ్ డిపాజిట్ (FD)లో పెట్టుబడి పెట్టాలా? పన్ను ఆదా, అధిక వడ్డీ, తక్షణ నగదు అవసరాలను దృష్టిలో ఉంచుకుని సరైన మార్గాన్ని ఎంచుకోవాలని నిపుణులు సూచిస్తున్నారు. నిపుణుల అభిప్రాయం ప్రకారం అత్యవసర నిధిలో కొంత భాగాన్ని ఎల్లప్పుడూ సేవింగ్స్ ఖాతాలో ఉంచడం మంచిది. ఎందుకంటే అత్యవసర పరిస్థితుల్లో వెంటనే డబ్బు ఉపసంహరించుకునే అవకాశం ఉండాలి. అర్ధరాత్రి సమయంలో కూడా వైద్య ఖర్చుల కోసం డబ్బు అవసరమైతే, సేవింగ్స్ ఖాతా ఎంతో ఉపయోగపడుతుంది.

అయితే మొత్తాన్ని సేవింగ్స్ ఖాతాలో ఉంచితే తక్కువ వడ్డీ మాత్రమే లభిస్తుంది. అందుకే ‘స్వీప్-ఇన్ FD’ లేదా స్వల్పకాలిక FDలను మంచి ప్రత్యామ్నాయంగా నిపుణులు సూచిస్తున్నారు. ఇందులో డబ్బు అవసరం లేని సమయంలో FD వడ్డీ లభిస్తుంది. అవసరమైనప్పుడు మాత్రం సులభంగా డబ్బు తీసుకోవచ్చు. సాధారణ FDల మాదిరిగా భారీ జరిమానాలు కూడా ఉండవు. అధిక ఆదాయపు పన్ను శ్లాబ్‌లో ఉన్నవారు FDలపై వచ్చే వడ్డీకి ఎక్కువ పన్ను చెల్లించాల్సి ఉంటుంది. అలాంటి వారు ఆర్బిట్రేజ్ ఫండ్‌లు లేదా హైబ్రిడ్ ఫండ్‌లను పరిశీలించవచ్చని ఆర్థిక నిపుణులు చెబుతున్నారు. ఇవి కొంతవరకు FDల మాదిరి స్థిరత్వాన్ని అందించడంతో పాటు పన్ను భారం తగ్గించడంలో సహాయపడతాయి. అయితే ఈ ఫండ్‌లలో పెట్టుబడి పెట్టిన డబ్బు చేతికి రావడానికి ఒకటి లేదా రెండు రోజులు పట్టవచ్చని గుర్తుంచుకోవాలి.

తక్కువ పన్ను శ్రేణిలో ఉన్నవారికి లేదా వయోవృద్ధులకు మాత్రం సాంప్రదాయ FDలు ఇప్పటికీ సురక్షితమైన ఎంపికగా భావిస్తున్నారు. ఇక అత్యవసర నిధి ఒక్కటే సరిపోదని నిపుణులు హెచ్చరిస్తున్నారు. ఆరోగ్య బీమా, క్రెడిట్ కార్డు పరిమితి, అవసరమైతే బంగారం వంటి ప్రత్యామ్నాయాలను కూడా సిద్ధంగా ఉంచుకోవాలని సూచిస్తున్నారు. ఇవి అత్యవసర పరిస్థితుల్లో ఆర్థిక ఒత్తిడిని తగ్గించడంలో సహాయపడతాయి.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి