Hyper Loop: 30 నిమిషాల్లో 300 కిలోమీటర్ల ప్రయాణం సాధ్యమే.. హైపర్ లూప్పై రైల్వే మంత్రి బిగ్ అప్డేట్
దేశంలో దూరప్రాంత ప్రయాణాన్ని తక్కువ సమయంలో చేయాలంటే విమాన ప్రయాణాన్నే ఎంచుకుంటూ ఉంటారు. అయితే కొన్ని దేశాల్లో బుల్లెట్ ట్రైన్స్ ద్వారా వేగవంతమైన ప్రయాణ అనుభవం ప్రజలకు అందుబాటులో ఉంది. కానీ రాబోయే రోజుల్లో బుల్లెట్ ట్రైన్స్ కంటే వేగంగా ప్రయాణించే హైపర్ లూప్ ట్రైన్ సిస్టమ్ భారతదేశంలో అందుబాటులోకి రానుంది. ఈ హైపర్ లూప్ సిస్టమ్ గురించి రైల్వే మంత్రి అశ్విని వైష్ణవ్ బిగ్ అప్డేట్ ఇచ్చారు.
Updated on: Mar 18, 2025 | 3:00 PM
భారతదేశం ప్రపంచంలోనే అతి పొడవైన హైపర్ లూప్ ట్యూబ్ త్వరలో నిర్మిస్తున్నందున కేవలం 30 నిమిషాల్లో 300 కిలోమీటర్లు ప్రయాణించవచ్చు. ఐఐటీ చెన్నైలోని హైపర్ లూప్ పరీక్షా సౌకర్యాన్ని ఇటీవల సందర్శించిన రైల్వే మంత్రి అశ్విని వైష్ణవ్ మాట్లాడుతూ ప్రీమియర్ ఇన్స్టిట్యూట్ సహాయంతో అభివృద్ధి చేస్తున్న హైపర్ లూప్ ట్యూబ్ ప్రపంచంలోనే అతి పొడవైన ట్యూబ్లా ఉంటుందని, దీని పొడవు 410 మీటర్లు ఉంటుందని అన్నారు. ఆసియాలోనే అతి పొడవైన హైపర్ లూప్ ట్యూబ్ త్వరలో ప్రపంచంలోనే అతి పొడవైనదిగా మారనుందని ఆయన సోషల్ మీడియా ప్లాట్ఫారమ్ ఎక్స్లో పోస్ట్ చేశారు. చెన్నైలోని ఐసీఎఫ్లో హైపర్ లూప్ను అభివృద్ధి చేస్తున్నామని, హైపర్ లూప్ రవాణా కోసం మొత్తం పరీక్షా వ్యవస్థను స్వదేశీ సాంకేతిక పరిజ్ఞానాలను ఉపయోగించి అభివృద్ధి చేశామని వైష్ణవ్ అన్నారు. ఈ విజయానికి యువ ఆవిష్కర్తలందరినీ ఆయన అభినందించారు.
ప్రస్తుతం అభివృద్ధి దశలో ఉన్న హైపర్ లూప్ రవాణా సాంకేతికత ఇప్పటివరకు నిర్వహించిన పరీక్షల్లో మంచి ఫలితాలను ఇచ్చినందున భారతదేశం త్వరలో హైపర్ లూప్ రవాణాకు సిద్ధంగా ఉంటుందని నిపుణులు చెబుతున్నారు. హైపర్ లూప్ ప్రాజెక్టుకు రైల్వే మంత్రిత్వ శాఖ ఆర్థిక నిధులు, సాంకేతిక సహాయం అందించింది. ఈ హైపర్ లూప్ ప్రాజెక్టు కోసం అన్ని ఎలక్ట్రానిక్స్ టెక్నాలజీని ఐసీఎఫ్ చెన్నైలో అభివృద్ధి చేస్తామని వైష్ణవ్ వెల్లడించారు, ఐసీఎఫ్ ఫ్యాక్టరీలోని అత్యంత నైపుణ్యం కలిగిన నిపుణులు వందే భారత్ హై- స్పీడ్ రైళ్ల కోసం పెద్ద ఎలక్ట్రానిక్స్ వ్యవస్థలను విజయవంతంగా అభివృద్ధి చేశారని, ఈ హైపర్ లూప్ ప్రాజెక్టు కోసం ఎలక్ట్రానిక్స్ టెక్నాలజీని కూడా అభివృద్ధి చేస్తామని ఆయన తెలిపారు. గతంలో రైల్వే మంత్రి వైష్ణవ్ భారతదేశపు మొట్టమొదటి హైపర్ లూప్ ట్రాక్ వీడియోను షేర్ చేశారు.
హైపర్ లూప్ రైలు అనేది ప్రయాణికులకు, సరుకు రవాణాకు అత్యంత వేగవంతమైన రవాణా వ్యవస్థ. హైపర్ లూప్ రైలు అయస్కాంత సాంకేతికత సహాయంతో ఒక పాడ్పై నడుస్తుంది. భారతీయ రైల్వేల హైపర్ లూప్ వ్యవస్థ యొక్క గరిష్ట వేగం గంటకు 600 కి.మీ. ఉంటుంది. అవసరమైన అన్ని భాగాలు అందుబాటులోకి వచ్చిన తర్వాత హైపర్ లూప్ రైలు ట్రయల్స్ త్వరలో ప్రారంభమయ్యే అవకాశం ఉంది. ప్రస్తుతం యూరప్ ప్రపంచంలోనే అతి పొడవైన హైపర్ లూప్ టెస్ట్ ట్రాకు కలిగి ఉంది. ఇది రాబోయే భవిష్యత్తులో టెస్ట్ రన్ కోసం సిద్ధమవుతోంది. 2050 నాటికి యూరప్ అంతటా మొత్తం 10,000 కి.మీ పొడవైన హైపర్ లూప్ నెట్వర్క్ అభివృద్ధి చేస్తారని నిపుణులు భావిస్తున్నారు.
మరిన్ని బిజినెస్ వార్తల కోసం ఇక్కడ క్లిక్ చేయండి
