ఏటీఎంలో ఇన్ని పనులు చేసుకోవచ్చా.. ఇన్నాళ్లు ఎలా మిస్ అయ్యాం.. ఇవి తెలుసుకోండి..

ఒకప్పుడు బ్యాంకు ఖాతా నుంచి డబ్బులు తీసుకోవాలంటే బ్రాంచ్‌కు వెళ్లి, విత్‌డ్రా ఫారం నింపి, గంటల తరబడి క్యూ లైన్లలో నిల్చోవాల్సి వచ్చేది. ఆ కష్టాలను దూరం చేస్తూ 24 గంటలూ నగదు లావాదేవీలు నిర్వహించుకునేందుకు బ్యాంకులు ప్రవేశపెట్టినవే ఏటీఎమ్. ప్రస్తుతం దేశవ్యాప్తంగా దాదాపు 2,65,000 పైగా ఏటీఎం కేంద్రాలు ప్రజలకు నిరంతరం సేవలందిస్తున్నాయి. అయితే చాలామంది ఏటీఎంలను కేవలం నగదు విత్‌డ్రా చేసుకోవడానికి మాత్రమే పరిమితం అనుకుంటారు. కానీ వాస్తవానికి ఏటీఎంలలో మరో 10కి పైగా విలువైన బ్యాంకింగ్ సేవలు అందుబాటులో ఉన్నాయి.

ఏటీఎంలలో లభించే ఆ 10 కీలక సేవలు ఇవే

క్యాష్ విత్ డ్రా: 24 గంటలూ ఎప్పుడైనా అవసరమైన నగదును సులభంగా డ్రా చేసుకోవచ్చు.

క్యాష్ డిపాజిట్: ఆధునిక క్యాష్ డిపాజిట్ మెషీన్లు ద్వారా ఖాతాలోకి నేరుగా డబ్బును డిపాజిట్ చేయవచ్చు.

బ్యాలెన్స్ చెకింగ్ : ఖాతాలో ఎంత నగదు నిల్వ ఉందో స్క్రీన్‌పై చూసుకోవచ్చు.

మినీ స్టేట్‌మెంట్: గత కొన్ని లావాదేవీల రసీదును ప్రింట్ రూపంలో పొందవచ్చు.

ఏటీఎం పిన్ మార్పు: భద్రతా కారణాల దృష్ట్యా ఎప్పటికప్పుడు డెబిట్ కార్డు పిన్ నంబర్‌ను మార్చుకోవచ్చు లేదా కొత్త పిన్ సెట్ చేసుకోవచ్చు.

డెబిట్ కార్డు యాక్టివేషన్: కొత్తగా వచ్చిన కార్డును మొదటిసారి సులభంగా యాక్టివేట్ చేసుకోవచ్చు.

ఫండ్ ట్రాన్స్‌ఫర్ : ఒక ఖాతా నుంచి మరొక ఖాతాకు లేదా కార్డు నుంచి కార్డుకు నగదును సులభంగా బదిలీ చేయవచ్చు.

చెక్ బుక్ రిక్వెస్ట్ : బ్యాంకుకు వెళ్లకుండానే ఏటీఎం ద్వారా కొత్త చెక్ బుక్ కోసం దరఖాస్తు చేసుకోవచ్చు.

మొబైల్ రీఛార్జ్: అత్యవసర సమయాల్లో ప్రీపెయిడ్ మొబైల్ నంబర్లకు రీఛార్జ్ చేసుకునే సదుపాయం ఉంటుంది.

బీమా ప్రీమియం చెల్లింపులు: ఎల్‌ఐసీ వంటి ప్రముఖ బీమా సంస్థల పాలసీ ప్రీమియంలను నేరుగా ఏటీఎం ద్వారా చెల్లించవచ్చు.

అవగాహన లోపంతో వృథా అవుతున్న సేవలు

ఏటీఎంలలో ఇన్ని విలువైన సేవలు అందుబాటులో ఉన్నప్పటికీ, సరైన అవగాహన లేకపోవడంతో చాలామంది వినియోగదారులు ఇప్పటికీ చిన్న చిన్న పనుల కోసం బ్యాంక్ బ్రాంచీల వద్ద క్యూ కడుతున్నారు. ఈ సౌకర్యాలపై బ్యాంకులు మరింత విస్తృతంగా ప్రచారం కల్పిస్తే వినియోగదారుల సమయం ఆదా అవ్వడమే కాకుండా బ్రాంచీలపై రద్దీ తగ్గుతుంది.