శ్రీవారి భక్తులకు శుభవార్త.. ఇక వాట్సాప్‌లో దర్శనం టిక్కెట్లు..! ఇలా ఈజీగా పొందండి!

కలియుగ దైవం వెంకటేశ్వరస్వామిని కొన్ని కోట్ల మంది ఆరాధిస్తుంటారు. తిరుమల వెళ్లి శ్రీవారిని దర్శించుకోవడానికి గంటల కొద్దీ క్యూ లైన్లలో నిల్చుంటారు. శ్రీవారి దర్శన టిక్కెట్లకు విపరీతమైన డిమాండ్‌ ఉంటుంది. అయితే తాజాగా మార్పులతో తిరుమల దర్శనం టికెట్లు ఇక సులభంగా పొందే వెసులుబాటు కలిగింది. ఇప్పటి వరకు టీటీడీ ఆన్ లైన్, ఆఫ్ లైన్ విధానంలో టికెట్లు పొందే అవకాశం ఉండేది. ఇక నుంచి ఉన్న చోట నుంచే నిమిషాల్లో టికెట్లు పొందొచ్చు. తిరుమలతో పాటుగా పలు ప్రముఖ ఆలయాల దర్శన, సేవా టికెట్ల కోసం ప్రభుత్వం ఈ నూతన విధానం భక్తులకు అందుబాటులోకి తీసుకొచ్చింది.

బుకింగ్ విధానం

భక్తుల కోసం ఇంగ్లీష్, తెలుగు భాషల్లో మన మిత్ర వాట్సప్‌ గవర్నెన్స్‌ ద్వారా దేవాలయాలకు సంబంధించిన సేవలు అందుబాటులోకి తెచ్చారు అధికారులు. టిక్కెట్లు ఈజీగా పొందడానికి 95523 00009 అనే వాట్సాప్ నెంబర్​ను ఏర్పాటు చేశారు. దీని ద్వారా ఆంధ్రప్రదేశ్​లోని అన్ని ప్రముఖ దేవాలయాలకు సంబంధించిన దర్శన, పలు సేవ టిక్కెట్లు పొందొచ్చు. ముందుగా మీ మొబైల్​లో 95523 00009 అనే నంబర్ సేవ్ చేసుకొని Hi అని మెస్సేజ్ చేయాలి. అప్పుడు సేవలు ఎంచుకోండి అనే ఆప్షన్ వస్తుంది. దానిపై క్లిక్ చేసి కిందకు స్క్రోల్ చేస్తే దేవాలయ బుకింగ్ సేవలు అనే ఆప్షన్ కనిపిస్తుంది.

తిరుమల, శ్రీశైలం, కాణిపాకం, అన్నవరం, విజయవాడ, శ్రీకాళ హస్తి ఇలా ఏపీలోని ప్రముఖ దేవాలయాల పేర్లు కనిపిస్తాయి. అప్పుడు మీరు ఏ దేవాలయం వెళ్లాలనుకుంటున్నారో ఆ టెంపుల్​ ను సెలెక్ట్ చేసి నిర్ధారించి ఆప్షన్ ​పై క్లిక్ చేయాలి. దర్శనం సేవకు సంబంధించి భక్తుడి పూర్తి వివరాలు ఇవ్వటం ద్వారా దర్శనం సేవా టికెట్లు పొందవచ్చు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి