SBI Insta Plus Savings Account: ఎప్పుడైనా.. ఎక్కడైనా.. ఒక్క వీడియో కాల్‌తో అకౌంట్ ఓపెన్ చేయొచ్చు.. ఎస్బీఐ అద్భుతమైన ఫీచర్..

Sbi Yono1

వినియోగదారులకు అత్యాధునిక సాంకేతికతతో కూడిన సేవలు అందించడంలో స్టేట్ బ్యాంక్ ఆఫ్ ఇండియా(ఎస్బీఐ) ఎప్పుడూ ఒక అడుగు ముందే ఉంటుంది. ఇప్పటికే ఇతర ఏ నేషనలైజ్డ్ బ్యాంకు అందివ్వని విధంగా పూర్తి భద్రత, భరోసాతో కూడిన ఆన్ లైన్ బ్యాంకింగ్, ఫోన్ బ్యాంకింగ్, వాట్సాప్ బ్యాంకింగ్, యాప్ ల సాయంతో సేవలను అందిస్తోంది. ఎస్బీఐ యోనో యాప్ ద్వారా సకల సేవలను అరచేతిలోకి తీసుకొచ్చింది. యాప్ నుంచే ఎన్ఆర్ఐ లకు డిజిటల్ ఖాతాలను కూడా ప్రారంభించింది. ఎన్ఆర్ఈ/ఎన్ఆర్ఓ ఖాతాలను యోనో యాప్ ద్వారా ప్రారంభించే వెసులు బాటును తీసుకొచ్చింది. ఇప్పుడు అదే క్రమంలో  వీడియో కేవైసీ ఆధారంగా అకౌంట్ ప్రారంభించే ఫీచర్ను ప్రకటించింది. ఈ ఫీచర్ సాయంతో వినియోగదారులు ఆన్ లైన్ లోనే ఎస్బీఐ ఖాతాను ఓపెన్ చేసే వెసులుబాటు దొరికింది. బ్రాంచ్ వద్దకు వెళ్లకుండానే యోనో యాప్ సాయంతోనే అకౌంట్ ఓపెన్ చేసేలా ఈ కొత్త ఫీచర్ ఉంటుంది. దీనికి సంబంధించిన వివరాలను ఎస్బీఐ అధికారిక ఎక్స్(ట్విట్టర్) ఖాతాలో పోస్ట్ చేసింది. మీరు ఎప్పుడైనా.. ఎక్కడైనా ఎస్బీఐ బ్యాంక్ ఖాతాను ప్రారంభించవచ్చని, అందుకోసం కేవైసీ వీడియో ఫంక్షన్ తీసుకొచ్చినట్లు చెప్పింది. ఎస్బీఐ అందిస్తోన్న ఈ డిజిటల్ అకౌంట్ పేరు ఎస్బీఐ ఇన్ స్టా ప్లస్ సేవింగ్ బ్యాంక్ అకౌంట్. దీనికి సంబంధించిన పూర్తి వివరాలు ఇప్పుడు చూద్దాం..

వీడియో కేవైసీతో ఖాతా ప్రారంభించడం ఇలా..

• యోనో అప్లికేషన్‌ని డౌన్‌లోడ్ చేయండి.
• ఇప్పుడు “న్యూ టు ఎస్బీఐ” ఎంపికపై క్లిక్ చేయండి.
• ఇప్పుడు “ఓపెన్ సేవింగ్స్ అకౌంట్” ఎంపికపై క్లిక్ చేయండి. ఆ తర్వాత “వితౌట్ బ్రాంచ్ విజిట్” ఎంపికపై క్లిక్ చేయండి.
• “ఐ వాంట్ టు ఓపెన్ శాలరీ అకౌంట్” అని ఉన్న బాక్స్ లో టిక్ చేయండి.
• ఇప్పుడు కొత్త దరఖాస్తును ప్రారంభించండి.
• వివరాలను చదివి, చెక్ బాక్స్ పై క్లిక్ చేయండి.
  ఆ తర్వాత మీ పాన్ , ఆధార్ వివరాలను నమోదు చేయండి.
• ఆధార్ రిజిస్టర్డ్ మొబైల్ నంబర్‌కు వచ్చిన ఓటీపీని నమోదు చేయండి.
• ఇతర సంబంధిత వివరాలను నమోదు చేయండి.
• వీడియో కాల్‌ని షెడ్యూల్ చేయండి.
• రెజ్యూమ్ ద్వారా నిర్ణీత సమయంలో యోనో యాప్‌కి లాగిన్ చేసి, వీడియో కేవైసీ ప్రక్రియను పూర్తి చేయండి.
• దీంతో మీ ఇన్‌స్టా ప్లస్ సేవింగ్స్ ఖాతా ఓపెన్ అవుతుంది. బ్యాంక్ అధికారులు ధ్రువీకరించిన తర్వాత డెబిట్ లావాదేవీల కోసం ఖాతా యాక్టివేట్ అవుతుంది.

కొత్త విధానంలో ఫీచర్లు ఇవే..

• వీడియో కేవైసీ ద్వారా మీరు ఎస్బీఐ ఇన్‌స్టా ప్లస్ సేవింగ్ బ్యాంక్ ఖాతాను తెరవండి.
• పేపర్‌లెస్ గా ఖాతాను తెరవచ్చు. దీనికోసం బ్రాంచ్ కు వెళ్లాల్సిన అవసరం లేదు.
• ఆధార్ వివరాలు & పాన్ (భౌతికం) మాత్రమే అవసరం.
• కస్టమర్లు యోనో యాప్ లేదా ఆన్‌లైన్ ఎస్బీఐ అంటే ఇంటర్నెట్ బ్యాంకింగ్ ద్వారా నెఫ్ట్, ఐఎంపీఎస్, యూపీఐ మొదలైన వాటిని ఉపయోగించి నిధులను బదిలీ చేయవచ్చు.
• రూపే క్లాసిక్ కార్డ్ మీకు జారీ చేస్తారు.
• యోనో యాప్, ఇంటర్నెట్ బ్యాంకింగ్, మొబైల్ బ్యాంకింగ్ ద్వారా 24*7 సేవలను యాక్సెస్‌ చేయొచ్చు.
• ఎస్ఎంఎస్ అలర్ట్స్, ఎస్బీఐ క్విక్ మిస్డ్ కాల్ సౌకర్యం అందుబాటులో ఉంటుంది.
• ఇంటర్నెట్ బ్యాంకింగ్ ఛానెల్ ద్వారా ఖాతాలు బదిలీ చేసుకోవచ్చు.
• నామినేషన్ తప్పనిసరి.
• అయితే ఈ ఖాతాపై చెక్ బుక్ జారీ ఇవ్వరు. అలాగే బ్రాంచ్‌లో డెబిట్/వోచర్ లావాదేవీలు లేదా ఇతర సంతకం ఆధారిత సేవలు అనుమతించరు. మీకు ఒకవేళ చెక్ బుక్ కావాలనుకుంటే కస్టమర్ హోమ్ బ్రాంచ్‌ని సందర్శించి, సంతకాన్ని అప్‌డేట్ చేసిన తర్వాత ఇస్తారు.
• వినియోగదారుడు కోరితే పాస్‌బుక్ కూడా జారీ చేస్తారు.
• అన్ని ఇతర సేవలకు సంబంధించిన చార్జీలు సాధారణ సేవింగ్స్ బ్యాంక్ ఖాతాకు వర్తించే విధంగానే ఉంటాయి.

ఖాతా ప్రారంభానికి అర్హతలు..

18 ఏళ్లు పైబడిన భారతీయ నివాసి అయిఉండాలి. తప్పనిసరిగా అక్షరాస్యుడై ఉండాలి.
కొత్త వినియోగదారులకు మాత్రమే ఈ ఖాతా ఓపెన్ అవుతుంది. ఇప్పటికే ఎస్బీఐలో ఖాతా కలిగి ఉన్న వారికి ఇది వర్తించదు. మోడ్ ఆఫ్ ఆపరేషన్ కేవలం సింగిల్.

మరిన్ని బిజినెస్ వార్తల కోసం ఇక్కడ క్లిక్ చేయండి..