రైళ్లలో లగేజ్ చోరీ అయితే ఏం చేయాలి? ఎవరికి ముందుగా ఫిర్యాదు చేయాలో తెలుసా?
రైలు ప్రయాణంలో లగేజీ చోరీ అయితే ఆందోళన చెందకండి. ప్రయాణాన్ని ఆపకుండానే రైలులోని కండక్టర్, GRP/RPF సిబ్బందికి ఫిర్యాదు చేయవచ్చు. వారు FIR ఫారమ్ అందిస్తారు. అంతేకాకుండా, 'రైల్మడద్' మొబైల్ యాప్ ద్వారా లేదా 139 హెల్ప్లైన్ నంబర్కు కాల్ చేసి మీ ఫిర్యాదును సులభంగా నమోదు చేయవచ్చు.
మన దేశంలో ప్రతి రోజు దాదాపు 10,000కి పైగా రైళ్లు నడుస్తుంటాయి. కొన్ని లక్షల మంది రైళ్లలో ప్రయాణాలు సాగిస్తూ ఉంటారు. రైల్వే శాఖ ప్రయాణీకుల భద్రతకు అత్యంత ప్రాధాన్యత ఇస్తుంది. సంవత్సరాలుగా జాతీయ రవాణాదారు భద్రతను పెంచడానికి అనేక చర్యలు తీసుకుంటోంది. వాటిలో ఆన్-బోర్డ్ భద్రతా సిబ్బందిని ప్రవేశపెట్టడం, స్టేషన్లలో నిఘాను బలోపేతం చేయడం వంటివి ఉన్నాయి. ఎన్ని చర్యలు తీసుకున్నా అప్పుడప్పుడు రైళ్లలో ప్రయాణికుల లగేజ్ చోరీ అవుతూ ఉంటుంది. ఆ సమయంలో ప్రయాణీకులు ఎవరిని సంప్రదించాలి? ఎందుకంటే ప్రయాణీకులు ప్రయాణం మధ్యలో దిగి, ఫిర్యాదు చేసి, ఆపై వారి గమ్యస్థానానికి చేరుకోవడానికి మరొక రైలు ఎక్కే అవకాశం ఉండదు.
ఈ అంశంపై రైల్వే మంత్రిత్వ శాఖ ఏం చెప్పిందంటే.. నడుస్తున్న రైళ్లలో లగేజీ దొంగతనం, దోపిడీ జరిగినప్పుడు, ప్రయాణీకులు రైలు కండక్టర్, కోచ్ అటెండెంట్లు, గార్డులు లేదా రైలులోని GRP/RPF సిబ్బందిని సంప్రదించవచ్చు. వారు FIR ఫారమ్ను అందిస్తారు, దానిని సరిగ్గా పూరించి వారికి అందజేయవచ్చు. ఆ తర్వాత అవసరమైన చర్య కోసం ఫిర్యాదును పోలీస్ స్టేషన్కు పంపుతారు. పోలీసులకు ఫిర్యాదు చేయడానికి ప్రయాణీకుడు తన ప్రయాణాన్ని ఆపాల్సిన అవసరం లేదు. ఫిర్యాదు చేయడంలో ఏదైనా సహాయం కోసం ప్రయాణీకుడు ప్రధాన రైల్వే స్టేషన్లలోని RPF సహాయ పోస్టులను కూడా సంప్రదించవచ్చు అని రైల్వే మంత్రిత్వ శాఖ ఒక ప్రకటనలో తెలిపింది.
అలాగే ప్రయాణీకులు రైల్మడద్ మొబైల్ అప్లికేషన్లో కూడా తమ ఫిర్యాదును నమోదు చేయవచ్చు. ప్రయాణ సమయంలో కావలసిన సహాయం కోసం అత్యంత ప్రాధాన్యత కలిగిన మొబైల్ అప్లికేషన్గా రైల్మడద్ను ప్రవేశపెట్టారు. ఈ యాప్ 24×7 హెల్ప్లైన్ 139తో సహా బహుళ ఫిర్యాదు నమోదు మార్గాలను అందిస్తుంది.
మరిన్ని బిజినెస్ వార్తల కోసం ఇక్కడ క్లిక్ చేయండి