హైదరాబాద్‌లో ఉండేవారికి హెల్త్‌ ఇన్సూరెన్స్‌ కవరేజీ ఎంత ఉండాలి?

హైదరాబాద్‌ లాంటి మెట్రో నగరాల్లో ఆరోగ్య సంరక్షణ ఖర్చులు రోజురోజుకీ పెరుగుతున్న నేపథ్యంలో ప్రస్తుతం చాలామంది కుటుంబాలు తీసుకుంటున్న రూ.10 లక్షల ఆరోగ్య బీమా పాలసీ సరిపోతుందా అనే ప్రశ్న మళ్లీ చర్చనీయాంశమవుతోంది. ముఖ్యంగా ప్రైవేట్ ఆసుపత్రుల్లో చికిత్స ఖర్చులు భారీగా పెరుగుతున్న కారణంగా, వైద్య అత్యవసర పరిస్థితుల్లో తగిన బీమా కవరేజ్ లేకపోతే కుటుంబాలపై తీవ్రమైన ఆర్థిక భారం పడే ప్రమాదం ఉందని ఆర్థిక నిపుణులు హెచ్చరిస్తున్నారు. నిపుణుల అభిప్రాయం ప్రకారం మెట్రో నగరాల్లో ఒక పెద్ద శస్త్రచికిత్స, క్యాన్సర్ చికిత్స లేదా దీర్ఘకాలిక ఆసుపత్రి చికిత్స కోసం రూ.10 లక్షల నుంచి రూ.25 లక్షల వరకు ఖర్చవడం సాధారణమైపోయింది. చిన్న పట్టణాలతో పోలిస్తే మెట్రో నగరాల్లో వైద్య ఖర్చులు మూడు నుంచి నాలుగు రెట్లు అధికంగా ఉండటం వల్ల ప్రస్తుతం ఉన్న బీమా కవరేజ్ చాలకపోవచ్చని చెబుతున్నారు.

వైద్య ద్రవ్యోల్బణం కూడా వేగంగా పెరుగుతోంది. ప్రస్తుతం రూ.20 లక్షలు ఖర్చయ్యే చికిత్స, రాబోయే పదేళ్లలో దాదాపు రూ.1 కోటి వరకు చేరుకునే అవకాశం ఉందని నిపుణులు అంచనా వేస్తున్నారు. ఈ పరిస్థితుల్లో తక్కువ కవరేజ్‌తో ఉండటం ప్రమాదకరమని, ముందుగానే అధిక బీమా మొత్తాన్ని ఎంచుకోవడం ఉత్తమమని సూచిస్తున్నారు. ఆర్థిక సలహాదారుల ప్రకారం, కనీసం రూ.20 లక్షలు లేదా అంతకంటే ఎక్కువ ప్రాథమిక ఆరోగ్య బీమా పాలసీ తీసుకోవడం మంచిదని భావిస్తున్నారు.

అలాగే సూపర్ టాప్-అప్ పాలసీలు తీసుకోవడం ద్వారా తక్కువ ప్రీమియంతో అధిక కవరేజ్ పొందవచ్చని చెబుతున్నారు. ముఖ్యంగా కుటుంబాలతో ఉన్న ఉద్యోగులు, మెట్రో నగరాల్లో నివసించే మధ్యతరగతి కుటుంబాలు ఈ విషయాన్ని సీరియస్‌గా పరిగణించాల్సిన అవసరం ఉందని సూచిస్తున్నారు. ఇక పాలసీ ఎంపికలో కేవలం బీమా మొత్తం మాత్రమే కాకుండా, సంచిత బోనస్‌లు, క్యాష్‌లెస్ ఆసుపత్రుల నెట్‌వర్క్, క్లెయిమ్ సెటిల్‌మెంట్ రేషియో వంటి అంశాలను కూడా పరిశీలించాలని నిపుణులు సూచిస్తున్నారు. భవిష్యత్ వైద్య ఖర్చులను దృష్టిలో పెట్టుకుని ఆరోగ్య బీమాను దీర్ఘకాలిక ఆర్థిక భద్రతగా చూడాల్సిన అవసరం ఉందని చెబుతున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి