Gold Price: యుద్ధ మేఘాల మధ్య పసిడికి కష్టాలు.. భారీగా తగ్గనున్న బంగారం, వెండి ధరలు.. నిపుణుల అంచనాలివే..!

Gold and Silver Rates Crash: అంతర్జాతీయ మార్కెట్లో డాలర్ విలువ పెరగడం వల్ల బంగారం ధరలపై ప్రతికూల ప్రభావం పడుతోంది. డాలర్ ఇండెక్స్ పెరిగినప్పుడు, ఇతర కరెన్సీలు ఉన్న దేశాలకు బంగారం కొనుగోలు చేయడం భారంగా మారుతుంది. తద్వారా డిమాండ్ తగ్గుతుంది..

Gold Price

Subhash Goud |
Updated on: Apr 14, 2026 | 8:19 PM

Gold and Silver Rates Crash: సాధారణంగా ప్రపంచంలో ఎక్కడ యుద్ధం జరిగినా లేదా రాజకీయ అనిశ్చితి నెలకొన్నా, పెట్టుబడిదారులు బంగారాన్ని సురక్షితమైన పెట్టుబడిగా భావిస్తారు. దీనివల్ల ధరలు పెరుగుతాయి. కానీ, ప్రస్తుత అమెరికా-ఇరాన్ ఉద్రిక్తతల సమయంలో మాత్రం అందుకు విరుద్ధమైన పరిస్థితులు కనిపిస్తున్నాయి. గత కొన్ని వారాలుగా బంగారం, వెండి ధరలు భారీగా ఒత్తిడికి లోనవుతున్నాయి.

అమెరికా- ఇరాన్ యుద్ధం మొదలైన తర్వాత బంగారం ధరలు 8 శాతం మేర పడిపోయాయి. పారిశ్రామికంగా డిమాండ్ ఉన్న సిల్వర్ ధరలు సైతం ఒత్తిడికి గురయ్యాయి. యుద్ధం మొదలైనప్పటి నుంచి చూసుకుంటే ప్రస్తుతం 16 శాతం మేర దిగువన ట్రేడవుతోంది. కామెక్స్ మార్కెట్లో గత రెండు రోజుల పాటు తగ్గుతూ వచ్చిన గోల్డ్ రేటు ఈ రోజు కాస్త పెరిగింది. ప్రస్తుతం 4800 డాలర్ల వద్ద ఔన్స్ బంగారం ట్రేడవుతోంది. ఇక కామెక్స్ సిల్వర్ రేటు ఔన్సుకు ఈరోజు 77 డాలర్ల వద్ద ఉంది. హార్ముజ్ జలసంధిని నిర్బంధించిన క్రమంలో ఇరాన్ అధికారులు శాంతి చర్చలకు ముందుకు వచ్చినట్లు అమెరికా ప్రెసిడెంట్ డొనాల్డ్ ట్రంప్ తాజాగా ప్రకటన చేశారు.

ధరలు తగ్గడానికి ప్రధాన కారణాలు ఇవే:

అమెరికా డాలర్ బలోపేతం: అంతర్జాతీయ మార్కెట్లో డాలర్ విలువ పెరగడం వల్ల బంగారం ధరలపై ప్రతికూల ప్రభావం పడుతోంది. డాలర్ ఇండెక్స్ పెరిగినప్పుడు, ఇతర కరెన్సీలు ఉన్న దేశాలకు బంగారం కొనుగోలు చేయడం భారంగా మారుతుంది. తద్వారా డిమాండ్ తగ్గుతుంది.

ఇవి కూడా చదవండి

చమురు ధరల ప్రభావం: ఇరాన్ వివాదం వల్ల ముడి చమురు ధరలు పెరిగి, అది ద్రవ్యోల్బణానికి దారితీస్తోంది. ద్రవ్యోల్బణాన్ని అరికట్టడానికి సెంట్రల్ బ్యాంకులు వడ్డీ రేట్లను పెంచుతాయనే అంచనాలు (Rate Hikes) బంగారంపై ఒత్తిడి పెంచుతున్నాయి.

శాంతి చర్చల ఆశలు: హార్ముజ్ జలసంధి దిగ్బంధనం నేపథ్యంలో ఇరాన్ అధ్యక్షుడు మసౌద్ పెజెష్కియాన్ శాంతి చర్చలకు మొగ్గు చూపడం, అమెరికా అధ్యక్షుడు డొనాల్డ్ ట్రంప్ సానుకూల ప్రకటనలు చేయడంతో చమురు ధరలు 100 డాలర్ల దిగువకు చేరాయి. ఇది బులియన్ మార్కెట్‌కు కొంత ఉపశమనం కలిగించింది. ఆరు వారాల క్రితం యుద్ధం ప్రారంభమైనప్పుడు బంగారం ధరలు రికార్డు స్థాయికి చేరినప్పటికీ, ప్రస్తుత ఆర్థిక సమీకరణాల వల్ల గణనీయంగా తగ్గాయి.

ఇది కూడా చదవండి: Akshaya Tritiya 2026: ఈ 92 నిమిషాల్లో బంగారం కొంటే మీ ఇంట్లో సిరుల వర్షమే! ముహూర్తాలు ఇవే..!

భవిష్యత్తుపై నిపుణుల అంచనా

వడ్డీ రేట్ల విషయంలో ఫెడరల్ రిజర్వ్ నిర్ణయమే ఇప్పుడు కీలకం. డిసెంబర్ నాటికి వడ్డీ రేట్లు తగ్గే అవకాశం 20 శాతం కంటే తక్కువగా ఉందని మార్కెట్ వర్గాలు అంచనా వేస్తున్నాయి. భౌగోళిక ఉద్రిక్తతలు తగ్గితే తప్ప, బంగారం ధరలు స్థిరపడటం కష్టమని విశ్లేషకులు భావిస్తున్నారు. అయితే క్రూడ్ ఆయిల్ ధరలు భారీగా పెరిగినట్లయితే బంగారం, వెండి ధరలు మరో 10 శాతం మేర పడిపోవచ్చని అంచనా వేశారు.

ప్రస్తుత మార్కెట్ గణాంకాలు (కామెక్స్ మార్కెట్):

మెటల్	ప్రస్తుత ధర (ఔన్సుకు)	యుద్ధం మొదలైనప్పటి నుండి మార్పు
బంగారం (Gold)	$4,800	సుమారు 8% పతనం
వెండి (Silver)	$77	సుమారు 16% పతనం